武漢肺炎湯加疫情係介紹「武漢肺炎」喺湯加嘅爆發情形。截至2022年4月30號，湯加夾埋有10196單確診病例，死咗11個人。
由於武漢肺炎喺2020年1月12號喺中國湖北武漢開始大流行，湯加政府喺29號宣佈閂嗮啲出入境道路[1]。同年3月4號發現疑似病例，證實虛驚一場[2]。3月17號開始禁嗮冚唪唥船隻靠近湯加群島邊嘅淺灘兼禁嗮大部份出入航班直達[3]。
嗰時因海空道路都封鎖嗮，所以喺2020年全年都未發生過單武漢肺炎感染案例。踏入2021年，湯加一直重保持武漢肺炎零確診個案，即使係同年8月24號由世衛嚟嘅大批武漢肺炎疫苗都係一樣。
湯加喺2021年10月29號確診咗第一單武漢肺炎感染個案，患者係湯加籍嘅季節性工人，喺紐西蘭坎特貝利大區基督城搭飛機返湯加努瓜洛法時發現感染武漢肺炎[4][5]。事發三日後，湯加政府喺湯加塔普宣佈咗為期一個禮拜嘅封城，除咗銀行、治安、消防同急救等緊急服務之外，其它乜公共娛樂活動都唔畀搞[6][7]。而感染咗武漢肺炎嘅唯一患者喺同年11月26號好返出院。
2022年1月15號，湯加有火山爆發，當地擔心外國運嚟救援物資嗰陣會帶埋肺炎病毒嚟而影響防疫。期間一直未出現感染個案，直到2月1號先至出現第二單，患者努瓜洛法嘅碼頭工人，曾經接觸過進口貨品[8]；第二日又出多三單感染個案，患者係兩位細路同一位女士[9]。隨後政府考慮到有碼頭工人接觸過感染武漢肺炎嘅進口貨品嘅第啲密接者出現感染個案，而宣佈為期兩日嘅封城[9][10]；期間若有需要出外，一定要戴好口罩同保持社交距離[9]。期間又再先後確診多兩單（4號同5號各一單）感染個案[11]。