Saint-Jean-Cap-Ferrat

Saint-Jean-Cap-Ferrat
Uitsig oor die Kaap Ferrat
Uitsig oor die Kaap Ferrat
Wapen van Saint-Jean-Cap-Ferrat
Wapen
Saint-Jean-Cap-Ferrat is in Frankryk
Saint-Jean-Cap-Ferrat
Saint-Jean-Cap-Ferrat
Koördinate: 43°41′00″N 7°20′00″O / 43.68333°N 7.33333°O / 43.68333; 7.33333
LandVlag van Frankryk Frankryk
Gewes Provence-Alpes-Côte d'Azur
Département Alpes-Maritimes
ArrondissementNice
KantonVillefranche-sur-Mer
Stigting6de eeu
Regering
 • BurgemeesterRené Vestri
Oppervlak
 • Totaal2,48 km2 (0,96 vk. myl)
Hoogte
0–138 m (0–453 ft)
Bevolking
 • Totaal2 085
 • Digtheid841/km2 (2 180/vk. myl)
Poskode
06230
Skakelkodes06121
Webwerfville-saint-jean-cap-ferrat.fr

Saint-Jean-Cap-Ferrat is 'n dorp in die département Alpes-Maritimes in die suid-ooste van Frankryk met 'n oppervlakte van 2,48 vierkante kilometer en 2 085 inwoners. Dit lê aan die Côte d'Azur, sowat 10 kilometer van Nice, 25 kilometer van Menton en 950 kilometer van Parys.

Die dorp lê op 'n skiereiland naby Beaulieu-sur-Mer en Villefranche-sur-Mer en strek tot by die Kaap Ferrat (Frans: Cap Ferrat). Sy rustigheid en milde klimaat maak van Saint-Jean-Cap-Ferrat 'n gewilde bestemming vir welgestelde toeriste. Die dorp bekoor met 'n kuslyn van veertien kilometer met talle klein baaie, strande en ou dennebome.

Maar die dorp en sy skiereiland staan veral bekend vir sy luukse huise. Saint-Jean-Cap-Ferrat is steeds 'n gewilde verblyfplek vir adellikes, politikusse, akteurs, sangers, skrywers, skilders en sakemanne, wat hier dikwels tydens die wintermaande bly.

Teen die begin van die 20ste eeu besit ook die Belgiese koning Léopold II 'n landgoed in die dorp, wat onder meer die Villa des Cèdres met sy kenmerkende Sardiese boustyl insluit. Dit is tans 'n botaniese tuin ("Les Cèdres").

Geskiedenis

[wysig | wysig bron]
Die vuurtoring van Kaap Ferrat

In die antieke tydperk staan Saint-Jean-Cap-Ferrat onder die naam Anao bekend; aanvanklik is dit 'n Liguriese nedersetting, wat omtrent 575 deur die Langobarde verower word. Die hermiet Saint-Hospice bewoon hier tot by sy dood in die jaar 580 'n toring in die oostelike deel van die skiereiland. In die 8ste eeu beset die Sarasene die gebied; hulle word eers in die 11de eeu weer verdryf.

Saint-Jean-Cap-Ferrat maak later deel uit van die graafskap Nice, totdat dit in 1388 by die hertogdom Savoie ingelyf word. Onder die heerskappy van die hertog Emmanuel-Philibert van Savoie word die fort Saint-Hospice opgerig. By die verowering van Nice deur Franse troepe onder die bevel van die hertog de Berwick word die vesting in die jaar 1706 ingeneem en verniel.

Die dorp is in die tydperk tussen 1720 en 1820 herhaaldelik deur die Franse beset; in 1860 word dit vir goed saam met die graafskap Nice by Frankryk ingelyf.

Tot by die jaar 1904 vorm die dorp in administratiewe opsig 'n deel van die munisipaliteit Villefranche-sur-Mer. Vandag is dit een van die duurste woongebiede langs die Côte d'Azur.

Die vuurtoring en die semafoor

[wysig | wysig bron]

Die Kaap Ferrat word lankal as 'n belangrike punt vir die skeepvaart langs die kus van Nice en as 'n geskikte plek vir die oprigting van 'n vuurtoring beskou. Die Sardiese vuurtoring uit die jaar 1827 is in 1944 deur Duitse troepe verwoes. Sy huidige opvolger ontstaan in die tydperk tussen 1949 en 1951; met 'n hoogte van 71 meter versprei hy sy lig oor 'n afstand van sowat 45 kilometer.

Kaap Ferrat beskik ook oor 'n semafoor, wat in 1862 volgens 'n besluit van Napoléon III as deel van 'n beplande seinketting langs die kuslyn opgerig is. Dit word vandag deur die Nasionale Vloot van Frankryk beheer en speel ook 'n belangrike rol by die opsporing van bosbrande in die kusgebied.

Eksterne skakels

[wysig | wysig bron]