Bô-miâ Sió-chām (無名小站), he̍k-chiá Wretch, sī chi̍t ê í-keng chiong-chí ho̍k-bū ê Tâi-oân siā-kau ho̍k-bū bāng-chām. I-ê chiân-sin sī TANet ê hāu-hn̂g BBS chi it, tī 1999 nî sêng-li̍p, chú-iàu chhòng-siat-chiá sī hit-tang-chūn tha̍k Kok-li̍p Kau-thong Tāi-ha̍k Chu-sìn Kang-têng-ha̍k ê Kán Chì-ú (簡志宇). 2003 nî khí, cheng-ka bāng-lō͘ siòng-phō͘, blog, liû-giân-pán téng ho̍k-bū. 2004 nî ê hōe-oan sò͘-liōng ta̍t 20-bān lâng. 2005 nî chèng-sek siat-li̍p Bô-miâ Sió-chām Kó͘-hūn Iú-hān Kong-si (無名小站股份有限公司), siong-gia̍p bāng-chí hō-miâ chò "wretch". 2006 nî té, soan-pò͘ pēng-ji̍p Yahoo! Kî-mô͘, pēng tī 2007 nî chiâⁿ-chò Yahoo! Kî-mô͘ kî-hā ê siā-kau bāng-lō͘ ho̍k-bū chi-it. Yahoo! Kî-mô͘ tī 2013 nî 8 goe̍h soan-pò͘ koan-pì blog ho̍k-bū, Bô-miâ Sió-chām iā kāng sî-kan koan-pì.