Alfred Eisenstaedt

Alfred Eisenstaedt
Eisenstaedt onderteken in 1995 'n afdruk van sy bekende foto "V-J Day in Times Square".
Gebore(1898-12-06)6 Desember 1898
Dirschau, Wes-Pruise, Duitse Ryk (nou Tczew, Pole)
Sterf23 Augustus 1995 (op 96)
Oak Bluffs, Massachusetts, VSA
BeroepFotojoernalis

Alfred Eisenstaedt (6 Desember 1898 - 23 Augustus 1995) was 'n Duits gebore Amerikaanse fotograaf en fotojoernalis. Hy het sy loopbaan voor die Tweede Wêreldoorlog in Duitsland begin, maar het bekend geword as 'n fotograaf vir die tydskrif Life nadat hy na Amerika verhuis het. Meer as 90 van sy foto's het op Life se voorblaaie verskyn, en meer as 2 500 van sy fotoreekse is gepubliseer.[1]

Onder sy bekendste foto's is die een van 'n verpleegster in 'n matroos se arms wat op 14 Augustus 1945 in New York geneem is terwyl die oorwinning oor Japan in die Tweede Wêreldoorlog gevier is.[2] Hy is verder veral bekend vir sy onvergeetlike foto's van belangrike mense in die nuus, asook vir sy steelfoto's wat hy met 'n klein 35 mm-Leica geneem het, meestal in natuurlike lig.[2]

Vroeë lewe

[wysig | wysig bron]

Eisenstaedt is in 1898 in Tczew, Wes-Pruise in die Duitse Ryk, gebore.[3] Sy familie was Joods en het in 1906 na Berlyn verhuis. Eisenstaedt is van sy kindertyd af betower deur fotografie en het op 11-jarige ouderdom begin foto's neem.[4] In die Eerste Wêreldoorlog het hy in die Duitse weermag gedien en in 1918 is hy gewond. Terwyl hy in die 1920's in Duitsland gewerk het, het hy as vryskut begin foto's neem vir die Pacific and Atlantic Photos se kantoor in Berlyn. Dit is in 1931 deur Associated Press oorgeneem.

Professionele fotograaf

[wysig | wysig bron]

Eisenstaedt het in 1929 'n voltydse fotograaf geword toe hy deur Associated Press in diens geneem is, en sy talent is binne sy eerste jaar as fotograaf geloof.[5] Hy het ook vir Illustrierte Zeitung gewerk wat uitgegee is deur Ullstein Verlag, destyds die grootste uitgewery in die wêreld.[5] Vier jaar later het hy die beroemde eerste vergadering tussen Adolf Hitler en Benito Mussolini in Italië afgeneem.

'n Foto geneem in die Cub Room van die beroemde nagklub Stork Club in New York, met onder andere Orson Welles (met die sigaar) en die eienaar, Sherman Billingsley (heel regs aan die middelste tafel).

Nog 'n beroemde foto is die een van Joseph Goebbels in 1933 by die Volkebond in Genève. Hoewel Goebbels aanvanklik vriendelik was, het hy nors na Eisenstaedt gegluur toe hy die foto neem nadat hy uitgevind het Eisenstaedt is Joods.[6]

In 1935 het fascistiese Italië se naderende inval in Ethiopië gelei tot nuwe internasionale belangstelling in Ethiopië. Terwyl hy vir Berliner Illustrierte Zeitung gewerk het, het Eisenstaedt meer as 3 500 foto's in Ethiopië geneem voordat hy na die VSA geïmmigreer het. Hier het hy by Life aangesluit, maar hy het die volgende jaar na Ethiopië teruggekeer om nog foto's te neem.[7]

Die verdrukking van Jode in Duitsland het Eisenstaedt se familie genoop om na die VSA te immigreer.[8] Hulle het in 1935 daar aangekom en in New York gaan woon, waar hy 'n Amerikaanse burger geword het.[9]

In 1936 het die stigter van Time, Henry Luce, Life gekoop en Eisenstaedt, wat reeds in Europa bekendheid verwerf het met sy werk,[5] is gevra om as een van die vier oorspronklike fotograwe by die tydskrif aan te sluit, saam met onder andere Margaret Bourke-White en Robert Capa.[8] Hy het tot in 1972 'n Life-fotograaf gebly en bekendheid verwerf met sy fotojoernalisme oor veral nuusgebeure en bekendes.[2]

