新界六日戰

香港總督接收新界公告

輔政司駱克喺憲報公告接收新界事宜

新界六日戰（The Six-Day War of 1899）係香港一戰，嗰時係一八九九年四月。原因係英國接收新界，前景不明而恐慌，以屏山鄧氏爲首嘅大族，反抗英國軍隊接收。參戰新界鄉民死傷慘重，約有五百名香港人被殺^[1]，英軍僅一人輕傷。戰後雙方速速和解，以後香港政府新聞封鎖，有份參戰嘅大族又保持低調，甚至遺忘呢次戰爭。而當時新聞紙只係輕輕帶過，導致日後記載嘅呢段歷史變得好含糊^[1]。

並唔係新界各鄉各約都參戰，有啲反對不參與，有啲約只係受脅而參戰，有啲只係半推半就。現知參戰喺屏山、廈村、十八鄉、錦田、大埔咁幾個鄉約，鄧氏亦招咗東莞雁田同懷德同族來參戰。其時香港政府錯估民情，初頭只派警察同少少軍隊，支援不足，軍士曾陷險境，戰事拖延六日。六日之中，主要戰地有大埔、林村凹同上村。香港政府接收其他地方，相安無事，並無反坑。戰中鄉勇戰術十分之好，不過由於兵器落後，不易毁傷英軍。

參戰鄉民

打仗主要來自屏山、廈村、十八鄉、錦田、大埔七約。大埔七約中，以泰坑同林村爲主，加部份粉嶺。泰坑卽今泰亨。廈村鄧氏，招咗雁田同族。而屏山鄧氏，招咗懷德同族。兩處都喺東莞內。戰死者以多數係屏山、廈村、十八鄉同錦田人。

大埔七約同大埔頭鄧氏、龍躍頭鄧氏敵對，兩支鄧氏唔參加戰事。其他大鄉，好似上水、金錢、河上鄉、新田、丙崗，都無參戰。新界東同南各鄉各約，全不涉戰。

新界概況

喺英國收新界之前，新界係新安縣地，縣治喺南頭，同新界隔個後海，縣丞駐城內。考試做官，都係喺度考。而大清駐軍喺大鵬，同新界隔個大鵬灣。新界中部，有山脈隔阻，脈有大帽山、金山、獅子山、飛鵞山等山。無論南北，只有小路，並不行車。廣東官員，並無興趣呢個邊陲小地。官兵力有不逮，鄉民會組憲練團自衞，此爲半官方制。員稱鄉勇，服似官兵，不過心口寫壯勇二字。香港城同山北，來往唔多。山南反而密切，就近九龍半島，同香港城只係一水之隔，掉艇可過。山北路不通行，民風保守，視英人爲蠻夷。有啲讀書人恐怕變蠻夷，擔心英人管治，會移風易俗。

地權方面，分爲地骨同地皮。地骨通常係大地主所有，係永久嘅。而地皮卽係租戶同大地主租地，地皮可以一代傳一代。租戶就叫佃人。地主有權要佃人交地所出。大清政府地稅係向地主收，耕幾多地計。不過耕地往往報細數，地主收，遠多於地稅。而且政府後期亦無力施行，當地幾乎係自己顧自己。

佃人要聽地主話。唔聽話，地主會有人對付。不過佃人嘅村一大，後生就組團防衞，而啲佃村，亦會組成約，共同防衞。新界中部同東部，地主經已話唔到事，地主或者只可以收到租。大族如屏山、廈村，重可以喺近村話到事。不過同近嘅大村會獨立，由佃轉爲朋，但尚會聽地主講。

