Rocco Papaleo

Rocco Papaleo

Biografia
Nasimènto	16 de agosto del 1958 (66 ani) Lauria (Itàlia)
Atività
Ocupasion	diretor de cine, cantante, ator, senezador
Instrumento muzicałe	Voze

Biografia

Inizio

Nasùo e cresùo a Lauria, provinsia de Potenza, el ze fio ùnego de Giacomo, inpiegà de łe inposte, e Giacomina Palmieri. Da puteło el ze fasinà da ła mùzega, inprovizandose parcusionista co «fustini de'l detersivo sonài come bateria»,^[1] pasando drioman a ła ghitara. Daspò aver frecuentà el łiceo sientifego de Lagonegro, el se trasferise a Roma par studiar prima inzenjarìa po' matemàtega a l'univarsità, sensa consegir ła łaurea.^[2] Durando el parìodo univarsidario el taca intaresarse a'l mondo de'l spetacoło e na amiga ła ło iscrive, a só insavùa, a un corso de resitasion.^[3] Da ałora el scominsia a móvar i só primi pasi cofà cabaretista, ator teatrałe e muzeghista.

Cariera

El debuta in teatro co ła comedia Lauria Swing Story (1984), dedicada a ła propia sità nadałe, e el ezordise in tełevizion cofà comico inte'l varietà Ewiva (1988), conduzesto da Milly Carlucci. Tutavia, ła só fama ła se consołida grasie a'l roło de Rocco Melloni inte ła serie tełeviziva Classe di ferro (1989-1991), direta da Bruno Corbucci, par ła cuała el cołabora anca a ła senejadura de alguni epizodi.^[4] Ła só cariera sinematogràfega ła scumisia co na conparsa inte Il male oscuro de Mario Monicelli (1989). Inte'l 1997 el interpreta el roło de protagonista inte'l curtometrajo Senza parole de Antonello De Leo, candidà a l'Oscar e vinsidor de'l David di Donatello de'l mèdemo ano.^[5]

Co Leonardo Pieraccioni nase un łongo sodałisio artìstego che'l ło porta a intarpretar film come I laureati (1995), Il paradiso all'improvviso (2003), Ti amo in tutte le lingue del mondo (2005), Una moglie bellissima (2007), Io & Marilyn (2009) e Finalmente la felicità (2011). So i scominsi de'l 2000, el torna in tełevizion co altre miniserie cofà Giornalisti (2000), Cuore contro cuore (2004), Tigri di Carta (2008) e inte i film tełevizivi Vola Sciusciù (2000), Padre Pio - Tra cielo e terra (2000) e Cuore di donna (2002).

Inte'l 2009 el partesipa a ła reałizasion de'l film japoneze Amalfi: megami no hōshū, direta da Hiroshi Nishitani. Inte'l 2011 el interpreta Nicola, só pare de Checco Zalone in Che bella giornata de Gennaro Nunziante. Senpre cheł'ano el ze uno dei protagonisti de'l film d'ezordio de Massimiliano Bruno - Nessuno mi può giudicare - e el ze protagonista, insieme a Luciana Littizzetto, de'l film de Lucio Pellegrini È nata una star? de'l 2012.

A ze de'l 2010 el só ezordio a ła rezìa, co Basilicata coast to coast, film traesto da un testo par el teatro scrito da Papaleo e Valter Lupo, co'l cuało el otien el David di Donatello e el Nastro d'argento come mejo rezista ezordiente.^[6][7] El se simenta da novo a ła rezìa inte'l 2013 co Una piccola impresa meridionale (traesto da l’omònemo romanzo de Papaleo) e inte'l 2016 co Onda su onda. EL ga direto anca i videoclip muzegałi de Mentre dormi de Max Gazzè (prezente inte ła cołona sonora de Basilicata coast to coast), Lontano da tutto de Serena Abrami e Dove cadono i fulmini de Erica Mou.

Inte'l 2012 el afianca Gianni Morandi inte ła condusion de'l Festival de Sanremo. Inte'l 2014 el ze protagonista co Paola Cortellesi in Un boss in salotto de Luca Miniero, e, co Sergio Castellitto, in La buca, film de Daniele Ciprì. Inte'l 2018 e inte'l 2020 el veste i pani de Athos inte Moschettieri del re - La penultima missione e Tutti per 1 - 1 per tutti de Giovanni Veronesi, comedie łibaramente ispiràe ai romanzi de Alexandre Dumas. Inte'l 2019, el conduze el DopoFestival de ła sesantanovezema kermesse sanremeze, insieme a Anna Foglietta e Melissa Greta Marchetto.^[8] Inte l'isteso ano, el vinse el Premio Flaiano come mejo intarpretasion mascołina inte i film Moschettieri del re - La penultima missione e Il grande spirito de Sergio Rubini.^[9] Inte'l 2023 A vien fora Scordato, el só cuarto film da rezista de'l cuało el ze anca inteprete e che'l senja el debuto de Giorgia come atora.

