燒豬

斬燒豬

燒豬係一種廣東傳統嘢食。製法同另一廣東燒味燒乳豬基本上一樣，唔同嘅係會用已經長大嘅豬，而唔係用乳豬。燒豬嘅其他多骨部份，例如頭、踭等，都可以用嚟熬湯或煮粥。

廣東燒味可以分為燒肉同燒腩，燒肉係將成隻生豬燒製而成，之後再斬成細件^[1]；燒腩係淨係燒大豬嘅五花腩部份，會先將腩肉本身嘅肋骨起出，食嗰陣只有脆皮、嫩肉同肥膏，食得比較方便^[2]。而細件嘅燒腩就叫燒腩仔。另外，作為被再度烹調嘅食材就叫火腩（例如「豆腐火腩」）。

燒肉以皮脆肉嫩為上品。燒豬可以重十到二十公斤，燒肉無論係脂肪同肉都較多而厚。而燒乳豬一般只重五至六公斤，除咗一層脆皮之外，只有好少嘅脂肪同肉，而且骨軟都食得。燒乳豬嘅每斤價格亦比燒肉貴好多；多數賣燒味嘅舖頭通常都會有燒肉賣，但係乳豬就未必成日會有，通常需要先預訂。

製法

燒豬一般嘅製法係將豬劏好之後喺肚度切開，放入特製燒烤叉撐開，然後澆上熱水令豬皮收縮。燒烤可以係逐隻放喺火上面燒，亦可掛入烤爐烤成。燒烤嗰陣要喺豬皮上面拮啲窿仔，等皮下嘅油流出。亦可以用猛火燒烤，其間喺豬皮搽上油，令豬皮成充滿氣泡，酥脆嘅金黃色，就會成為「麻皮豬」（臺稱脆皮燒肉）。