利蘭泰坦

  想搵後置引擎嘅利蘭泰坦嘅話，請睇利蘭泰坦 (B15)。

利蘭泰坦 Leyland Titan
利蘭泰坦TD1（1929年） 利蘭泰坦PD2/37（1963年）
製造廠	利蘭
邊道出	英格蘭Farington
取代咗	利蘭Leviathan
製造年份	1927年—1970年
後繼產品	利蘭Atlantean
主要對手	AEC Regent AEC Regent二型 AEC Regent三型 AEC Regent五型 Bristol G型 Bristol K型 Crossley Condor Crossley Mancunian Crossley DD42 丹拿CF6 丹拿CG6 丹拿CH6 丹拿CP6 丹拿CO系列 丹拿勝利型 丹尼士H型 丹尼士Lance 佳牌阿拉伯型 佳牌阿拉伯三型 佳牌阿拉伯四型 佳牌阿拉伯五型
規格
長	25呎、26呎、27呎、30呎
闊	7.5呎、8呎
引擎	利蘭汽油/柴油引擎
波箱	棍波/扭力轉換器/半自動波

利蘭泰坦（Leyland Titan）係英國利蘭出嘅前置引擎雙層巴士，1927年首次亮相。

戰前泰坦（TD系）

利蘭喺1926年請咗George John Rackham做總工程師，佢將喺美國做嘢期間嘅所見所聞，用嚟設計新嘅巴士底盤。其中一款新底盤利蘭泰坦TD1型，喺1927年亮相。底盤佈局同嗰時第二啲設計（包括利蘭本身嘅Leviathan雙層巴士）嘅最大分別，係引擎波箱互相緊貼，佢哋同傳動軸同埋尾軸嘅尾牙都安排喺底盤嘅偏左位置，令巴士嘅地台高度可以進一步降低。汽油引擎係六汽缸設計，有別於嗰時流行嘅四汽缸設計。利蘭亦同佢設計咗個Lowbridge雙層車身，上層右邊有一條凹落去嘅車廂通道，左邊係四人座椅。底盤車身加起嚟，全車高度低至13呎（連車頂），令巴士可以駛過英國國內唔少嘅鐵路橋底，服務更多地方。巴士全長25呎，軸距16呎半。

呢啲設計加埋令到利蘭泰坦顯得比同期巴士底盤先進。喺佢推出之後嗰幾年，多間車廠跟風推出類似設計，呢啲雙層巴士佈局去到1960年代尾至喺英國停用。1928年George John Rackham重返AEC之後，喺冇侵犯利蘭專利嘅情況下設計出相似嘅AEC Regent巴士底盤。利蘭泰坦同AEC Regent嘅競爭前後維持咗近四十年。

1931年中，利蘭由泰坦發展出佢嘅第一款無軌電車，型號係TBD1。冇耐之後利蘭推出專門嘅無軌電車設計，並取代TBD1。

1931年底，利蘭對泰坦作出首次改良，代號係TD2。佢同TD1最明顯分別係驅動軸裏面條傳動軸由半浮動式改成全浮動式，傳動軸唔使再承受車身重量。全車長度增加一呎至26呎，並改配較闊身嘅車胎，引擎容量大咗，真空輔助制動由單一伺服摩打改成分開三個，頭軸避震系統同TD1嘅前後反轉。有啲TD2試裝咗「扭力轉換器」，以代替滑動嚙合波箱。

1933年，利蘭泰坦TD3型推出，佢嘅引擎室同埋散熱水箱設計唔同咗，引擎波箱亦稍為移前，以增加下層車廂空間。滑動嚙合波箱嘅三波齒輪改用斜齒輪，令架車入三波嗰時冇咁嘈。亦係由TD3開始，泰坦可以選配柴油引擎，傳統波箱以外亦可以揀「扭力轉換器」，裝咗「扭力轉換器」嘅TD3，車型代號係TD3c。

利蘭喺1935年同1937年再對泰坦底盤稍作改良，代號分別係TD4/TD4c（真空輔助液壓制動）同埋TD5/TD5c（車陣設計有少少唔同）。

1939年，利蘭應伯明翰嘅要求，引擎開始嘗試以彈性形式固定喺車陣上面，真空輔助制動用返TD2同TD3嘅三個伺服摩打，軸距改短至16呎3吋。由於佢哋都係配「扭力轉換器」，所以被稱為TD6c。利蘭亦將呢啲設計應用喺16呎半軸距嘅泰坦之上，向伯明翰以外嘅公司推銷，叫做TD7或者TD7c。

