武漢肺炎湖北疫情，係講武漢肺炎喺湖北爆發嘅情況。湖北武漢係病例嘅發源地，早喺2019年12月已經有病例，之後好快蔓延到每一個地級政區，係成個中華人民共和國入面疫情最嚴重嘅省級政區。
疫點被指係武漢漢口嘅華南海鮮市場，首個報告病例係喺2019年12月8號，但武漢當局開初未有大範圍實施防疫應對，當地官員堅持認為「可防可控」。到咗2020年元旦，武漢警方重傳喚咗喺社交媒體發放有關病毒資訊嘅8個網民，話佢哋散佈「謠言」。後來證實佢哋都係前線醫護人員，其中一位姓李醫生都喺接診嗰陣受到傳染，病情一度惡化入埋ICU，佢嘅多個醫護同事兼屋企人感染埋[1]。社交媒體度對迴響稱呢8位係「八勇士」，並向佢哋致敬，亦促請當局向八人道歉同賠償，亦認為武漢警方應該受罰[2]。而由武漢首個報告病例，至2020年1月17號疫情一路發展，日本、泰國都報告咗確診病例，武漢以外地方（未包港澳）未再有報告確診病例（1月11號深圳公佈一疑似病例）。由於正值春運，引起民眾憂慮，網上亦有討論，質疑當局管制資訊發放[3][4][5]。
1月14號港媒跟著考察武漢嘅香港專家足跡，期間多個香港記者一齊朝早到武漢金銀潭醫院採訪嗰陣，齊齊畀當地啲差人帶走扣查，被要求刪除喺醫院範圍拍嘅片，仲要求記者交嗮啲手提電話同攝影器材畀差人檢查，又記低埋記者證。扣查咗一個幾鐘先至放咗出嚟[6][7]。
到1月18號（官方宣告疫情嚴峻性前兩日）武漢仲舉辦埋有超過四萬個家庭參加嘅萬家宴，以申報健力士世界紀錄。到咗1月20號公佈消息當日，當局仲話會喺農曆新年假期期間，向民眾發放20萬張節日活動嘅免費飛[8]。武漢同濟醫院喺發熱門診支援嘅姓陸醫生，未有過華南海鮮市場同野生動物等相關接觸史，1月5號開始出現疑似染病症狀，經診斷喺1月10號下晝始以新病毒染病收治，轉入金銀潭醫院治理。而陸醫生發病前後，武漢市衛健委一路係強調冇醫務人員染病。1月11號嘅武漢衛健委通報，亦話未發現明確嘅人傳人證據，而醫護人員染病經已係可證實人傳人嘅證據[9]。
據記者獲得嘅黃岡市蘄春縣縣長1月20號嘅全縣病毒性肺炎防控大會講話稿件，截至1月19號，黃岡市病毒性肺炎病例已去到109宗，其中蘄春縣就有11例住院患者。隨著疫情發展越趨緊張，湖北各地都不同程度出現咗醫用口罩、防護服、測溫儀等防疫物資短缺。
1月23號武漢宣布封城，湖北境內啲主要城市陸續跟著封埋。由封城開始到2月1號呢段時間，武漢啲社區（居委會等）對確診病患、疑似病患嘅救助係極有限嘅。一方面上級政府部門未有即時嘅實質協助，社區亦冇醫院資源，社區居委只可以登記有病症嘅人，再向街道辦事處彙報，而街道辦事處都好少回饋資訊。喺武漢嘅長豐街正康社區，有居民因為冇法得到收治，絕望下就喺自己屋企吊頸死[10]。到後尾中央部署外省市啲醫護補員同資源調人，兼將湖北、武漢一啲黨委官員換馬，開始加強咗對確診病患嘅收治處理，「應收盡收」成咗官方嘅總攻目標。由2月9號開始，上級柯打加碼下街道辦事處度，就不停催社區居委層去安排啲確診病患入院收治，而唔係要病患去搵基層官員求助[11]。
去到2020年12月，《紐約時報》同獨立傳媒ProPublica攞到嚟自黑客組織揭秘中共，同埋追蹤中國網絡監控嘅網站中國數位時代提供嘅文件，揭露中國政府喺武漢肺炎疫情初期點樣操縱輿論。當時網信辦要求內地傳媒唔可以將呢次疫情同沙士相提並論，又要積極影響國際輿論，唔用「無法治癒」、「致命」、「封鎖」等字眼。另外對於疫情吹哨人內地醫生李文亮嘅死，當局亦下達指令，要求壓制負面新聞，重新掌握話語權，命令新聞網站唔好將李文亮死訊推送畀讀者，又要求社交平台逐步將佢嘅名由熱門搜尋話題頁面移除。除此之外，當局又發動大量虛假嘅五毛分散注意力，指示嚴肅制止同埋處理藉此事煽動輿論情緒嘅內容。[12]