堅尼地城

堅尼地城（粵拼：gin1 nei4 dei6 sing4，英文：Kennedy Town），以前寫堅彌地城^{[註 1]}，簡稱堅尼地或堅城，係喺香港香港島西環最西面嘅地方，行政上歸中西區。

堅尼地城因為喺維多利亞城四環九約嘅西環裏面，所以亦都係維城一部份。皆因響西環最尾嘅部份，所以又叫西環尾。

歷史

堅尼地城以第7任香港總督堅尼地命名，佢喺1872年至1877年管治香港。

堅尼地城東面係石塘嘴，南面近薄扶林，西面係摩星嶺，呢處有馬路上去山或者去大口灣，沙灣同薄扶林，再出啲已經係海，而北面就係維多利亞港嘅西端，可以望到九龍西部。向西北望有青洲同小青洲兩個島。

雖然佢嘅氣候同香港其他地區差唔多，冬天一般嚟講都冇新界咁凍，但係因為佢嚮正港島嘅北部，對住海之餘，北面又冇乜嘢擋住，所以冬天一有偏北嘅季候風就食到正。

由於嗰區比較早開始發展，而家入面重有好多唐樓同其他舊樓，好多樓齡都有成40年以上，其中觀龍樓亦都係喺呢區。不過，隨住啲舊樓慢慢咁拆，近年都有一啲新樓例如泓都入伙。

同時，因為港鐵起港島綫西延，嗰區有好大轉變，例如有啲樓要就番地鐵啲工程要拆，入面個泳池都因為咁而要拆，不過地鐵公司就話佢地會搵個地方起好咗個新嘅，先至拆舊嗰個。另外亦有人話地下鐵通車會帶旺嗰區。

另外，嗰區嘅最西端有個殮房同埋一個荒廢咗嘅屠房。

嗰區因為響市區邊邊，所以有電車同埋好多條巴士綫嘅總站，亦都有唔少小巴去九龍同埋香港島其他地方。雖然嗰度啲車開得都算幾密，但係佢人口密度都算高，喺繁忙時間搭車可能都會有啲難、有啲慢。

香港行政會議喺2005年6月通過地鐵開始規劃起港島綫西延，條綫由上環向西伸延，經西營盤同大學去到堅尼地城，西港島綫堅尼地城站經已喺2014年12月28號通車。