香港海洋公園
22°14′45.1″N 114°10′33.3″E / 22.245861°N 114.175917°E
提示：呢篇文講嘅唔係香港海岸公園。香港海洋公園（英文：Ocean Park Hong Kong），通常就噉叫海洋公園（Ocean Park）係香港一主題公園，以海洋為題，兼有種種機動遊戲同動物園。佢喺香港島黃竹坑南面，北面近黃人坑，有山下花園，向南有南朗山，最南係大樹灣。北面靠近黃竹坑警察訓練學校。公園一九七七年一月十號落成啟用，家下入場人次，一年有四百二十萬。公園佔地十七公頃，景點卌二個。山下花園去南朗山，有吊車來往。而南朗山同大樹灣之間，就靠登山電梯，條電梯曾經係世界之最，家下係世界第二長嘅戶外扶手電梯。
歷史
[編輯]海洋公園喺一九七七年一月十號開幕，最初由香港賽馬會捐款起，由馬會管，而且重係1977年度香港小姐競選嘅外景拍攝地方。開幕頭半年，海洋公園入場人次已過一百卅一萬。
1979年1月，海洋公園引入殺人鯨「海威」，成為海洋公園其中一個賣點。公園初期嘅設施唔多，但係由1980年代開始，海洋公園大幅擴展，增加大型機動遊戲，並先後建成水上樂園（1984年）、百鳥居（1986年）、鯊魚館（1989年）、紅鸛池（1991年）、孔雀花園（1993年）、登山電梯同埋集古村等設施。
早期海洋公園嘅營運資金，主要靠門票同香港賽馬會撥款。入場費低，公園好多時蝕本。一九八七年七月一號，香港政府通過《海洋公園條例》，馬會撥款二億港元，成立信託基金，公園脫離馬會獨立，成為非牟利組織，需自負盈虧，以商業手法經營。
由於以商業手法經營，海洋公園逐步提高入場費，因此亦開始轉虧為盈。1992年，海洋公園全年入場人次已達300萬。但自1998年後，由於受亞洲金融風暴影響，加上遊客開始對公園欠缺新鮮感，而且鎮園之寶殺人鯨「海威」病逝，海洋公園開始出現虧蝕。雖然喺1999年獲中國大陸同意引入兩隻大熊貓，但亦未能提升入場人次。於是海洋公園只可以關閉水上樂園同埋集古村等設施，改為吸引更多年輕人嘅方針，引入更多大型機動遊戲，例如跳樓機同埋越礦飛車。
過去海洋公園以海馬作為標誌，公園範圍內嘅南朗山北麓更有大型海馬標誌。不過，海馬動態唔夠活潑，亦係中藥材嘅一種，故此未能充份配合公園嘅理念。因此，海洋公園由2000年11月開始引入稱為「威威獅令」嘅卡通海獅作為公園嘅代言人，並以佢展開更多推廣及宣傳工作。
隨住中國大陸開放自由行到港，海洋公園嘅入場人數出現起色，2004至2005財政年度入場人次超過400萬，打破公園開幕以來最高紀錄。
2021年，喺以前集古村位置開過新一代水上樂園。
歷任董事局主席
[編輯]- 馮秉芬爵士（1971年－1982年12月）
- 紐壁堅（1982年12月－1984年1月）
- 麥蘊利（1984年1月－1993年）
- 賈世德（1993年－1996年）
- 關超然（1996年－1997年）
- 查懋聲（1997年－2000年）
- 陳南祿（2000年－2003年）
- 盛智文（2003年7月－2014年6月）
- 孔令成（2014年7月－2020年6月）
- 劉鳴煒（2020年7月－2022年6月）
- 龐建貽（2022年7月－而家）
特色節目
[編輯]
- 海洋公園夏水禮
