素雲濃·恭迎（泰文名：สุวนันท์ คงยิ่ง，英文拼法：Suvanant Kongying，花名：กบ / Kob；1978年7月22號—）係泰王國嘅一個女影星，響曼谷出世。渠係東泰彩瓊騷府（又叫做北柳府）嘅人。渠爹哋叫菴雷·恭迎，係一個老師，媽咪叫烏邦叻·恭迎，響農業部做緊幹部，屋企重有個細佬叫亞彼斯·恭迎。
渠細路女嗰陣時，跟亞嬤住喺北柳府，3、4歲就搬咗去曼谷開始學演戲，10歲左右開始上電視度做童星，啲觀眾都好鍾意渠趣致同埋可愛。收尾渠憑響電影《ดาวพระศุกร์ 》度（發音Dao prah sook，意思係《晨星》）嘅演出紅咗，嗰部戲話一個叫阿星嘅女仔響細個時畀親生老竇老母拋棄咗，但大個咗之後成為靚女好多人鍾意，最後渠唔單止搵到真愛，重幾經波折搵番個親生老竇添。嗰陣時泰國啲電臺日日都播渠主唱嘅嗰支電影主題曲《แค่รักก็พอ》（發音Kae Ruk Gor Por，意思係《阿嬌愛老竇》），好催人落淚。
唔知係唔係響嗰部片度個名改得好，素雲濃之後就好行「星運」啦，一直片約唔斷。幾乎年年啲泰國觀眾都選渠為「最受歡迎嘅娛樂人」，開頒獎會上臺攞獎嘅次數多到渠自己都記唔得。
收尾渠搵到時間去曼谷朗西（Rangsit，亦譯成蘭室）間私立大學度讀書，一邊讀書一邊重保持活躍，周時出吓臺，又利用課餘時間練番細個時好鍾意玩嘅溜真冰，幾年後終於有幾會，渠參加全泰國職業溜冰比賽得到冠軍做埋一個體育人才。
而家素雲濃重響曼谷做緊模特兒同埋電臺嘅節目主持人。有間化妝品公司搵咗渠做代言人，聽講每年畀成千萬泰銖（三十幾萬美金）咁多，雖然條數唔係畀渠一個人兜曬，不過都話得係「成世吃唔晒」啦。
2003年1月啲柬埔寨報章紛載素雲濃話過一句：「個吳哥古窟本來係屬於泰國嘅」。之後啲柬國民眾就一個個去晒街度鬼殺咁嘈，金邊重有騷亂發生，啲暴民去到泰王國大使館門前示威，燒咗幾面泰國旗重嫌唔夠喉，索性掟幾個燃燒彈入大使館成間屋燒晒。燒完使館又搵其他泰國人響金邊開嘅鋪頭同埋商務辦度，周圍猛咁掟嘢、搶嘢、同埋燒屋，搞到班響金邊投咗資嘅泰僑個個都損失到雞毛鴨血，第日提起去外國投資都話咪搞我啦！[1]
其實，渠確實係講過呢番話，不過係響部戲度照住啲師爺寫嘅臺詞來噏，呢個絕對唔代表渠自己嘅睇法。班金邊報紙啲老記成日亂噏嘢唔使負責任，呢次卒之俾佢哋搞到單嘢咁大，政府事後追查係邊個謠言惑眾，拉咗十幾個入去，有人重俾人判咗「長徒」十幾年都出唔到來。