第二次世界大戰爆發之後，利蘭泰坦嘅生產喺1940年暫停。呢啲未完成嘅泰坦（主要係TD7型），最終喺1941至1942年期間完成生產同埋付運，當中有啲係改配四汽缸引擎嘅消防車。另外喺戰事期間，曾經有計劃生產戰時規格嘅利蘭泰坦TD8型，不過由於政府決定有變，利蘭改為專注軍方訂單，冇出過一架TD8。而佳牌就喺泰坦TD8型嘅設計基礎上，喺1942至1946年生產戰時規格嘅佳牌阿拉伯型同埋後來嘅阿拉伯二型。

利蘭一推出泰坦TD系列，就開始嘗試將佢賣出口。泰坦TD系列除咗英國本土呢個主要市場之外，亦有賣去愛爾蘭、西班牙、南非、澳洲、紐西蘭、阿根廷等地。

利蘭Titanic

雖然George John Rackham並唔睇好三軸雙層巴士嘅前景，但利蘭都係喺1928年將Titanic巴士投產，佢同利蘭泰坦嘅分別只係佢有兩條驅動軸。Titanic跟隨泰坦嘅發展，由初頭嘅TT1型發展到TT5型，不過一如George John Rackham嘅預測，Titanic嘅銷售量有限。Titanic喺1939年停產。

戰後泰坦（PD系）

1945年二次大戰去到尾聲，利蘭重新推出泰坦巴士。利蘭泰坦並冇好似利蘭Tiger單層巴士噉樣喺戰後推出左軚版，而係由頭到尾都係得右軚。

PD1

經歷二次大戰之後，泰坦嘅設計同戰前嘅已經有好大分別，引擎係利蘭E181，直接上落車陣上面，波箱繼續係非同步嚙合，真空輔助制動有三個伺服摩打，軸距同戰前TD6c一樣係16呎3吋。呢款泰坦初時嘅代號係TD9，其後正名為PD1。PD1投產後冇耐，亦出現以下嘅變種：

• PD1A：葉片避震用咗Metalastik嘅橡膠杯士，增強咗架車嘅穩定性
• PD1/2：風式制動，係特別為保頓生產
• PD1/3：較闊身底盤，可以配8呎闊車身，供應畀得到交通部門批准用8呎闊巴士嘅公司

City Coach買入嘅泰坦PD1巴士，亦有被稱為PD1/1，不過呢個代號被認為係誤傳。

除咗有兩架泰坦PD1A係賣咗去葡萄牙里斯本之外，其餘都係留喺英國。

喺泰坦PD2推出之後，利蘭仍然繼續生產泰坦PD1系列，直到1951年出埋最後一批PD1A之後至停產。

OPD1

1946年，利蘭亦開始專門為海外市場設計出口版泰坦，型號代碼前面多咗個O字，即係Overseas（海外）噉解。第一款面世嘅OPD1型，採用二戰前面世嘅E166引擎，車陣物料嘅厚度等等有所加強，軸距亦長過PD1，有17呎半，可以配27呎半長嘅車身。利蘭亦出過葉片避震用咗Metalastik嘅橡膠杯士嘅OPD1A。

PD2

26呎版

1946年，利蘭出咗一架泰坦PD2樣辦車，冇耐PD2就正式投產。PD2嘅最大轉變係改用利蘭O.600引擎，而且係以彈性形式固定喺車陣上面。波箱由非同步嚙合改成同步嚙合，二波至四波有同步嚙合嘅設定。不過初時呢隻同步嚙合波箱唔多可靠，所以要出返非同步嚙合波箱頂住檔先。

• PD2/1：7呎半闊車身
• PD2/3：8呎闊車身
• PD2/4：8呎闊車身，風式制動
• PD2/5：8呎闊車身，風式制動，車陣遷就中門上落設計，係特別為黑池生產

雖然PD2係英國本土規格，但都有少部分賣咗去愛爾蘭、印度、錫蘭同埋南非等國。

27呎版

1950年，英國政府再將雙層巴士長度限制放寬至27呎，闊度亦全國性放寬至8呎，利蘭將泰坦PD2嘅軸距由16呎3吋加到16呎5吋。嗰時開始利蘭提供嘅PD2版本改為：