- 每年7至8月夏天期間，海洋公園會舉辦「海洋公園夏水禮」活動，推出各種水上活動，包括泡泡舞會同埋雨林迷宮。
- 十月全城哈囉喂
- 由2001年起，每年10月萬聖節前夜期間，海洋公園都會舉辦「十月全城哈囉喂」活動，以恐怖為主題吸引遊客，並會增設夜場，延長開放時間。活動設有多間主題鬼屋，並有百幾個人飾演唔同種類嘅鬼怪，甚至包括中國式嘅鬼怪。活動發展至今，已經成為全香港仔最大型嘅萬聖節活動，預計今年會創下50萬人次嘅入場紀錄。
- 海洋公園大團拜
- 喺農曆新年期間舉行，推出各種新鮮刺激嘅遊戲、大型匯演、技藝同埋財神爺，同顧客恭賀新春。
- 結婚婚禮
- 海洋公園設有8大「創意心動地點」，畀新人喺水度、半空、甚至過山車上向另一半講聲「我願意」，更有乖巧得意嘅動物以保育大使身份出席新人嘅婚禮。
設施
[編輯] | 呢版要更新，以反映最新情況。加完料之後唔該拎走個模。 |
海洋公園內共分8個區域，包括夢幻水都、亞洲動物天地、威威天地、冰極天地、動感天地、熱帶雨林天地、海洋天地、以及急流天地。其中亞洲動物天地、夢幻水都、威威天地位於公園裏面嘅海濱樂園，而其餘景區就喺高峰樂園。而公園內共有42個景點，包括十幾個機動遊戲。
亞洲動物天地
[編輯]
- 香港賽馬會大熊貓園
- 香港主權移交之後，中華人民共和國政府將一對大熊貓安安同佳佳送畀香港做禮物。1999年5月18號，香港賽馬會大熊貓園正式開幕，成為安安同佳佳嘅永久居所。2007年再送樂樂同盈盈畀香港做香港主權移交十週年嘅賀禮，香港賽馬會大熊貓園晌2007年7月1號重新開幕，成為四隻熊貓嘅永久居所。
- 七彩升空天地
- 坐22公尺直徑嘅升空氣球，體驗離地面約莫100公尺嘅空中，望晒南區全景（响2012年關閉）。
- 威水笨豬跳
- 環迴水世界
威威天地
[編輯]- 海豚學堂
- 威威劇場
- 幻彩旋轉馬
- 小丑旋風
- 昇空奇遇
- 彈彈屋
- 威威天地遊樂場
- 互動影子樂
- 動物故事坊
- 威威天地攤位遊戲
海洋天地
[編輯]
- 中華鱘館
- 中華鱘館有一條水底觀覽隧道，館內飼養國寶中華鱘。
- 海洋館
- 水母萬花筒
- 亦叫「水母館」，喺2006年4月10號揭幕，佔地5000平方呎，為全亞洲最大、獨立嘅水母館。館內分為八大展區，展示四百幾種世界各地獨特嘅水母，特色係利用燈光效果展示水母動態，以電腦特技教導市民認識同保護水母。
- 太平洋海岸
- 海洋劇場
- 海洋摩天塔
- 怡庭（花園）
山上機動城
[編輯]
- 極速之旅
- 瘋狂過山車
- 瘋狂過山車全長842米，最高時速高達每小時77公里。過山車有3個迴圈，提高遊戲嘅刺激性。由於過山車臨海邊而建，因此會畀遊人衝落海嘅感覺。
- 飛天鞦韆
- 飛天鞦韆喺1997年啟用，而呢個機動遊戲會離地7米環迴轉動。
- 沖天搖擺船
- 係一部海盜船，向前向後搖擺
- 摩天巨輪
- 係一部摩天輪，可飽覽山上機動城。
- 翻天飛鷹
- 係一部會上下移動，同時順時針同逆時針方向轉圈嘅遊戲，高度22米。
- 山上機動城攤位遊戲
急流天地
[編輯]- 越礦飛車
- 太空摩天輪
- 太空摩天輪會好快咁打橫轉圈。轉到一定速度嗰陣會傾斜。
- 滑浪飛船
- 滑浪飛船會沿攀升帶上升，然後兜一小圈，再經滑水道好快咁滑落去。
