程翔(1949年12月3號—)香港居民,又係新加坡永久居民。佢係新加坡《海峽時報》駐中國首席特派員,2005年4月22號因間諜罪喺中國廣州被捕到第二年8月31號被判監禁5年。
喺2008年2月4號,程翔獲准假釋,第二日下晝返香港[1]。
程翔喺中國大陸出世,喺香港長大,喺聖保羅書院讀中學,香港大學經濟系畢業,後嚟喺親中報章《文匯報》做嘢,曾經做過呢份報紙嘅駐北京記者站主任、副總編。1989年嗰陣參與六四事件北京採訪工作,之後因為抗議當局嘅處理手法,同其他40幾個同事一齊辭職;1996年出任新加坡《海峽時報》中國首席特派員。[2]
2005年8月5號,新華社發佈消息話程翔「因涉嫌間諜罪被北京市國家安全局依法逮捕」,指佢「自2000年初,用化名『陳元春』為台灣國家安全局間諜策反。由2000年初一直到2005年3月按照台灣『國家安全局』指示喺香港同內地建立多條搜集情報渠道,以金錢收買呢啲方式搜集涉及國家政治、經濟尤其喺軍事等大量情報,包括絕密、秘密級內容。佢將呢啲情報轉報畀台灣間諜情報機關,對國家安全產生危害,因為咁而得到台灣間諜情報機關先後發畀程翔間諜經費數百萬港元。」[3][4][5]
程翔向來以愛國見稱,而立場一直被指親中,又支持兩岸統一[6]。據程翔老婆講,佢係為咗拎一份趙紫陽生前訪談錄而去廣州,但一去到廣州機場就畀公安帶走,4月24號開始失去聯絡。
佢相信逮捕係同呢份訪談錄有關,但中華人民共和國外交部接受詢問時明確否認程翔被捕係同趙有任何關係,重宣稱佢係由於「根據境外情報機關指示,在中國內地從事情報搜集活動,先後領取大量間諜費」而被逮捕,而且佢自己都承認咗有關罪行。但喺5月31號中國外交部喺網頁上刪除咗這段說話[7]。
6月1號美國表示關注程翔被捕嘅事[8];北京市人民檢察院喺2006年2月將案件發還畀國安部,要求作補充調查,7月底檢察院將案件交畀法院處理;而家程翔家人只可以透過律師每月同喺北京市郊一個看守所拘留嘅程翔見面一次,間接瞭解程翔近況。
被捕期間,香港雜誌《東週刊》曾報道一個叫「黃偉」嘅女仔係程翔嘅情婦,但之後黃偉喺商業電台《左右大局》節目否認呢件事。[9]
香港記者協會喺程翔被拘之後不斷透過特首曾蔭權同中聯辦向中央反映要求以公平、公正、公開原則處理程翔案件以及盡快釋放程翔,商業電台就發起「聲音黃絲帶」行動,每日喺節目入面出一段聲帶提示程翔被扣留日數;另外重有由龍緯汶等人成立嘅聲援組織:營救程翔聯盟。除咗香港民主派人士外,李鵬飛、徐四民等全國人大代表同全國政協委員亦對事件表達關注。
2006年7月20號,劉敏儀同國際記者協會、無國界記者在內嘅二十個國際團體,喺全球十個城市(洛杉磯、巴黎、紐約、墨爾本、多倫多、波恩等等)舉行記者會,要求中國政府要公正同埋公開處理案件。
北京市第二中級人民法院成立合議庭受理案件,並喺8月15號朝早9點半開審,下午4點半結束審結,排期宣判;由廣東省人大常委會立法顧問何培華同另一位律師作為代表律師;由於案件涉及「國家機密」,法庭以面積太細為理由唔公開審訊,又唔畀傳媒旁聽,但就畀家屬旁聽;又喺8月16號朝早上喺同一個法庭對陸建華開審,
香港記者協會連同外國記者協會、民間人權陣線、程翔關注組等多個組織喺開審日8月15日夜晚7點喺香港中環遮打花園舉行燭光晚會,聲援程翔。
程翔喺8月31號朝早9點喺原法庭被判入獄5年,剝奪政治權利1年,沒收個人財產30萬元人民幣。法院指稱,2004年5月到2005年4月期間,程翔同台灣間諜組織某基金會代理人薛某同戴某,按佢哋佈置嘅任務,喺北京用傳真、電子郵件等形式將涉及國家秘密及情報嘅有關文字材料提供畀台灣,又以化名獲取酬金港幣30萬元,呢個行為已經構成間諜罪。
但係由於程翔肯主動交代事實,又肯交出筆記本電腦證據,當做自首減刑。
判決後,程妻同程翔關注組織唔服判決,要求上訴。香港記者協會同部分立法會議員指判決太重。時事評論員劉銳紹指案情涉及金額上前後有出入,反映證據唔夠;但11月24號朝早畀北京市高級人民法院駁返,當日朝早程翔嘅家人指法院無考慮一審判決喺證據、程序上嘅錯漏,發表公開信要求中國當局公開審理程翔嘅上訴案[10][11][12][13]。
2008年2月4號香港特首辦朝早收到港澳辦函件,話程翔喺獄中服刑態度良好,符合假釋條件,內地法院依法喺2月4號畀佢假釋出獄。特區政府於是派人喺廣州接佢,中午由廣州搭直通車返香港[15][16]。
中國外交部發言人劉建超話,程翔獲假釋係中國司法機關根據法律規定而做嘅決定,唔係行政部門決定[17][18]。
程翔返咗香港之後,無即時公開露面[19]。一路到2月21號,佢先開記者會[20],記者會上佢表示從來冇做過任何危害國家或損害國家利益嘅事,亦冇接觸任何機密文件,佢認為自己問心無愧。又話自己一生愛國,做間碟根本同佢理想背道而馳[21][22]。佢亦喺呢件事入面,覺得香港民主自由、崇尚法治、人道關懷係一樣值得驕傲嘅香港精神同核心價值[23]。
{{cite web}}
: CS1 maint: url-status (link)
{{cite web}}
: CS1 maint: url-status (link)
{{cite web}}
: CS1 maint: url-status (link)