• PD2/10：7呎半闊車身
• PD2/12：8呎闊車身
• PD2/13：8呎闊車身、風式制動

其後利蘭亦出過以下嘅27呎PD2變種：

• PD2/9：規格同PD2/10相近，但車陣較低，車廂有凹陷嘅通道，令車身高度可以喺唔用Lowbridge車身設計之下整得矮啲。1953年特別為St Helens生產，作為AEC唔再向倫敦以外賣RT嘅代替品
• PD2/11：7呎半闊車身，改配風式制動同埋屬非標準裝備嘅Pneumocyclic半自動波箱。1954至1955年特別為列斯生產
• PD2/14：7呎半闊車身，先選式波箱，風式制動。1952年特別為列斯生產

利蘭曾經有一架8呎闊車身、風式制動同埋Pneumocyclic半自動波箱嘅PD2作為示範車，有指個型號叫PD2/15，但重未確實到。

1952年，英格蘭西密德蘭嘅Birmingham & Midland Motor Omnibus（BMMO，又叫Midland Red），喺1952至1953年引入100架特別改用屏蔽式水箱嘅泰坦PD2/12。其後利蘭亦開始將呢種設計向第二啲巴士公司推銷，初時供應嘅版本有：

• PD2/20：8呎闊車身、真空輔助制動
• PD2/21：8呎闊車身、風式制動
• PD2/22：7呎半闊車身、真空輔助制動
• PD2/23：7呎半闊車身、風式制動

PD2/9至PD2/23之中，有少部分賣咗去印度同埋塞拉利昂等國。

波箱選擇轉變

1955年，利蘭推出新系列PD2去取代原有嘅PD2/9至PD2/23。波箱選擇唔同咗，同步嚙合波箱嘅一波由直齒輪改埋用斜齒輪；Pneumocyclic半自動或者自動波係另一個標準選擇，用氣壓去控制。嗰時供應嘅版本改成：

• PD2/24：8呎闊車身、屏蔽式水箱、Pneumocyclic波箱、風式制動
• PD2/25：7呎半闊車身、屏蔽式水箱、Pneumocyclic波箱、風式制動
• PD2/27：8呎闊車身、屏蔽式水箱、同步嚙合波箱、風式制動
• PD2/28：7呎半闊車身、屏蔽式水箱、同步嚙合波箱、風式制動（唯一一副底盤喺1961年出廠）
• PD2/30：8呎闊車身、屏蔽式水箱、同步嚙合波箱、真空輔助制動
• PD2/31：7呎半闊車身、屏蔽式水箱、同步嚙合波箱、真空輔助制動
• PD2/34：8呎闊車身、暴露式水箱、Pneumocyclic波箱、風式制動
• PD2/37：8呎闊車身、暴露式水箱、同步嚙合波箱、風式制動
• PD2/38：7呎半闊車身、暴露式水箱、同步嚙合波箱、風式制動
• PD2/40：8呎闊車身、暴露式水箱、同步嚙合波箱、真空輔助制動
• PD2/41：7呎半闊車身、暴露式水箱、同步嚙合波箱、真空輔助制動

另一隻有得揀嘅版本係PD2/35（7呎半闊車身、暴露式水箱、Pneumocyclic波箱、風式制動），但係冇生產過。

1960年，PD2可以揀St Helens式玻璃纖維引擎室連屏蔽式水箱，型號多咗個A字，成為PD2A/24、PD2A/27、PD2A/30同埋PD2A/31。

1962年，7呎半闊車身嘅PD2停產。不過喺1965年，利蘭為Warrington出咗一批闊7呎半嘅泰坦，車型代號係PD2/40Sp。

1965年，真空輔助制動嘅PD2停產。

PD2/24至PD2/41之中，有少部分賣咗去印度同埋塞拉利昂。

最後期

1967年PD2引入多個新組件，包括風式制動改為雙風路設計，Pneumocyclic波箱亦經過改良。嗰時開始利蘭提供嘅PD2版本改為：

• PD2A/44：PD2/24嘅改良版
• PD2/47：PD2/27嘅改良版
• PD2A/54：PD2/34嘅改良版
• PD2/57：PD2/37嘅改良版