動感天地
[編輯]以嘉年華會做主題嘅主題區，2012年啟用，係擴建計劃後最多機動遊戲嘅主題區。
- 翻天覆地
- 翻天覆地超過22米高，臂彎以時速60公里速度喺半空搖擺，加上360度凌空迴旋。
- 動感快車
- 遊客登上無車底列車之後，雙腳懸空，感受高速同連續4個迴圈嘅快感，高度35米，時速88公里，加上4G地心吸力，可以感受離心體驗。
- 橫衝直撞
- 碰碰車類型嘅設施，每架碰碰車坐到2人。
- 超速旋風
- 超速旋風仿照滑翔機設計，雙腳懸空嘅開放式機身，升上離地30米係咁轉，更可以順應風向拉動手掣調整機翼。
- 雷霆節拍
- 車卡隨節拍不停旋轉同升降，速度飛快。
- 威水笨豬跳
夢幻水都
[編輯]夢幻水都喺2011年1月27號揭幕，取代海洋館，佔地20萬平方呎。
- 海洋奇觀
- 取代舊有海洋館嘅水族館。
- 雙龍奇緣
- 夜間人工湖嘅水上多媒體表演，包括噴泉、近距離煙火、水上火焰等效果。
- 講述水及火龍化敵為友，訴說大自然共生共存嘅重要性。
- 海龍王餐廳
- 一間畀人喺水底欣賞海洋生物嘅餐廳。
熱帶雨林天地
[編輯]- 熱帶雨林激流
- 遊客坐上圓形橡皮小艇之後橫越雨林，途中更會俾其他遊客以水槍襲擊。
- 熱帶雨林動物展館
- 有好多熱帶雨林動物。
冰極天地
[編輯]海洋公園擴建計劃首期壓軸主題區。
- 極地時速
- 坐上海豹型過山車之後飛越極地。
- 南北極地展館
- 將展出海豹、企鵝等動物。
- 冰極餐廳
- 性質類似海龍王餐廳嘅餐廳。
吊車
[編輯]
山下花園同埋南朗山之間，有吊車駁埋。吊車全長1.5公里，每個鐘載客4000人次，總共有252架吊車來回運行。每架吊車可以載6人，車程10分鐘，搭客可以飽覽深水灣同南朗山優美海景。吊車喺惡劣天氣之下，會暫停服務。
根據海洋公園同政府現今嘅資料，嗰個登山纜車係叫做「纜車」，係由英文Cable Car直接翻譯；而坊間同舊官方資料就叫佢做「吊車」，以佢嘅外形嚟叫。
海洋列車
[編輯]一個喺隧道行嘅雙向登山纜索鐵路系統。列車以探索潛水艇為設計藍本，透過車廂內嘅多媒體設施，令遊客經歷一次彷彿穿越深海嘅旅程。列車連接山下花園同埋南朗山兩個區，往返高峰站（山上嘅高峰樂園）同海濱站（山下嘅海濱樂園）。隧道全長1,300米，列車可載250人，車程2-3分鐘，軌距1435mm（標準軌），單向每小時最多可載5,000人。喺2010年12月5號下晝出過意外，7人受傷，1人情況危殆。
登山電梯
[編輯]南朗山同埋大樹灣之間，有登山電梯駁住。電梯全長225米，係全世界第2長嘅戶外扶手電梯，起好嗰時本來係全世界最長嘅戶外電梯，後來畀香港另一個中環至半山自動扶梯系統取代。而電梯係沿住30度角嘅山坡上落，每小時載客量達4000人次。登山電梯唔受天氣影響。
保育工作
[編輯]除咗發展旅遊之外，海洋公園亦積極推廣教育同進行動物保育。海洋公園每年招待約4萬名學童，加深佢哋對動物嘅認識。此外，海洋公園亦致力進行海洋哺乳動物嘅研究。2000年，海洋公園成功透過人工受孕嘅方法令樽鼻海豚受孕，並喺2001年5月誕下兩條小海豚，成為全球首宗成功個案。另一方面，海洋公園成立咗「香港海洋公園保育基金」，用嚟協助有關瀕危動物嘅研究工作。
近年發展
