葛玄

葛玄
葛仙吐火，明朝郭詡繪
東吳 道士
生	164年
死	244年
遞啲名
字	孝先
其他名	葛仙翁、葛仙公、太極左仙公、沖應真人、沖應孚佑真君

葛玄（粵拼：got3 jyun4；164年—244年），字孝先（haau3 sin1），琅琊人（而家山東），係東漢末年、三國時孫吳嘅有名道士，係左慈嘅徒弟。人稱葛仙翁（got3 sin1 jung1）、葛仙公（got3 sin1 gung1）。佢係《抱朴子》作者葛洪嘅從祖。

葛玄出身嘅葛家係官宦名門，七代祖葛艾封爲僮侯，阿爺葛矩係安平太守黃門郎，從祖葛彌係五郡嘅太守，老豆葛焉係州主簿、山陰令、散騎常侍大尚書。葛玄自細聰明好學，鍾意老莊學說，唔鍾意官宦仕途。十幾歲時覺得人生無常，於是專心學道。

三國初期，左慈來到葛玄住嘅江左，葛玄跟佢學道，傳授咗《太清》《九鼎》《金液》等丹經同埋《三元真一妙經》。後來葛玄將呢啲丹經傳畀弟子鄭隱，之後鄭隱傳畀葛洪。葛玄歡喜遊山玩水，遊歷過括蒼山、南嶽、羅浮山、閣皂山呢啲名山。喺道書中有講葛玄諸如辟穀，用符籙幫人驅病作法之類嘅事蹟。吳大帝孫權喜好道術，葛玄同佢交遊深得孫權器重，於是孫權幫佢起咗39間道觀^[1]。東晉後期傳說話，太極真人徐來勒向葛玄傳授咗靈寶經，之後葛玄傳畀鄭隱，鄭隱傳畀葛洪，再傳去葛巢甫，自此靈寶經通行於世。葛玄係靈寶經傳授嘅關鍵人物。

傳說佢成仙時，葛玄同弟子講明佢飛昇嘅日子，到咗嗰日，佢着齊衫入房，瞓低後就斷氣，但面色唔變，弟子燒香守住佢，守咗佢三日三夜。半夜時突然颳大風，聲大到似打雷。停咗風再點蠟燭，葛玄唔見咗，着嘅衫留喺床度，衫帶都無解開。第朝問隔籬屋，啲人話邊有打風呢，原來陣風只打喺屋內。傳說話佢成仙後證嘅位係太極左宮天機內相，所以稱呼佢葛仙翁。

陶弘景嘅《洞玄靈寶真靈位業圖》排列咗南梁以前道教神仙嘅神位，其中葛玄排喺第三左位，所以稱爲太極左仙公taai3 gik6 zo2 sin1 gung1。北宋徽宗封佢爲沖應真人（cung1 jing3 zan1 jan4），南宋理宗封佢爲沖應孚佑真君cung1 jing3 fu1 jau6 zan1 gwan1。道教靈寶派嘅閣皂宗奉葛玄做祖師爺。喺一啲道教流派中，葛玄同張道陵、許遜、薩守堅並列爲四大天師。

攷

1. 〈宗教文化〉。南京市政府。2015年5月23號。原著喺2016年3月4號歸檔。喺2016年6月24號搵到。

參攷資料

• 〈葛玄〉。蓬瀛仙館道教文化中心資料庫。2015年12月17號。喺2016年6月24號搵到。
• 陶弘景 (1988年)。〈吳太極左仙公葛公之碑〉. 《《道藏》》。文物出版社、上海書店、天津古籍出版社。
• 葛洪。〈卷八：葛玄傳〉. 《《神仙傳》》。