Russel Botman | |
|---|---|
| Gebore | Hayman Russel Botman 18 Oktober 1953 |
| Sterf | 28 Junie 2014 |
| Nasionaliteit | Suid-Afrika |
| Beroep | Predikant, akademikus |
| Eggenoot | Beryl Verna Botman |
| Kinders | Hayman, Lazelle, Ilze en Roxanne |
Russel Botman was van 2007 tot sy dood in 2014 die rektor en visekanselier van die Universiteit van Stellenbosch in die Wes-Kaap. Hy was 'n internasionaal bekende teoloog wat die Wêreld Alliansie van Gereformeerde Kerke in Genève oor verskeie aangeleenthede geadviseer het. Hy het ook as die president van die Suid-Afrikaanse Raad van Kerke gedien.
Hayman Russel Botman is op 18 Oktober 1953 in Bloemfontein gebore, maar voltooi sy skoolloopbaan in Kliptown, Johannesburg. Hy verwerf later 'n BA, MTh (cum laude) asook 'n doktoraat in teologie van die Universiteit van Wes-Kaapland. In 1976 was hy 'n lid van die universiteit se studenteraad en later 'n predikant van die Nederduitse Gereformeerde Sendingkerk in Wynberg, Kaapstad.[1]
Botman het in 2000 as 'n professor in Praktiese Teologie en Missiologie by die Universiteit van Stellenbosch aangesluit. In 2007 neem hy die leisels as rektor en visekanselier by Chris Brink oor. In 2012 is sy termyn vir 'n verdere vyf jaar verleng.
Hy is op 28 Junie 2014, op 60-jarige ouderdom na 'n hartaanval in sy slaap oorlede. Hy laat sy vrou, Beryl, en kinders, Hayman, Lazelle, Ilze en Roxanne agter.[2]