地主同佃農關係有變，而地亦不支人口，唔够嘢食，故此衝突頻起。村同村械鬥，係家常便飯。一八五五年到一八八零年，械鬥有成卅次。

因爲咁，屏山發起戰事，只有少數鄉肯支持。有啲會擔心元朗大族，卽屏山、廈村，會趁火打劫。大埔七約，唔係個個約都支持，況且只係打咗頭一日，就無打。

新界南部，包括今日新九龍地方，同香港城關係密切。深水埗同九龍城有埗頭，住來香港城，供香港城所需。此地各鄉，亦無參加戰事。

戰前

一八九八年六月九號，英國同大清簽訂租約，名《展拓香港界址專條》，六月九號換約確定。由一八九八年七月一號起，深圳河以南之地嘅新安縣地，都歸入英國。

按當時國際法，要有明顯儀式，接掌方爲正式接掌。但香港政府並唔急於接管，等到一八九九年四月先正式接手。皆因事前要瞭解清楚。

接收新界之事，由香港政府輔政司駱克負責。一八九八年六月，英國派駱克實地調查。八月到新界，月底調查好。調查時都廣受歡迎，唯一例外係錦田，嗰處佢畀人擲石。查完去英國，喺船上寫咗《香港殖民地展拓界址報告書》，減筆《駱克報告》。報告詳述新界，建議統治方針，盡量維持現狀，卽係在類似大清嘅方式管治。雖然香港政府方針如此，但無同鄉民解釋清楚，鄉民擔心會改習俗，加稅，會跟香港城嘅規舉。

勘界事宜，駱克同大清官員王傳善，一齊決定。到一八九八年十一月成。

呢段期間，香港政府同當地人多次往來，但遲遲未有公佈點樣接管，就引起種種謠言恐慌。尤其係涉及大族風水及土地利益，就醞釀恐慌及反抗情緒，有啲多次去香港政府度見面，有啲準備武力反抗。

香港總督卜力，遲至一八九九年四月七號到九號，先至公佈接收詳情，各村張貼，咁經已太遲，反抗軍已如箭在弦。香港政府以爲就咁公告，就唔會有亂事。

屏山鄧族最先招集各鄉各約話事人開會。廈村鄧族加入。十八鄉因怯於大族勢力，若不加入，就遭報復，不得𣎴加入。其他族多以半推半就，因爲怕鄧族起氏期間，會乘機侵擾，所以只係會任由鄉人參加，另一方面防避。

屏山內部，同香港政府傾開，反對起事嘅人畀人軟禁。有啲遭殺害。

前奏

一八九八年十月，差人頭梅，調查時知道到鄉民籌咗十萬圓。但佢認爲筆錢唔係抗英，而係打賊。當時三合會橫行，兼且新安北地等地Chung Shui Yeung橫行。及後兩廣總督，話新界亂事，係呢啲人有份搞出來。

一八九九年三月初，駱克檄諭新界居民，呈驗土地印契。傳有加稅之說。

期間香港政府決定喺運頭角山升旗接收，準備四月十七號升旗，正式接收新界。

三月廿七號差人頭梅，帶工人起草棚做差館。

三月廿八號，唐曆二月十七日，梅同屏山商討起警署，屏山父老反對。喺達德公所，召集代表開會反抗接收。

三月廿九號，喺各村張貼抗英揭貼。

四月一號，屏山鄧氏、廈村鄧氏召各大族喺元朗開會。同會有新田文氏、泰坑文氏、何上鄉侯氏、丙崗侯氏、上水廖氏、粉嶺彭氏、大埔頭鄧氏、龍躍頭鄧氏。除咗屏山同廈村，各族都質疑反抗接收。上水廖雲谷之後話，上水、丙崗、新田、大埔頭，都唔會參加。屏山囘話，唔參加就佢燒村。唔參加嘅大族，就喺上水周王二公書院開會，決定只捐錢，但唔參戰，志願者，亦唔會阻。做兩手準備，自己團練守鄉，穀留本鄉，以防屏山人打過來。同日，香港政府得知，新界有四處散佈抵抗接收嘅事。