不過嗰時PD2嘅需求已經好低，得PD2/47係有實物出現過。

OPD2

1947年，利蘭亦喺出口版泰坦改配O.600引擎，型號係OPD2，隨即取代咗OPD1。初時嘅選擇有：

• OPD2/1：真空輔助制動
• OPD2/2：風式制動

到1950年代中，OPD2嘅一啲機械配搭跟隨PD2轉變，選擇改變成：

• OPD2/6：屏蔽式水箱、同步嚙合波箱、風式制動
• OPD2/7：屏蔽式水箱、Pneumocyclic波箱、風式制動
• OPD2/9：暴露式水箱、Pneumocyclic波箱、風式制動
• OPD2/10：暴露式水箱、同步嚙合波箱、風式制動

利蘭喺1960年代中期仍然有提供泰坦OPD2嘅選擇。

喺1949至1950年，有30架泰坦OPD2/1冇被運出口，6架去咗Yorkshire Woollen，24架去咗Potteries Motor Traction，由於佢哋長得滯，佢哋都係配單層車身。Potteries Motor Traction嗰24架行咗幾年之後，先後重建成雙層。

6RT、7RT

二次大戰之後，英國各間巴士公司趕住要淘汰過嗮設計壽命嘅巴士。由於倫敦運輸局嘅首選供應商AEC應付唔切倫敦嘅需求，所以利蘭都要幫手出。利蘭為倫敦運輸局出嘅戰後版泰坦都係特別版，雖然同同期PD2系列一樣全長26呎，但有唔少設計都係跟隨AEC出產嘅RT型，包括PD2冇用過嘅16呎4吋軸距、較低嘅引擎蓋、先選式波箱、風式制動等等。其中1,631架係7呎半闊，可以同四千幾架RT互換車身，1947至1954年出；另外500架係8呎闊，係倫敦運輸局第一款自主引入嘅8呎闊巴士，1947至1950年出。

利蘭初時將佢哋納入OPD2系列，但其後改為跟隨倫敦運輸局嘅車型編制，叫做6RT（8呎闊）同埋7RT（7呎半闊）。

PD3

1956年，英國政府再將雙層巴士長度限制放寬至30呎，利蘭推出18呎半軸距嘅泰坦PD3嚟應市，引擎波箱配搭同同期嘅PD2/24至PD2/41一樣。泰坦PD3起初有嘅版本包括：

• PD3/1：屏蔽式水箱、同步嚙合波箱、風式制動
• PD3/2：屏蔽式水箱、Pneumocyclic半自動或自動波、風式制動
• PD3/3：屏蔽式水箱、同步嚙合波箱、真空輔助制動
• PD3/4：暴露式水箱、同步嚙合波箱、風式制動
• PD3/5：暴露式水箱、Pneumocyclic半自動或自動波、風式制動
• PD3/6：暴露式水箱、同步嚙合波箱、真空輔助制動

佢哋都係設計採用8呎闊車身。

1960年，PD3可以揀St Helens式玻璃纖維引擎室連屏蔽式水箱，型號多咗個A字，成為PD3A/1、PD3A/2同埋PD3A/3。

1965年，真空輔助制動嘅PD3停產。

1967年PD3同PD2一樣引入多個新組件，包括雙風路嘅風式制動同埋改良型Pneumocyclic波箱，版本包括：

• PD3/11：PD3/1嘅改良版
• PD3A/12：PD3/2嘅改良版
• PD3/14：PD3/4嘅改良版
• PD3A/15：PD3/5嘅改良版

PD3除英國本土以外，亦有賣去愛爾蘭、印度、巴基斯坦、南非、毛厘士同印尼等國。到1960年代尾，利蘭索性運泰坦PD3/SPL底盤散件去印度畀Ashok Leyland裝嵌，供應南亞市場。

停產

英國政府喺1966年將一人控制嘅雙層巴士合法化，並且由1968年開始資助巴士公司買後置引擎巴士，令前置引擎巴士喺英國本土被淘汰。英國最後一架利蘭泰坦喺1969年交貨，但利蘭喺1970年再出多一批泰坦畀印度。

之後，利蘭屬下嘅Ashok Leyland公司喺印度出利蘭泰坦，個名改叫Ashok Leyland Titan，供應南亞市場。