許智峯

許智峯
出生日	1982年6月8號  （42歲）
出生地	英屬香港
國籍	英屬香港、香港
母校	香港城市大學
職業	政治人、律師
政黨	民主黨、澳洲自由黨
[改維基數據]
睇 傾 改

許智峯（Ted Hui，1982年6月8號—），花名「峯鴿」，係前香港民主黨成員，2011年開始做中西區區議會中環選區議員。亦係第六屆香港立法會議員。

簡歷

許智峯早年住屯門大興邨，中學讀聖公會聖西門呂明才中學，大學讀香港城市大學法律學士。佢1999年加入民主黨，喺2007年，佢參選第3屆香港區議會選舉嘅屯門區議會（屯門鄉郊選區），只得554票，輸畀自由黨嘅陶錫源（城鄉會創會主席）。

2011年參選第4屆香港區議會選舉嘅中西區區議會（中環選區），接替退休嘅黨友阮品強，最後順利接棒，其後喺2015年、2019年，亦能順利冧莊。

喺2015年香港區議會選舉，佢攞到1,090票，成功當選^[1]。

2016年，許智峯代表民主黨參選第6屆香港立法會選舉香港島直選，排名單頭位，結果順利當選，成功喺黨友單仲偕手上接棒。^[2]

2018年4月24號，許智峯喺立法會嘅《廣深港高鐵（一地兩檢）條例草案》委員會會議進行期間，因為唔滿意政府派「狗仔隊」監視議員，喺立法會會議室外搶走保安局一名女行政主任手上嘅文件，再搶去佢嘅政府手機，衝入男廁裡面17分鐘，一度拒絕歸還，結果被裁定普通襲擊、不誠實取用電腦、阻礙公職人員執行職務等3項罪名成立，案件响2019年6月11號喺東區法院判刑，裁判官話：許嘅行為對公務影響唔大，亦冇個人得益，女事主雖然有受驚，但冇肉體受傷，亦都相信許重犯機會低，故判佢240個鐘頭社會服務令及罰款3800蚊。

流亡後嘅政治生涯

2020年11月30號，官司纏身嘅許智峯去丹麥，聲稱係關於氣候轉變嘅公務採訪。12月2號，許老竇老母同老婆仔女都去埋丹麥。再一日後，許智峯喺社交網站發表聲明正式宣佈要暫別香港就噉流亡，並退出民主黨，未決定會喺邊個國停留^[3]。再一日後佢去咗覲見丹麥前首相。

2021年3月9號，許智峯喺Facebook發文話已去咗澳洲，繼續國際游說工作^[4]。喺澳洲期間，佢參與過喺雪梨大會堂附近舉行嘅反送中運動兩周年澳洲集會^[5]。

2021年5月29號，許智峯被港府刊憲宣布：佢嘅區議員議席懸空。

2023年7月3號，許智峯畀香港警務處國家安全處列做國家安全案件通緝人士。2024年12月24號，時任保安局局長鄧炳強行使《維護國家安全條例》第89條賦權，進一步對許智峯實施撤銷香港特區護照、禁止處理資金等限制措施。

參考

1. 〈2015年區議會選舉 - 選舉結果〉。www.elections.gov.hk。原著喺2018-11-22歸檔。喺2025-01-10搵到。
2. 〈【港島正式結果】羅冠聰成史上最年輕立會議員　王維基出局　何秀蘭連任失敗〉。立場新聞。2016-09-05。原著喺2016-09-19歸檔。喺2021-03-15搵到。
3. 〈許智峯宣布流亡　退出民主黨 ：傷痛不懂以筆墨形容 (附聲明全文)〉。香港01。2020年12月3號。
4. 〈許智峯facebook透露已轉抵澳洲　將繼續國際游說工作〉。明報新聞網。2021-03-09。喺2021-03-15搵到。
5. 〈【反抗運動兩周年】澳洲多城 6.12 集會 悉尼集會數百人參加 許智峯現身 籲在外港人盡力發聲 | 立場報道 | 立場新聞〉。《立場新聞 Stand News》。原著喺2021-06-12歸檔。喺2021-06-12搵到。

出面網頁

• 〈香港特別行政區立法會 - 議員資料庫〉 (繁體中文)。香港特別行政區立法會。
• 許智峯嘅facebook頁
• 許智峯嘅facebook頁