方腊（？-1121年），又叫方十三，吴越歙州（治歙县，今朝徽州）人，迁至睦州青溪（今朝浙江淳安）。北宋晚期，反抗帝国暴政个江南起义领袖，明教信徒。 北宋末年，江南地赋税繁重，宋徽宗设“苏杭应奉局”搜刮花石纲等民间财物。方腊发出之“东南之民，苦于剥削久矣”个呼声，江南百姓纷纷响应。方腊勒1120年10月勒歙县七贤村起义，建立之覆盖大半个吴越地区（包括今朝江苏南部、浙江、安徽南部）个政权，勒搿歇辰光影响交关大。 1121年夏起义失败，方腊畀捉，押到之汴京，畀宋朝杀脱。
宣和二年（1120年）勒歙县七贤村起义（一说勒淳安县万年乡清溪幫源洞起事。），勒漆园里向誓师，指责宋王朝罪恶，自号圣公，年号永乐，用巾饰为标志，从红巾以上分六等；分兵出击，教徒兰溪朱颜、吴邦、剡县仇道人、仙居吕师囊、方岩山陈十四、苏州石生、归安陆行儿等也纷纷响应；之后攻占杭州、歙州等，建立之横跨今朝江苏、浙江、安徽、江西四省六州52县个政权，东南震动，俚准备勒十年之内推翻宋朝。 宣和三年（1121年）四月，王渊个裨将韩世忠，潜行清溪溪谷，问一个女人路，前捣清溪幫源洞，捉牢方腊，后来忠州防御使辛兴宗领兵堵牢洞口，占为己功。方腊搭部下方肥等五十二个人畀捉，勒八月畀害。 方腊起义失败，虽然方腊畀杀脱，歙县搭淳安个弗少地方个人还是非常敬重搿位“农民起义”个领袖。为之纪念俚，以俚个名字命名之弗少地名，今朝搿点地方还有“方腊洞”、“方腊寨”等。 宣和元年（1119年）起事，随后畀招安个宋江，也参加之镇压方腊个军事行动，搿个只是小说之言。其实浪，宋江是畀宋军所败而降，弗是招安。而且宋将张叔夜只用千人就打败之宋江，凭宋江个实力，宋朝根本弗会用俚去征讨方腊号称百万之师。