情景計劃

2018 年有班軍人喺度思考打仗用嘅策略：喺嚟緊呢場行動入面，每個單位會點郁？會形成點樣嘅情景呢？

情景計劃（粵拼：cing4 ging2 gai3 waak6）係一套做策略計劃嘅方法：簡化講，情景計劃旨在喺腦海入面建立「情景」－想像「跟住落嚟會變成噉嘅情景」或者「如果採取咗噉嘅行動，情景會變成噉」等嘅嘢，並且按呢樣資訊做決策[1]。

情景計劃源自廿世紀中後期嘅管理學研究：管理學呢門學問成日都會關注「一間企業嘅管理層要點制定營商策略？」噉嘅問題；有唔少管理學者都致力對呢類問題做研究，會嘗試提出一啲思考方法，畀管理者用嚟諗策略同度策略；情景計劃就係一套噉嘅方案，提出咗最基本 10 個步驟，用嚟引導管理者做策略上嘅決定[1]。

自從 2000 年代起，情景計劃就吸引咗唔少管理工作者注意，呢啲工作者仲會喺福布斯（Forbes）等嘅著名商業出版物度撰文，詳細啲噉針啲細節，即係例如「有咩方法，能夠更有效噉評估一個情景發生嘅機率」噉嘅問題[2]。

基本定位

[編輯]
内文：策略思考、策略計劃同決策
睇埋：整體主義同複雜性

情景計劃係一套諗策略同度策略嘅方法：情景計劃源自廿世紀中後期嘅管理學研究；喺 1995 年有管理學者撰文提出，現實世界極之複雜，所以企業做營商策略方面嘅決策嗰陣，唔可以（好似打前嗰啲諗策略方法噉）成日淨係齋靠分析一兩個因素，而係要整體性噉思考周圍世界嘅變遷；於是佢就提出咗情景計劃嘅概念，用以下呢句嘢概括情景計劃個基本諗頭[1]:p. 4 [註 1]－

（粵文翻譯）情景計劃將一大拃嘅數據簡化做數量有限嘅若干個可能狀態。

－現實世界好複雜，有好多變數，諗策略嘅人好多時唔能夠所有嘅可能情況（得 3 個變數，每個變數有 10 個可能數值，噉可能情況嘅數量已經有成 10 × 10 × 10 咁多個[3]）；所以一個可能嘅做法就係，將咁多唔同嘅可能性簡化噉諗做幾個「最主要嘅可能情況」（例如可能數值 1、可能數值 2 同可能數值 3 差唔多，所以結合當做一個情況噉嚟諗），並且按呢啲可能情況嚟做策略上嘅決策[1]:p. 4。

建構情景

[編輯]
1903 年萊特兄弟做試飛嘅相；單嘢證實咗開爾文男爵做嘅預測係錯誤嘅－經驗表明，未來不嬲都好難預測。
内文：未來、想像同電腦模擬

「飛行機械冇可能重過空氣。」[註 2]

－開爾文男爵（Baron Kelvin），1895 年

萊特兄弟喺 1900 年代做試飛，證實咗開爾文男爵講嗰句嘢係錯誤嘅[4]。

要做情景計劃，第一步就係要建構情景（scenario），而呢點必然會或多或少噉涉及預測「未來會發生乜事」。預測未來呢家嘢出嗮名撈絞，所以提倡情景計劃嘅管理學工作者有對「情景要點建構，先可以有咁準得咁準噉預測到未來」呢點作出詳細嘅思考[1]:p. 5-7。

