Faye Dunaway

Dorothy Dunaway
'n Beeld van die betrokke persoonlikheid.
Dunaway in 2011 by die Cannes-rolprentfees.
Geboortenaam Dorothy Faye Dunaway
Geboorte 14 Januarie 1941 (1941-01-14) (83 jaar oud)
Bascom, Florida, Verenigde State
Nasionaliteit Vlag van Verenigde State van Amerika Verenigde State
Ouers Grace April (née Smith)
John MacDowell Dunaway, Jr.
Lewensmaat Peter Wolf (1974–79)
Terry O'Neill (1983–87)
Kinders Liam O'Neill (* 1980)
Beroep(e) Aktrise
Aktiewe jare 1962–hede
Internet-rolprentdatabasis-profiel

Dorothy Faye Dunaway (gebore op 14 Januarie 1941) is ’n Amerikaanse aktrise wat veral bekend is vir haar rolprentrolle van die 1960's af.

Loopbaan

[wysig | wysig bron]
In die 1971-toneelstuk Hogan's Goat.
Saam met Mirosław Baka in Balladyna.

Dunaway se loopbaan het in die vroeë 1960's op Broadway begin. Sy het haar rolprentdebuut in die 1967-fliek The Happening gemaak, ook met Anthony Quinn, en dit is gevolg deur 'n byspelerrol in die prent Hurry Sundown (ook 1967), met Michael Caine en Jane Fonda as medespelers.

In dieselfde jaar nog het sy beroemd geraak danksy haar rol as Bonnie in die rampokkerprent Bonnie and Clyde, ook met Warren Beatty as Clyde. Die prent was omstrede, maar ’n groot treffer. Volgens Newsweek was Dunaway se spel "die openbaring van die jaar" en die tydskrif het haar met die aktrise Marilyn Monroe vergelyk.[1] Die fliek is vir 10 pryse benoem, onder meer Oscar vir beste prent en vir beste aktrise (vir Dunaway, maar sy het teen Katharine Hepburn verloor). Dunaway het wel die Bafta vir die mees belowende nuweling gewen.

Van haar latere noemenswaardige prente sluit in die misdaadfliek The Thomas Crown Affair (1968), die neo-noir-raaiselprent Chinatown (1974), waarvoor sy haar tweede Oscar-benoeming gekry het, die rampdrama The Towering Inferno (1974), die politieke riller Three Days of the Condor (1975) en die satiriese Network (1976), waarvoor sy die Oscar vir beste aktrise gewen het.

Daarna het sy meer karakterrolle vertolk, dikwels in onafhanklike prente. Die eerste was haar vertolking van Joan Crawford in die 1981-prent Mommie Dearest. Ander prente sluit in die riller Eyes of Laura Mars (1978), die drama Barfly (1987) en die surrealistiese komediedrama Arizona Dream (1993).

Dunaway het drie Golden Globes, ’n Bafta en ’n Emmy gewen, en was die eerste ontvanger van ’n Leopard Club-prys op die Locarno-rolprentfees. In 2011 het die Franse regering haar ’n offisier van die land se Orde van Kuns en Lettere gemaak.

Verwysings

[wysig | wysig bron]
  1. ↑ Hoofartikel, Newsweek, 4 Maart 1968 | http://magazines.famousfix.com/tpx_2785307/newsweek-magazine-united-states-4-march-1968/ Geargiveer 30 Oktober 2015 op Wayback Machine

Eksterne skakels

[wysig | wysig bron]