林百欣
林百欣（1914年12月21號—2005年2月18號），係香港生意人，麗新集團創辦人，人稱「林伯」，亦係「潮汕四寶」其中之一（另外三位係陳偉南、饒宗頤、莊世平）。
生平
[編輯]林百欣1914年喺廣東潮陽出世，出身富裕，老豆林獻之係開銀行嘅。1931年，林百欣跟埋老豆嚟香港，喺民生書院讀書。1935年，21歲嘅佢畀老豆叫佢返去鄉下嘅佳成銀行做後生。1937年佢經澳門再嚟到香港創業。1945年，林百欣同老婆喺深水埗開咗成福針織廠，再喺兩年之後成立麗新製衣。
1970年，麗新開始涉足地產，初時係起工廠大廈，後來連住宅同商廈都有。
1988年，林百欣嘅麗新同鄭裕彤嘅新世界聯手入主亞洲電視，到2002年，麗新將亞視賣畀劉長樂同陳永棋等人。
1997年，林百欣因為涉嫌貪污，畀台灣當局拉咗。到1999年，林百欣畀法院判貪污罪成，要坐3年2個月監。
2004年，林氏將佢揸住嘅麗新股權轉讓畀二太余寶珠同佢嘅仔林建岳。
2005年，林百欣因為吸入性肺炎入院，期間引起膽管發炎、肺部感染同埋腎功能衰竭等等併發症，之後重蔓延到小腸同大腸，最後喺2月18號上晝11點喺瑪麗醫院病逝，終年90歲。
屋企
[編輯]林百欣一生人總共有一妻三妾：大婆賴元芳、二太余寶珠、三太顧瑞英同四太蔡艷如，四房人同佢生咗三子（林建名、林建岳同埋林偉鈞）四女，加埋（林建康），總共八人。
睇埋
[編輯] |