Benewens vermaaksterre het hy vir Life politici, kunstenaars, industrialiste en skrywers afgeneem. Teen 1972 het hy amper 2 500 fotoreekse afgeneem en meer as 90 van sy foto's het op Life se voorblad verskyn. Danksy die tydskryf se sirkulasie van meer as twee miljoen lesers, het Eisenstaedt se reputasie aansienlik gestyg.[5] Volgens een historikus het sy foto's 'n "krag en simboliese resonansie gehad wat hom een van Life se beste fotograwe gemaak het".[10] In die jare daarna het hy ook vir Harper's Bazaar, Vogue, Town & Country en ander tydskrifte gewerk.[10]

Martha's Vineyard

[wysig | wysig bron]
Eisenstaedt neem op Martha's Vineyard foto's van die Clinton-gesin.

Eisenstaedt, wat onder sy goeie vriende as "Eisie" bekend was, het 50 jaar lank sy jaarlikse somervakansies in Augustus op die eiland Martha's Vineyard deurgebring. In dié tyd het hy fotografiese eksperimente in natuurlike lig uitgevoer, met verskillende lense, filters en prismas. Hy was lief vir Martha's Vineyard se fotogeniese vuurtoring en was die fokus van geldinsamelaars van die Vineyard Environmental Research Institute (VERI) vir die vuurtoring.

Twee jaar voor sy dood het Eisenstaedt oudpresident Bill Clinton, sy vrou, Hillary, en dogter, Chelsea, op Martha's Vineyard afgeneem. 'n Foto van die geleentheid is geneem en het op 13 September 1993 in die tydskrif People verskyn.[11]

Latere lewe en dood

[wysig | wysig bron]

Eisenstaedt het vir die res van sy lewe in New York gewoon. Tot kort voor sy dood het hy elke dag van sy huis na Life se kantore gestap.[12]

In 1989 is die Amerikaanse Nasionale Kunstemedalje deur die destydse president George H.W. Bush tydens 'n seremonie by die Withuis aan hom toegeken.[13] Eisenstaedt is op 23 Augustus 1995 om middernag oorlede, op 96-jarige ouderdom.[2]

Verwysings

[wysig | wysig bron]
  1. ↑ Hudson, Berkley (2009). Sterling, Christopher H. (red.). Encyclopedia of Journalism. Thousand Oaks, CA: SAGE. pp. 1060–1067. ISBN 978-0-7619-2957-4.
  2. ↑ 2,0 2,1 2,2 2,3 "Alfred Eisenstaedt, Photographer of the Defining Moment, Is Dead at 96". The New York Times. 25 Augustus 1995. Besoek op 21 Julie 2007.
  3. ↑ Zone, Ray (2007). "Alfred Eisenstaedt".
  4. ↑ Loengard, John (1998). Life photographers : what they saw. Boston, Mass.: Little, Brown. p. 13. ISBN 0-8212-2518-9.
  5. ↑ 5,0 5,1 5,2 5,3 "Speaking of Pictures: Eisenstaedt has a 15th Anniversary". Life. 4 September 1944. p. 13.
  6. ↑ Behind the Picture: Joseph Goebbels Glares at the Camera, Geneva.
  7. ↑ Pankhurst, Richard; Gérard, Denis (1996). Ethiopia Photographed: Historic Photographs of the Country and its People Taken Between 1867 and 1935. Londen: Kegan Paul International. p. 34. ISBN 9780710305046.
  8. ↑ 8,0 8,1 Cement, James, red. (2007). The Home Front Encyclopedia. Santa Barbara, CA: ABC-CLIO. p. 585.
  9. ↑ Morgan, Ann Lee, red. (2007). The Oxford Dictionary of American Art and Artists. Oxford University Press. pp. 144–145. ISBN 978-0-19-512878-9.
  10. ↑ 10,0 10,1 Marter, Joan M., red. (2011). The Grove Encyclopedia of American Art. Vol. I. Oxford University Press. p. 156.
  11. ↑ "Star Tracks". People. 13 September 1993. Geargiveer vanaf die oorspronklike op 8 September 2015.
  12. ↑ Grundberg, Andy (12 November 1988). "Alfred Eisenstaedt, 90: The Image of Activity". The New York Times. Besoek op 25 September 2007.
  13. ↑ Lifetime Honors – National Medal of Arts Geargiveer 21 Julie 2011 op Wayback Machine

Skakels

[wysig | wysig bron]