小西灣
想搵香港區議會選區嘅話，請睇小西灣 (選區)。
小西灣，本名柴灣仔，亦叫小柴灣，係香港一地，亦喺一灣，響柴灣東面。灣已填，化身新興嘅住宅區，人口約莫七萬。行政上歸東區。
名
[編輯]原名柴灣仔，皆因地近柴灣。英文柴灣初時唔寫做 Chai Wan，或口音，或誤聽，寫做 Sai Wan。柴灣仔就半音半意，繙成 Little Sai Wan。及後師爺不明所以，將佢倒繙做小柴灣、小西灣。師爺再倒轉返英文，今英文寫 Siu Sai Wan。
地理
[編輯]小西灣喺柴灣一帶，範圍包括永泰道以東嘅地方。喺未填海之前，小西灣係柴灣東邊嘅灣仔。
史
[編輯]小西灣一帶原本係英國情報中心。1947年，英國同埋美國、澳洲、加拿大、新西蘭簽署聯合收集情報嘅協議。因此，英軍喺小西灣起咗成個遠東最大規模嘅情報中心，監聽中國無線電通訊。到咗1980年代，香港將會鐵定會交畀中華人民共和國，英軍就將成個情報中心拆到渣都無淨。
去到1980年代，因為要起地下鐵路，柴灣市區嘅徙置大廈要拆，政府為咗安置呢班居民，加上應付日益膨漲嘅市區人口，所以決定開發小西灣。當時政府見小西灣個小西會令人諗起屌屄兩個性器官兼粗口字，唔係咁好聽，所以建議過改名做小柴灣，但因為當地居民反對，所以幾年後小西灣邨落成，將個名改返做小西灣。但係家下香港的士同業都採用佢嘅諧音做呢個地區嘅暗語。
小西灣由於好近鯉魚門，環境極佳，所以政府就喺當地起居屋來賣，樓盤包括富景花園、富怡花園同富欣花園等。而對海皮一塊地，更加引到大型地產發展商信和置業來投，喺1997年佢用咗118億港紙投到，起咗豪宅藍灣半島。而該地價就創下香港最高賣地成交價，直到2017年由龍光地產同埋合景泰富一齊用168.6億港紙投到鴨脷洲利南道地皮，記錄先至打破[1]。
社區設施
[編輯]
教育
[編輯]小西灣有多間中小學校，中學有中華基金中學、漢華中學、福建中學 (小西灣)、衛理中學同嶺南衡怡紀念中學，而小學就有培僑小學。
交通
[編輯]
藍灣半島起好，小西灣越來越多人住，新巴同城巴兩間巴士公司將唔少原本以柴灣東為總站嘅巴士線，加長到小西灣，總站重搬到小西灣邨同埋藍灣半島兩個大巴士總站。
政府曾建議地下鐵路研究將港島綫從柴灣延伸入小西灣，但由於路線太過兜轉，地鐵公司唔受。地鐵亦研究過用輕便鐵路將小西灣同柴灣連埋，但係造價同融資好多問題搞到不了了之。
住宅
[編輯]- 小西灣邨：小西灣第一個公共屋邨，喺1989年至1993年分3期落成。有瑞喜樓、瑞樂樓、瑞強樓等。
- 曉翠苑：居者有其屋屋苑。有2座住宅，一個多層停車場。
- 佳翠苑：居者有其屋屋苑。有2座住宅，一個多層停車場。
- 富景花園：私人參建居屋屋苑。有11座住宅，一個2層商場同停車場。
- 富怡花園：私人參建居屋屋苑。有5座住宅，一個10層停車場，頂層係球場。
- 富欣花園：私人參建居屋屋苑。有8座住宅，一個4層停車場同一個1層商場。
- 藍灣半島：由信和集團起，喺2001年起好，一共有8座樓高62層嘅住宅，地下設有商場藍灣廣場同公共交通交匯處。
主要交通幹道
[編輯]公共交通
[編輯]小西灣有好多巴士同小巴綫，而且唔少重過隧道過埋維多利亞港，甚至遠到赤鱲角機場都有。近嘅會駁去柴灣站。