熊希龄

熊希龄（1870年7月23号－1937年12月25号），字秉三，号明志阁主人、双清居士，19世纪末到20世纪初个有名政治人物、学者、教育家、实业家，20年代之后，成为有名个慈善家。

生平

伊是出生在拉湖南省凤凰直隶厅（今凤凰县）镇竿镇（今沱江镇）个苗族搭汉族混血，屋里三代侪是武将。搭自家祖辈两样，熊希龄从小读书做题来事，地方官朱其懿邪气欢喜，化仔交关力道培养伊，乃么成为仔有名个读书种子，从15岁开始，七年当中连续仔中秀才、举人、进士，成为翰林。之后，伊参加维新活动，推扳一眼为之畀清帝国通缉。1900年，庚子事变之后，熊希龄重新得着启用；后手来，成为出洋五大臣当中个一位，并负责替清帝国起草宪法。伊拿迭个事体交畀在拉日本个梁启超搭仔杨度负责，末脚成功完成。

1900年代阿末两年里向，熊希龄在拉东北搭仔南京做事体，接触着财政、内政事体，伊侪安排来井井有条，个咾人家侪觉着伊是一个人才。1911年武昌起义发生之后，熊希龄拥护共和，跑路跑到上海，参加南方个革命党政府。但因为伊归根结底是一个老早子清帝国个官僚，在拉中华民国建立之后，伊重新跑到梁启超迭牌人许头，外加成为仔伊拉进步党个骨干。到1913年二次革命失败之后，熊希龄畀袁世凯看中，请出来当总理，弗罢1年，就因为自家个政治抱负实现弗成功，乃么只好辞职。

之后，熊希龄基本退出仔政界，1910年代末，伊开始接触慈善活动，外加慢慢较变成功一个慈善家。1920年代之后，伊兴办香山慈幼院，并拿自家钞票侪捐献出来，作为慈幼院个经费。1920年代后半段，日本个势力在拉东北、华北越来越大，熊希龄心里向邪气光火，搞过交关活动去催促南京当局抗日，但侪弗成功。1937年，总算等着中日爆发全面战争。熊希龄一开始邪气兴奋，认为乃总好教训日本哉。弗匡张中国军队在拉上海战场一败涂地，个也让伊心灰意冷，本生就有个身心毛病也越加严重起来。12月南京畀日本军队占领之后，伊跑到香港，准备从广东返回湖南。但弗出几日，就因为心力交瘁，在拉香港故脱。

1992年，熊希龄个棺材畀迁在拉北京香山，落葬在拉老早底伊创办个慈幼院近边。