2007年山西河南黑磚窯案（窯同窰讀搖），發生喺中國山西。嗰度嘅磚窯礦主，響拐子佬度買啲拐番嚟嘅人，當佢係奴隸，裏面重好多係細路仔，而呢班民工主要係來自河南省。礦主將佢哋鎖喺各個窯場，勞役佢哋，迫佢哋做一啲苦差，郁啲就打，令到佢哋唔少人殘廢、甚至死。案件被媒體曝光之後，引起國人公憤，結果得到中國中央政府重視，胡錦濤等批示各地方政府檢查、營救等各種措施。涉案嘅主要係窯場主王斌斌、佢老豆黨支部書記王東己同埋窯場承包人衡庭漢。
2007年6月5號，四百位，個仔畀人拐咗去山西做苦工嘅老竇，響中國共產黨河南省委直屬嘅《大河網》大河論壇嗰度，貼出一篇標題係《孩子被賣山西黑磚窯400位父親泣血呼救》嘅文。篇文貼出之後，引起外界廣泛回應。據統計，最後呢篇聯署信嘅點擊率，達到31萬次。兩日後，6月7號，有網友將篇文轉咗去中國另一個好多人用嘅網上論壇天涯社區。
過多個零禮拜，6月18號，廣東嘅維權律師唐荊陵發起藍絲帶公民行動，呼籲關注呢件事嘅，戴住藍絲帶直至到全部拐走嘅人返嚟為止[1]。
最後，過多兩日，6月20號，中國國務院響發出嘅新聞公報裡面，指總理溫家寶要求打擊呢件事涉及嘅犯罪分子，黑惡勢力，又指涉及官員腐敗和失職問題，要嚴肅懲處[2]。