Nantre atividà

Ativo anca come muzisista e dopiador, el inside do dischi de zènare jazz/pop: Che non si sappia in giro (1997) e La mia parte imperfetta (2012). In pì el partesipa a ła reałizasion dei brani Rocco e i suoi fratelli e InTricarico dei Têtes de Bois, da'l disco Avanti pop (2007).^[10] El presta ła voze inte i łongometraji Pinocchio (2012) e Il più grande uomo scimmia del Pleistocene (2015), inte i rołi de Mangiafoco e Sergey.

Vita privada

Papaleo el ze stà spozà co Sonia Peng, senografa zvisara co ła cuała el ga łaorà in racuante produsion e da ła cuała el ga avùo un fio.^[11]

Teatro

• Lauria Swing Story, rezìa de Rocco Papaleo (1984)
• 2001 odissea nello spazio, rezìa de Piero Castellacci (1985)
• Duello in piazza, rezìa de Salvatore Di Mattia (1985)
• Sussurri assurdi, rezìa de Salvatore Di Mattia (1986)
• La madre, rezìa de Claudio Frosi (1986)
• Aspettando metrò, rezìa de Rocco Papaleo (1987)
• Fools, rezìa de Pino Quartullo (1988)
• Gonne, rezìa de Rocco Papaleo (1990)
• Trompe l'oeil, rezìa de Federico Cagnoni (1991)
• Metodo Stanislawsky, rezìa de Valter Lupo (1992)
• Sottovoce, rezìa de Valter Lupo (1993)
• Di notte non bisognerebbe andare a caso, rezìa de Edoardo Erba (1994)
• Radio Estetica, rezìa de Franco Bertini (1995)
• L'inno dell'ultimo anno, rezìa de Maurizio Panici (1996)
• Che non si sappia in giro, rezìa de Valter Lupo (1997)
• Un'aria di famiglia, rezìa de Michele Placido (1998)
• Forbici follia, rezìa de Valter Lupo (1996)
• Simpatico, rezìa de Pietro Bontempo (2000)
• Eduardo al Kursal, rezìa de Armando Pugliese (2001-2004)
• Basilicata on My Mind, rezìa de Pietro Bontempo (2003)
• Scoppio d'amore e guerra, rezìa de Duccio Camerini (2005-2006)
• Il linguaggio della montagna, rezìa de Pietro Bontempo (2007)
• Basilicata Coast to Coast, rezìa de Valter Lupo (2008)
• La fantasia mi consola, rezìa de Rocco Papaleo (2009)
• Eduardo più unico che raro, rezìa de Giancarlo Sepe (2010-2011)
• Una piccola impresa meridionale, rezìa de Valter Lupo (2012-2016)
• Buena onda, rezìa de Valter Lupo (2017-2018)
• Coast to coast, rezìa de Valter Lupo (2019-2020, 2022)
• Peachum - Un'opera da tre soldi, rezìa de Fausto Paravidino (2022)
• Maledetti amici miei... il ritorno (quelli di A ruota libera), de e co Nino Frassica, Alessandro Haber, Rocco Papaleo, Giovanni Veronesi, rezìa de Giovanni Veronesi (2022)

Notasion

1. Rocco Papaleo, l’intervista: «Chiamatemi Rock»rollingstone.it. entrada il 21 novembre 2022.
2. Intervista a Rocco Papaleoxaltro.it. entrada il 21 settembre 2022.
3. Come ho iniziato? Un'amica mi iscrisse a una scuola di recitazione a mia insaputadagospia.com. entrada il 21 settembre 2022.
4. Classe di ferro 2cinematografo.it. entrada il 20 novembre 2022.
5. Rocco Papaleo si racconta: “Separato ma porto ancora la fede. Faccio schifo, molti non se ne accorgono per un motivo”brevenews.com. entrada il 21 settembre 2022.
6. Premi David di Donatello per "Basilicata coast to coast"daviddidonatello.it. entrada il 18 febbraio 2015.
7. I vincitori dei Nastri d'Argentocinegiornalisti.com. entrada il 2 novembre 2012 (archivià dal URL orizenałe il 20 giugno 2011 Il valore del parametro dataarchivio non combacia con la data decodificata dall'URL: 20 de zunjo 2011 (juto)).
8. Rocco Papaleo conduttore del DopoFestival | DavideMaggio.itdavidemaggio.it. entrada il 22 dicembre 2018.
9. Premi Flaiano, tutti i vincitoriil Centro, 26 giugno 2019. entrada il 10 luglio 2019.
10. Avanti Poptetesdebois.it. entrada il 25 novembre 2022.
11. Rocco Papaleo parla del matrimonio finito con Sonia Peng: «Vive al piano di sotto e porto ancora la fede»donnapop.it. entrada il 21 settembre 2022.

Controło de autorità	VIAF (EN) 164751895 · ISNI (EN) 0000 0001 1718 9610 · El vałore RAVV221221 de SBN no el xe mija bon. · Europeana agent/base/46819 · LCCN (EN) nr2004021216 · GND (DE) 143872923 · BNE (ES) XX1534220 (data) · WorldCat Identities (EN) nr2004-021216