Amadeus Kwartet
Amadeus Kwartet | |
|---|---|
| Ook bekend as | Brainin Kwartet |
| Jare aktief | 1947 – 1987 |
Die Amadeus Kwartet was 'n wêreldbekende strykkwartet wat in 1947 gestig was en in 1987 ontbind het. Die kwartet is merkwaardig in die opsig dat dit regdeur sy lang bestaan sy oorspronklike stigterslede behou het. Die violiste Norbert Brainin (12 Maart 1923 – 10 April 2005), Siegmund Nissel (3 Januarie 1922 – 21 Mei 2008) en Peter Schidlof (9 Julie 1922 – 16 Augustus 1987; later 'n altviolis) was as gevolg van hul Joodse oorsprong uit Wene verdryf na Hitler se Anschluss van 1938. Brainin en Schidlof het in 'n Britse interneringskamp by Prees Heath ontmoet voordat hulle oorgeplaas is na die Eiland van Man. Dit het baie Joodse vlugtelinge wat toevlug in die Verenigde Koninkryk gesoek het te beurt geval om op noodlottige wyse deur die Britte ingeperk te word as vyandige vreemdelinge. Brainin was na 'n paar maande vrygelaat, maar Schidlof het in die interneringskamp gebly waar hy met Nissel kennis gemaak het. Schidlof en Nissel was uiteindelik vrygelaat, en die drie van hulle kon onder die vioolonderwyer Max Rostal studeer, welke hulle gratis onderrig gegee het. Dit was deur Rostal dat hulle die tjellis Martin Lovett ontmoet het (gebore op 3 Maart 1927), en in 1947 het hulle die Brainin Kwartet gevorm, welke in 1948 hernoem sou word na die Amadeus Kwartet.
Die groep het op 10 Januarie 1948 hul eerste uitvoering as die Amadeus Kwartet by Wigmore Hall in Londen gegee, onderskryf deur die Britse komponis en dirigent Imogen Holst.[1] Op 25 Januarie 1983 het die Kwartet 'n 35ste herdenkingskonsert in dieselfde konsertsaal gegee met 'n program wat Beethoven se Strykkwartet in C majeur, Op. 59 No. 3 ( die 3rde Razoemofski Kwartet) ingesluit het. Die Kwartet het op uitgebreide wyse getoer en het regdeur Europa, Kanada, die Verenigde State, Japan, en Suid-Amerika getoer. Hulle was bekend om hul gesofistikeerde styl, moeitelose ensemble spel, en sensitiewe interpretasies. Die kwartet het sowat tweehonderd opnames gemaak, onder meer die volledige kwartette van Ludwig van Beethoven, Johannes Brahms, en Wolfgang Amadeus Mozart. Hulle het vir konserte sowel as opnames van strykkwintette (Mozart, Franz Schubert, Johannes Brahms, Anton Bruckner) en die stryksekstette van Brahms op gereelde basis vir Cecil Aronowitz as tweede altviool en William Pleeth as tweede tjello uitgenooi. Alhoewel hulle die klem geplaas het op die standaard Klassieke en Romantiese repertoire, het hulle ook werke deur 20ste eeuse komponiste soos Béla Bartók en Benjamin Britten, wat sy Derde Strykkwartet vir die kwartet gekomponeer het, gespeel.
Die Amadeus Kwartet was een van die mees gevierde kwartette van die Twintigste eeu, en die kwartet se lede is met verskeie eerbewyse bekroon, insluitende:
- Die orde van die Britse ryk.
- Doktorale grade van die universiteite van Londen, York, en Caracas.
- Die hoogste van alle Duitse toekennings, die Federale Kruis van Verdienstelikheid.
- Die Oostenrykse Kruis van Eer vir die Kunste en Wetenskappe.
Die kwartet het in 1987 by die dood van die altviolis Peter Schidlof, wie as onvervangbaar beskou was deur die oorblywende lede, ontbind. Brainin het op 10 April 2005 beswyk[2] en Nissel op 21 Mei 2008.[1] Lovett is die enigste oorlewende.
Verwysings
[wysig | wysig bron]- ↑ 1,0 1,1 "Obituary of Nissel (Daily Telegraph 24 Mei 2008)". Geargiveer vanaf die oorspronklike op 7 September 2008. Besoek op 11 September 2019.
- ↑ Obituary of Brainin (Daily Telegraph 11 April 2005)
Bykomende leeswerk
[wysig | wysig bron]- Muriel Nissel, Married to the Amadeus: Life with a String Quartet, ISBN 1-900357-12-7, Giles de la Mare Uitgewers Beperk