[編輯] | 呢版要更新，以反映最新情況。加完料之後唔該拎走個模。 |
自從香港迪士尼樂園開咗之後，海洋公園就要同迪士尼競爭。2004年，當時嘅特首董建華邀請有「蘭桂坊之父」之稱嘅盛智文出任主席，希望以佢嘅經驗提高海洋公園嘅競爭力。
盛智文上任後，海洋公園公佈重新發展計劃，希望發展成為世界最佳嘅海洋主題公園，並藉此加強香港對世界各地遊客嘅吸引力。喺未來幾年將斥資55.5億港元，增加遊樂設施至70個。翻新後嘅海洋公園面積將增至137公頃，增加接近一倍，並引入33種全新動物。公園將分為「高峰樂園」同埋「海濱樂園」兩部分，高峰樂園位於高地，以海洋、熱帶雨林同南北極地體驗為主題。海濱樂園就位於低地，以水族館同雀鳥為主題，並設有兒童遊樂設施。兩個樂園之間會加建全長1400米嘅高峰列車連接，車程3分鐘。公園亦將會增加多項動物表演。而機動遊戲方面，將會規劃現時嘅山上機動城，除咗保留跳樓機，其他機動遊戲都會拆，但會開闢山頭興建多項新嘅機動設施，以便騰空集古村一帶沿海地方去起酒店，以吸納多啲高消費嘅長途旅客。
海洋公園亦起緊3間酒店，一間喺於公園入口，兩間喺集古村；2006年尾開工，預計2010年落成，預計每年入場人次會加到500萬。
未來發展
[編輯]政府通過2021年海洋公園公司（修訂）條例草案，未來會將海洋公園從主題公園轉為保育同教育工作，例如將動物護理中心從新設計吸引大眾。海濱樂園嘅紀念品店、餐廳等營運權外判畀私人發展商/營運商。入口會後移到山上嘅高峰樂園，老舊嘅大型機動遊戲會被淘汰，設立以歷險為主題嘅區域，建設小型嘅娛樂設施，同埋開墾未用嘅土地設立以健康為主題嘅區域，用作露營、登山等活動。建立碼頭作為交通方式。
交通
[編輯]- 巴士（海洋公園專線）
- 巴士（平日繞經路線）
- 巴士（假日或星期六下晝繞經路線）
- 港島專線小巴
- 29A：鴨脷洲邨 ↔ 海洋公園（大樹灣）（只係喺平日繁忙時間提供服務）
- 市區的士
- 停車場
- 海洋公園正門停車場：400個車位
時間同收費
[編輯] | 呢版要更新，以反映最新情況。加完料之後唔該拎走個模。 |
開放時間
[編輯]公園開放時間：10:00 am - 7:30pm
暑期、萬聖節前夕，同埋其他特別日子，會改時間，部份日子另有夜場，要另外收錢。
入場費
[編輯]入場費分一次同全年。
- 日間入場門票（一次入場）
- 成人：HK$498
- 小童（3-至11歲）：HK$249
- 樂悠咭持有人 (60-64歲) ：HK$100
- 攞綜援人士：HK$20
- 3歲以下、65歲或以上香港居民、「殘疾人士登記證」人士同埋香港居民生日嗰日可以免費入場
公園相
[編輯]-
海洋劇場海豚表演 -
海洋公園正門，當時舉行緊「十月全城哈囉喂」 -
水母萬花筒 位於山上纜車站嘅下層 -
水母萬花筒 裏面嘅小水母舞姿美妙 -
水母萬花筒 裏面嘅水母分門別類 -
水母萬花筒 遊客歡樂留影 -
參考
[編輯]- 報章
- 網站
- 香港海洋公園官方網站
- 香港海洋公園官方簡介
- 海洋公園之旅 - 香港旅遊發展局
- 香港海洋公園創意婚禮官方網站
- 香港海洋公園學院官方網站
- 香港海洋公園大團拜
- 香港海洋公園30周年網站
- 香港海洋公園動物全接觸
出面網頁
[編輯]睇埋
[編輯]