四月二號，香港總督去省城會兩廣總督，否認有煽動，並願意向鄉民解釋，亦派兵保護場地。

四月三號，當時差人頭梅負責此事，坐軍艦到太和市，連同九龍寨城清兵五、鍚克差人四，連通事一，入文武廟。大埔七約鄉民話草棚壞風水，話要拆。而梅謂問過泮涌，附近唯一一村，無風水問題，所以唔會搬。鄉民擲嘢抗議，梅退山上。由於知道會出事，佢命人囘香港通報，自己留守。夜間果有百幾人上燒棚。梅預先轉地方，觀事後，由路徹去沙田囘香港。香港總督得此事，卽刻派輔政司駱克，總司令加士居亦陪同，帶兵一百廿五齊往文武廟。

四月四號駱克、加士居朝抵步。佢哋得知梅安全，棚已燒。返港後，加士居認爲，此舉足壓得鄉民，一切如期。村民後尾道歉了事。事實此事亦打亂部署，因爲東莞鄉勇未到新界。因爲道咗歉，四月九號由元朗來，打算支援嘅鄉勇亦退囘。

四月五號，兩廣總督府所頒之曉諭告示，駱克喺新界各村張貼。

四月七號到九號，香港總督請人到各村貼公告，解釋事宜，安撫鄉民。當中提到四月十七號，唐曆三月初八升旗。貼者都受威脅，當中有個畀人殺死。

四月十號，三月初一，鄉勇喺元朗太平公局設司令部。又喺屏山覲廷書室，設祕密參謀。

四月十二號，大清廣東大鵬協右營守備方儒，率水師抵青山灣，向村民曉諭，順從接收，之但係無效而回。駱克喺屏山，接見各父老，要求簽交請願書。同日，屏山威脅十八鄉，如果十八鄉唔參加，就燒佢村，就有錢人唔捐錢，就搵人打劫。錦田亦受過類似威脅。

戰事

原定元朗鄉勇打算四月十七號升旗先起事，不過大埔鄉民無跟咁做。

四月十四號，大埔鄉勇提早開戰。同日，香港政府又得知，場地又有危險。派梅到大埔，到時棚已燒，對面山上，有礮打，有打鑼打鼓。喺文武廟，廟祝叫佢快啲走，以免畀人殺，亦得知工人亦安全，陸路返港。梅由陸路退到沙田，過飛鵞山，過九龍，到香港。燒棚嘅都係同一班人，主要係大埔七約中，泰坑同林村人，亦有啲粉嶺人。起事時，亦有錦田人同八鄉人。大埔南部嘅翕和約，縱然受威脅，堅拒參與戰事。幸好英軍之後及時由沙田入到大埔支援，村民無受到報復。

四月十五號，梅帶差人，兵頭帶百兵，由沙田到大埔，希望用軍容鎮住鄉民。不過鄉勇礮擊英軍，派人到沙田，希望得有人增援。由於防守只有差人同些少軍隊，彈藥不足，爲防突襲，並無反擊。苦等英軍支援。直至戰艦駛入大埔海，礮擊礮臺，防守始解。鄉勇亦經梅樹坑，全團帶礮退至林村谷地。由留低嘅旗所示，爲泰坑文氏所領。

四月十六號，三月初六，香港政府增兵大埔，提前一日正式接收，舉行原定儀式。儀式嘅旗係絲做，推斷係支持香港政府嘅鄉民所贈。同日，香港總督，簡簡單單喺九龍城外升旗。有情報話會有人喺九龍油蔴地搞事，進攻油蔴地差館。加強防衞，但平安無事。

期間，喺九龍凹、沙田凹同馬窩山頂設汛。四月十七號，拉好綫做戰地電話。

英軍入林村谷地時，鄉勇亦準備伏擊英軍，喺林村凹設礮臺。英軍實在支援不足，雖有大礮，但由於太重，又無動物搬運，只靠苦力，進展困難。加上大雨，根本無計搬上林村凹。

四月十七號，三月初七，鄉勇炮撃英軍，英軍有一軍醫受傷。英軍派啹喀兵突擊，啹喀行山如平地，繞路去礮臺後山，突入礮臺。由於鄉勇無諗過地勢險要，會有軍由山攻入，慌張撤向錦田。由於太急，未有帶走全部礮，埋於土，埋於水。

