粵詩
粵詩（粵拼：jyut6 si1）即係由粵人寫，要用粵語發語嚟讀先會有韻嘅詩。
歷史
[編輯]中世紀
[編輯]唐詩（粵拼：Tong4 si1）同宋詞（粵拼：Sung3 ci4）公認咗係古華夏史上最出色嘅詩詞作品之一。而今日嘅嶺南就保留咗一種好啱用嚟讀唐詩宋詞嘅話－廣東話。現代廣東話係現存咁多種唐話入面其中一種最近中古漢語嘅，讀起中古時代嘅唐詩宋詞上嚟好多都好押韻，保留到好多喺中古漢語入面成日都聽到嘅入聲－即係用 p 、 m 、 k 做尾嘅音[1]。
唔單止係咁，嶺南嘅人喺超過一千年前開始已經喺度作詩作詞。唐朝其中一個最有料到嘅大詩人張九齡（678-740 年）就係嶺南出身嘅－佢喺韶州曲江（今日嘅廣東韶關）出世。張九齡係嗰時嘅廣州都督個仔。據講佢好細個嗰陣已經好醒，後尾重坐埋宰相個位。佢一世人寫好多詩，當中佢嗰十二首《感遇》，畀人列咗喺《唐詩三百首》嘅開頭。畀張九齡影響咗，後嚟嶺南喺 9 世紀嘅唐朝尾又出咗個朵冇張九齡咁大，但係都有啲名氣嘅邵謁同陳陶。當中邵謁出咗名寫起詩上嚟唔用花巧修辭，好樸素。好似係佢寫嘅《歲豐》：
邵謁《歲豐》
- 皇天降豐年本憂貧士食。
- 貧士無良疇安能得稼牆？
- 工傭輸富家日落長太息。
- 為供豪者糧役盡匹夫力。
- 天地莫施恩施恩強者得。
自從嗰時開始，粵人就一路都有寫詩詞，出咗唔少有影響力嘅詩人[2]，而且重有咗嗰名叫「嶺南詩派」－出嗮名睇重保留唐朝發音，又會揾啲有關地區風土嘅題材寫詩－保留到唐朝嘅遺風得嚟又有本土特色。除咗呢樣，民間嘅文人雅士得閒都會寫吓詩詞嚟開心吓，或者係喺有啲乜嘢大事嗰陣作番對對聯嚟賀吓佢或者紀念吓，例如係喺大家族嘅祠堂嘅門口度好多都會寫對對聯嚟畀人睇吓佢哋幾有文化。
近代詩詞
[編輯]嶺南三家
[編輯]嚟到摩登時代，嶺南喺 17 世紀嘅時候出咗現實主義嘅嶺南三家（粵拼：Ling5 naam4 saam1 gaa1）－屈大均、陳恭尹、同梁佩蘭呢三個詩人。佢哋好多時都係寫詩去歌頌反抗滿清嘅明朝將領或者係描繪當時嘅平民畀清政府壓榨得有幾慘。好似係屈大均喺廿八歲北上去旅行嗰陣有感而發寫嘅《魯連台》，就會令讀嗰個人覺得個景有啲悽涼：
- 屈大均《魯連台》
- 一笑無秦帝，飄然歸海東。
- 誰能排大難，不屑計奇功。
- 古廟千秋月，荒臺萬木風。
- 從來天下士，只在布衣中。
口語粵詩
[編輯]嶺南詩派出咗名革新。除咗呢啲古雅啲嘅作品，再近期啲嘅嶺南詩人重好夠膽去搞新諗頭－喺 19 世紀，嶺南開始有詩人用口語化嘅廣東話嚟去寫詩[3]。當中最有代表性嘅應該要數廣東惠陽出身嘅廖恩燾（1863-1954 年）。佢嘅作品《嬉笑集》[4]裏面嘅詩就好明顯睇得出係用咗口語化嘅廣東話，一啲都唔會畀人有文鄒鄒嘅感覺。好似係佢寫嘅《秦始皇》就好通俗大眾：
- 廖恩燾《秦始皇》
- 荊軻嚇失佢三魂，好在良官冇搬親。
- 野仔執番條爛命，龜公害盡幾多人。
- 監生點解嚟陪葬，臨死唔知仲拜神。
- 萬里咁長城一座，後來番鬼當新聞。
- 六國吞埋擸吓鬚，安心就咁著龍袍。
- 收齊爛鐵燒銅像，堆起新書透火爐。
- 過海點嚟求味藥，當天仲去貼張符。
- 既然慌到江山冧，生仔唔該叫阿胡。
粵詩文獻
[編輯]有好多證據都顯示嶺南嘅詩其實唔淨止得呢啲。而家喺廣東有人響度搞緊一個叫做《全粵詩》（粵拼：Cyun4 jyut6 si1）嘅文獻，諗住想記錄嗮自古以嚟所有嘅粵詩，已經出咗三十冊，收錄嗮大明時期同打前嗰啲粵詩。佢哋係遇到啲阻滯，但係而家重係有喺度進展緊。
睇埋
[編輯]引咗
[編輯]- ↑ 〈為什麼有時候普通話讀詩詞不押韻，而用粵語讀卻很有味道？〉。原著喺2021年11月21號歸檔。喺2017年5月24號搵到。
- ↑ 陳永正 | 嶺南詩派略論
- ↑ 〈談廣東方言的格律詩〉。原著喺2017年5月22號歸檔。喺2017年9月26號搵到。
- ↑ 粵典文庫－嬉笑集
參考
[編輯]- 陈永正. (1999). 岭南诗派略论. 岭南文史, 3, 002.
- 陈永正. (2007). 南园诗歌的传承. 学术研究, (12), 124-134.
- 王季思, 王季思, & 王季思. (2005). 振兴岭南诗派的设想 [C]. 王季思. 王季思全集, 4.
- 何天杰. (2007). 岭南三家与清初诗坛格局之新变. 学术研究, (4), 150-154.
- 黄坤尧. (2012). “岭南诗派” 相对论. 学术研究, (3), 124-126.
