Frank Abagnale jr.

Frank Abagnale jr.
Frank Abagnale in 2007
Gebore	Frank William Abagnale jr. 27 April 1948 Bronxville, New York
Nasionaliteit	Verenigde State
Beroep	Uitvoerende hoof van Abagnale & Associates (sekuriteit konsultante)
Eggenoot	Kelly
Kinders	Scott, Chris, Sean

Frank William Abagnale jr. (* 27 April 1948) was 'n Amerikaanse bedrieër wat in die sestigerjare vyf jaar lank aktief was. Deesdae is hy die baas van Abagnale & Associates, 'n bedrogkonsultasieburo.

Jeug

Abagnele het in in Bronxville, New York, grootgeword as die derde van vier kinders. Hy het in sy jeug 'n Katolieke skool bygewoon. Sy ouers is in 1964 geskei en dit was vir hom so traumaties dat hy van die huis af weggeloop het.

Bankbedrog

Sy eerste oortreding was die uitskryf van tjeks terwyl daar nie genoeg geld in sy rekening was nie. Dit het net vir 'n kort tydperk gewerk voordat die bank daarop aangedring het dat hy geld in sy rekening inbetaal. Hy het toe ’n paar identiteite aangeneem en verskeie rekeninge by verskillende banke oopgemaak.

Ná 'n tyd het hy agtergekom dit is makliker om vals tjeks te druk en hulle te wissel. Hy het die banke uit altesaam 2,5 miljoen dollar gekul.

Identiteitsbedrog

Om gratis oor die wêreld heen te vlieg het Abagnale hom voorgedoen as ’n fiktiewe Pan Am-vlieënier, Frank Williams. Hy het die lugdiens gebel en gesê hy is een van hul vlieëniers, maar het sy uniform verloor. Hy het dan met ’n vals ID-dokument ’n nuwe uniform gekry. Pan Am het geskat dat hy tussen die ouderdomme van 16 en 18 meer as ’n miljoen lugmyle (1 600 000 km) op meer as 250 vlugte gevlieg en 26 lande besoek het. As vlieënier het hy gratis by hotelle gebly – die maatskappy het die rekening vir alles gekry, van sy verblyf tot sy kos.

Later het Abagnale hom as ’n kinderarts voorgedoen. Deur bevriend te raak met 'n regte dokter het hy 'n bestuursposisie in 'n hospitaal gekry. Daar is hy amper afgedank omdat hy byna 'n baba laat verstik het, want hy het nie verstaan wat die suster vir hom sê nie. Hy het toe ander vir hom die werk laat doen. Ná 11 maande by die hospitaal het hy 'n ander "werk" gekry en bedank.

Veroordeling en verdere loopbaan

Abagnale is uiteindelik in Frankryk gevang. Nadat hy daar en in Swede verhoor is, is hy aan Amerika uitgelewer, waar hy tot twaalf jaar gevangenisstraf gevonnis is.

Nadat hy vyf jaar uitgedien het, het die Amerikaanse regering Abagnale vrygelaat onder die voorwaarde dat hy die regering sou help met die bestryding van bedrog. Ná sy vrylating het hy verskillende poste beklee, maar is in die meeste gevalle afgedank sodra sy misdaadagtergrond ontdek is. Ontevrede met sy situasie, het Abagnale op 'n dag by 'n bank ingestap met 'n voorstel. Hy het aangebied om die bankpersoneel voorligting te gee oor allerhande bankbedrogtegnieke. As sy voorligting nie waardevol was nie, was hulle hom niks verskuldig nie. As hulle dit wel waardevol gevind het, moes hulle hom $500 betaal en sy dienste by ander banke aanbeveel. Dit was 'n groot sukses.

Later het hy Abagnale & Associates gestig wat raad en voorligting oor bedrogbestryding gegee het. Die sukses van sy besigheid het hom genoeg geld in die sak gebring om al sy skuld uit die verlede te vereffen en 'n multimiljoenêr te word.

Rolprent

In 2002 is sy lewensverhaal deur die regisseur Steven Spielberg verfilm met die titel Catch Me If You Can, met musiek deur John Williams. Sy rol is vertolk deur Leonardo DiCaprio. Die rol van sy pa (Frank Abagnale sr.) is vertolk deur Christopher Walken en dié van sy ma (Paula Abagnale) deur Nathalie Baye. Een van die FBI-agente wat sy saak ondersoek het, is in die rolprent die fiktiewe agent Carl Hanratty (Tom Hanks).

Abagnale self het 'n klein rolletje in die film vertolk as 'n polisie-agent.

Musiekspel

In April 2011 is 'n Broadway-musiekspel oor sy verhaal gemaak. Dit is al vir vier Tony-pryse benoem.

Verwysings

Eksterne skakels

• www.abagnale.com Amptelike webwerf met onder meer 'n biografie