英軍進而落上村附近駐紥，此時人困疲乏，糧草不足。然英軍不敢問鄉民取食，以免誤以爲擾民，危及軍隊。此時另一支英軍，北上粉嶺，轉入八鄉支援，及時解困。來時，途經泰坑、粉嶺，逐村受降。

四月十八號，鄉勇同英軍喺石頭圍東北，隔河對陣，鄉勇向英軍進攻，英軍爲免傷亡，唔停礮擊鄉勇，此處鄉勇大有傷亡。此爲最後一仗，鄉勇撤退。

四月十九號，因爲駱克十分擔心十二號會面嘅長老，是否安全。英軍急行入屏山，沿途八鄉、錦田、屏山、廈村，逐村受降。英軍向東而進。吉慶圍、泰康圍鐵閘畀英軍拆走做戰利品。另有英軍分三路屯門、後海、荃灣入元朗，亂事平定。喺錦田，村民自行送食物，慰勞英軍。

戰後

吉慶圍鐵閘

由於鄉勇組織良好，香港政府懷疑亂事係由新安縣官員搞鬼，因而趕走九龍寨城官員，亦一度佔領深圳墟。

輔政司駱克主張罰人，但香港總督卜力不允，認爲要寬大處理此事。香港政府如市區一樣，以士紳代管唐人，所亦好快接受香港政府管治，猶如新安時一樣。日後東莞人想喺香港再起事，並不得到鄉民支持，無疾而終。

吉慶圍、泰康圍鐵閘，駱克畀咗港督卜力，樹於其英國別墅。

香港政府加強管治，喺屏山、凹頭、大埔運頭角設差館。大埔差館喺一九零零年落成。

戰死鄉民有公墓，葬於沙埔。

香港政府接收新界後，大族終要面對現實，同細族平起平坐，唔再係地主佃人，無地主支配佃人呢囘事。

一九二五年，鄧伯裘向香港總督司徒拔請求，發還吉慶圍鐵門。總督應允，香港政府全資由英國尋囘安裝，督憲親臨奠基。鄧氏亦立碑紀念。

溯我鄧族符協祖，爲鄧漢黻公曾孫，自宋崇寧間由江右宦遊到粵，卜居是鄉之南北兩圍。後因子孫繁衍，於明成化時，設立吉慶圍、泰康圍，分居斯土。兩圍四周，均深溝高壘，復加連環鐵門。想前人立意，實欲鞏固吾圍，以防禦雀符耳。迨前清光緒己亥，清政府將深圳河之南隅與英國，斯時，清政府未將明令先行頒佈，故當英軍到時，各鄉無知者，受人煽惑，起而抗拒。我圍人民恐受騷擾，堅閉鐵閘以避之；而英軍疑有莠民藏匿在其間，遂將鐵門攻破，入圍時方知皆良民婦女，故無薄待情事，姑將兩圍鐵門繳去。現二十六傳孫伯裘代表本圍人眾，稟呈港府，蒙轉達英京，將鐵門發還，照舊安設，以保治安。所有費用，由政府支銷，又蒙史督憲親臨敝村，作奠基禮。足見英政府深仁大德，亦爲表揚吾民對英政府之誠心悅服耳。特銘之於碑，以誌不忘云爾。民國十四年乙丑年閏四月初五泐

評價轉變

英國得到新界後，新九龍以外嘅鄉民，叫新界原居民。香港政府，以懷柔政策爲主。所以無論鄉民定政府，都唔願提及此事，就算發還吉慶圍鐵門一事，錦田鄧氏，亦只謂鄉民無知，受人煽惑。臨近一九九七年七月一號，香港易手，交畀中國，新界原居民重建身份，以愛國自居。當年新界六日戰，重提舊事，講成係愛國戰爭，反抗英國入侵中國。

攷

1. Hase, Patrick H. The Six-Day War of 1899: Hong Kong in the Age of Imperialism. Hong Kong: Hong Kong University Press. 2008. ISBN 9789622098992