  1. 要建構情景，首先要定義套計劃嘅「要有幾長遠」：例如想像家陣有間企業嘅管理層，佢哋要制定間企業嚟緊 10 年要採取嘅計劃，噉佢哋建構嘅情景就要諗到跟住落嚟嗰 10 年嘅變化；一般嚟講，商業上做情景計劃，頂攏淨係會諗未來嗰幾年嘅變化[5]，因為過往經驗表明未來好難預測，要預測超過 10 之後嘅變化，可以話冇可能咁滯[6]。
  2. 跟住思考者要諗吓成件事「涉及邊啲利益相關者（stakeholder）」：即係成件事會影響邊啲人嘅利益；例如假想而家間上市公司想制定未來 5 年嘅計劃，計劃「要研發咩產品」等嘅行動，噉間公司嘅員工同股東嘅利益都有可能會受影響。
  3. 睇吓啲重要變數嘅趨勢：世界有成千上萬個變數，但思考者通常可以憑經驗知「邊啲變數零舍重要（重要係指能夠對利益相關者嘅利益造成影響）」，然後思考者就要估計呢啲變數跟住落嚟會點變化；舉個簡單例子，想像家陣有間公司，佢哋度緊嚟緊幾年要研發嘅產品，佢哋發覺打前嗰幾年政府一路立法想減低啲人嘅碳腳印，於是就揼本做研發嗰陣研究埋「點樣減少隻產品嘅碳腳印」[2]。有關趨勢呢家嘢要點處理，可以睇埋插值同外推嘅概念。
  4. 搵出不確定性：即係要知「有邊啲重要嘅變數唔確定」。
  5. 郁手建構情景：一般認為，思考者一開始可以試吓諗最好同最壞嘅情況係點，即係想像「如果啲重要變數冚唪唥都向對自己有利嘅方向郁，會係點嘅世界」（極正面），跟住再想像「如果啲重要變數冚唪唥都向對自己不利嘅方向郁，會係點嘅世界」（極負面）。
  6. 估計發生機率：每個情景，估計吓個情景有幾大機率會發生。
  7. 搵出啲共通點：攞住啲可能性高嘅情景，諗吓佢哋之間有啲咩共通點。
  8. 有冇研究要做：諗吓有邊啲嘢需要做研究，例如如果對市場形勢不確定性大嘅話，就可能要安排資源做市場調查。
  9. 建立數學模型：有管理學者主張，如果可以嘅話，最理想係要睇吓可唔可以用精確嘅數學模型做預測。可以睇埋電腦模擬嘅嘢。
  10. 做決策

要留意嘅係，要跟上述嘅步驟做計劃，需要咁上下專業知識或者經驗－例如決策者要憑知識經驗知「根據歷史，邊啲趨勢係成日發生嘅」或者「咩情景發生嘅機率高」呀噉。有唔少管理學者仲想做進一步嘅研究，想解答「點樣先可以有效噉用電腦模擬做預測，用模擬結果幫手做情景計劃？」噉嘅問題[1]。

睇埋

[編輯]

文獻

[編輯]

英文文獻：

  • Doval, E. (2010). A model of planning process by using scenarios in strategic management. Journal of Applied Economic Sciences (JAES), (14), 317-323.
  • Godet, M. (1990). Integration of scenarios and strategic management: using relevant, consistent and likely scenarios. Futures, 22(7), 730-739.
  • Godet, M. (2000). The art of scenarios and strategic planning: tools and pitfalls. Technological forecasting and social change, 65(1), 3-22.
  • Schoemaker, P. J. (1995). Scenario planning: a tool for strategic thinking (PDF). Sloan management review, 36(2), 25-50.
  • Wright, G., & Cairns, G. (2011). Scenario thinking: Practical approaches to the future. Springer.

註釋

[編輯]
  1. ↑ 原版英文："Scenario planning simplifies the avalanche of data into a limited number of possible states."
  2. ↑ 原版英文："Heavier-than-air flying machines are impossible."

引咗

[編輯]
  1. ↑ 1.0 1.1 1.2 1.3 1.4 1.5 Schoemaker, P. J. (1995). Scenario planning: a tool for strategic thinking 互聯網檔案館嘅歸檔，歸檔日期2022年1月21號，. (PDF). Sloan management review, 36(2), 25-50.
  2. ↑ 2.0 2.1 Scenario Planning and Strategic Forecasting. Forbes.
  3. ↑ Schwartz, P. (1996). The art of the long view: paths to strategic insight for yourself and your company. Currency.
  4. ↑ 10 impossibilities conquered by science. New Scientist.
  5. ↑ A step-by-step Guide to Scenario Planning. Professional Academy.
  6. ↑ Ania G. Wieckowski (2018). Predicting the Future. Harvard Business Review.

拎=

[編輯]