韋奇立

韋奇立（葡文：General Vasco Joaquim Rocha Vieira，1939年8月16號—）係葡萄牙軍官、第127任澳門總督。

韋奇立生於葡萄牙阿爾加維省拉高亞市，年輕時入讀葡國嘅軍事學校，畢業後就讀陸軍學校；1965年前往安哥拉任職，3年後被調返葡國嘅軍事學校出任教授；1969年喺里斯本市政廳工作。

1973年被葡國調去澳門出任葡國國防部陸軍司令部參謀長；翌年出任澳門工務暨交通政務司一職至1975年。擔任司級一職後被召回葡國出任工程學院院長以及國防部陸軍參謀長；1978年至1982年被調往北約擔任葡萄牙最高司令部軍事常駐代表；1986年至出任澳門總督一職前擔任共和國亞速爾群島自治區部長，並喺1987年6月17號升為少將。^[1]

韋奇立由1991年4月23號起就任第127任澳門總督至1999年12月19號；亦成為葡屬澳門最後一任總督。韋奇立喺任內曾經九次訪華以及同中華人民共和國密切合作，確保澳門順利交接、完成「三化問題」、喺澳門致力保留葡萄牙文化；喺澳門基建上完成多項大型建設，包括澳門國際機場、澳門文化中心、蓮花大橋等基建設施；之不過，韋奇立任內拒絕設立財政儲備，同佢任內最後階段嘅澳門經濟不景、治安日趨惡化，燒車案、槍擊事件接二連三多次發生，係佢任內嘅失誤^[2]。

葡國報章喺澳門主權移交後揭發韋奇立以權謀私撥走澳門發展與合作基金會撥款5000萬港元到佢親自領導嘅歐維治基金會（葡文：Fundação Jorge Álvares）^[3]。最後，澳門發展與合作基金會同埋舊澳門基金會被政府解散，另合併成新嘅澳門基金會^[4]。另一方面，韋奇立喺2001年3月24號向葡國報章《快報》承認喺任內將懸掛喺澳門總督府內嘅41幅歷任澳門總督肖像油畫複製並將真跡秘密運返葡國，並存放喺葡國首都里斯本嘅澳門科技中心；但只有韋奇立嘅肖像油畫不知所終^[3]。

參考

1. 中國新聞社，最后的澳督在远去 互聯網檔案館嘅歸檔，歸檔日期2009年6月18號，.，2009年4月11號睇，（大陸簡體）
2. 澳門日報，〈回歸特刊——往事回首看澳督〉1999年12月20號刊出，（繁體中文）
3. 北方網，末代澳督將澳門40多幅油畫偷運回葡萄牙 互聯網檔案館嘅歸檔，歸檔日期2009年6月18號，.，2001年3月26號發出，（繁體中文）
4. 澳門特別行政區政府，澳門第7/2001號法律——新基金會的設立，2001年6月11號刊出，（繁體中文）