魔界村系列係日本Capcom喺1985年開始推出嘅動作平台遊戲系列。
玩家要控制武士Arthur去打妖怪，喺限時以內過每一關，最終目的係要救俾妖怪捉走嘅Prin-Prin公主。
喺頭三隻遊戲《魔界村》、《大魔界村》同埋《超魔界村》，玩家由頭玩到尾之後就要由頭再玩多次啲關先可以爆機，而難度亦會提升。每關都有唔同嘅武器同埋盔甲可以攞，有啲盔甲着咗上身重可以出魔法。如果Arthur着住盔甲中咗招就會得番條孖煙囪，再中招就會得番棚骨（即係死）。另外如果Arthur淨係着住條孖煙囪，一過關就會有番盔甲。
喺《極魔界村》，玩家幾時都可以玩番之前玩過嘅關。另外視乎玩家揀乜嘢難度，盔甲可以抵受一次或多次攻擊。