Riana Nel
Riana Nel | |
|---|---|
| Gebore | 9 November 1981 Windhoek, Namibië |
| Genres | Geestelik |
| Beroep(e) | Sangeres |
| Etikette | Maranatha, Coleske Artists |
| Webwerf | riananel.co.za |
Riana Nel is 'n Suid-Afrikaanse sangeres wat op 9 November 1981 in Windhoek, Suidwes-Afrika gebore is.[1] Sy sing hoofsaaklik geestelike liedjies in Afrikaans en Engels.[2] Sy wen die ATKV se Crescendo-sangkompetisie in 2000 en stel haar debuutalbum in 2001 vry. Riana is die suster van Nianell, 'n befaamde sangeres in eie reg.
Biografie
[wysig | wysig bron]Riana is van kleins af aan musiek blootgestel en het van vroeg af voor die klavier ingeskuif aangesien sy uit 'n baie musikale gesin kom. Haar talent en passie vir musiek was duidelik sigbaar. In 1996 het sy vir die eerste keer aan Crescendo, saam met Joe Niemand en komponis en liedjieskrywer Machiel Roets, deelgeneem. In 2000 het sy weggestap met die gesogte titel.
Haar gewildheid in Namibië het daarna vinnig toegeneem en sy is as wenner aangewys by die Jubelfees. Die wenners by die fees het almal op die program, Pasella, verskyn en dis waar gospelsanger, Louis Brits, haar raakgesien het. Hy het haar gevra of sy sou belangstel om saam met hom te toer.
Sy moes 'n keuse maak tussen gospel en die sekulêre mark. Kort daarna het sy op 19-jarige ouderdom na Pretoria verhuis en saam met Louis as agtergrondsangeres getoer, maar sy het talle kere ook die gehoor met haar eie komposisies vermaak. Daarna sy haar eie platekontrak by Maranatha losgeslaan. Met die sukses van haar eerste album, Oopmond, het sy besluit om oorsee te gaan.
Gou het sy harte in Engeland, Holland en Frankryk gewen en 'n Europese verspreidingskontrak met Authentic geteken. Terug in Suid-Afrika het sy in 2001 verder opslae by die Geraas Toekennings gemaak, waar sy as beste nuwe sanger saam met Karen Zoid, asook beste nuwe Gospel Sanger aangewys is. Daarna het sy die Lier-toekenning vir Beste Nuwe Kunstenaar en Beste Vroulike Vokaal ontvang.
Haar tweede album, The Cure, en haar derde album, Someone with Skin, was oorheersend Engels en op die oorsese mark gerig, maar dit is steeds in Suid-Afrika opgeraap. Intussen het Riana betrokke begin raak by projekte: saam met Retief Burger by die Godly Revolution en Youth Revolt. Sy verskyn ook op die Peacemaker en Onbeskaamd albums. In 2010 het sy 'n duet opgeneem saam met haar suster, Nianell, op dié se album, Sand & Water. In 2011 het haar musiekloopbaan 'n ander wending geneem toe sy met die hulp van die platemaatskappy, Coleske Artists, tot die sekulêre mark toegetree het. Net soos haar gospel liedjies, bevat haar sekulêre albums ook diep boodskappe wat veral op paartjies en enkellopendes gemik is.
Haar album Die moeite werd het die dubbel platinum merk (80 000 eenhede) oorskry en met vyf nommer-1 radiotreffers word sy as een van die grootste sangeresse in die land beskou. In 2012 kry sy die Tempo-toekenning vir die gewildste popalbum en by die Ghoema-toekennings in 2013 deel sy die gesogte titel van Liedjieskrywer van die Jaar met Johan Vorster.
Sy skryf ook liedjies vir talle plaaslike kunstenaars soos Juanita du Plessis, Jay, Lianie May, Bobby van Jaarsveld, ensovoorts. Haar gewilde treffers "Dans" en "Timbuktu" is op die klankbaan van die romantiese komedie, Semi-Soet, gebruik en ook "Maak oop jou oë" in die fliek Klein Karoo.
Sy is getroud met Cornel de Beer in 2013 en hul eerste seun, Tristan, is gebore in Februarie 2016 en hul tweede in September 2017.
Sterker (2019)
[wysig | wysig bron]Nel se album Sterker word in 2019 vrygestel en bereik nommer-1 op iTunes.[3]
Diskografie
[wysig | wysig bron]Ateljeealbums
[wysig | wysig bron]- Oopmond (2001)
- The Cure (2003)
- Someone with skin (2005)
- Collection Set (2006)
- Die Moeite Werd (2011)
- Die Regte Tyd (2014)
- Jy Sal Weet (2016)[4]
- Sterker (2019)[5][3]
Versamelalbums
[wysig | wysig bron]- Gospel in die drama DVD
Filmografie
[wysig | wysig bron]Rolprente waarin Nel verskyn het:
- 'n Saak van geloof, 2011
Verwysings
[wysig | wysig bron]- ↑ "Musiek is haar getuienis". Geargiveer vanaf die oorspronklike op 9 Oktober 2019. Besoek op 27 Maart 2017.
- ↑ "Riana Nel webwerf". Geargiveer vanaf die oorspronklike op 9 Julie 2019. Besoek op 27 Maart 2017.
- ↑ 3,0 3,1 Janie Monsieur (2 Augustus 2019). "Video: Riana Nel maak hart oop oor struwelinge". Maroela Media. Geargiveer vanaf die oorspronklike op 15 Oktober 2019. Besoek op 2 Augustus 2019.
- ↑ "Revolvy: Riana Nel". Besoek op 28 Maart 2017.
- ↑ Leonie Bezuidenhout (8 Julie 2019). "Riana Nel oor tragedie agter nuwe enkelsnit". Maroela Media. Geargiveer vanaf die oorspronklike op 23 Augustus 2019. Besoek op 13 Julie 2019.
Sien ook
[wysig | wysig bron]Eksterne skakels
[wysig | wysig bron]
