Sigurd Slang-in-die-oog

'n Graveerwerk uit 1670.

Sigurd Slang-in-die-oog (Oudnoors: Sigurðr ormr í auga) of Sigurd Áslaugsson was 'n halflegendariese Wikingvegter en Deense koning wat van die middel van die 9de eeu af aktief was. Volgens verskeie sagas en Skandinawiese geskiedenisbronne uit die 12de eeu en later is hy een van die seuns van die legendariese Wiking Ragnar Lodbrok en sy tweede vrou, Aslaug.[1]

Sy historiese prototipe kon die Deense koning Sigfred gewees het wat in die 870's vir 'n kort rukkie regeer het.[2] Volgens Noorweegse koninklike stambome uit die Middeleeue is hy 'n voorouer van Harald Skoonhaar en het hy sy ma se beweerde afstamming gebruik om te bewys hy stam van die Noorse god Odin af.

Vroeë lewe

[wysig | wysig bron]

Sy bynaam "Slang-in-die-oog" dui op 'n spesifieke karaktertrek. Hy is gebore met 'n merk in die vorm van 'n slang om sy een pupil.

Toe Sigurd nog jonk was, is sy halfbroers, Erik en Agnar, deur die Sweedse koning Eysteinn Beli vermoor. Hulle stiefmoeder, Aslaug, en sy ander halfbroers Björn Ysterkant en Hvitserk het daarop met 'n groot leër na Swede geseil.[3] Die daaropvolgende geveg het geëindig met Eysteinn se dood.[4]

Aelle vermoor Ragnar Lodbrok.

Ragnar se dood

[wysig | wysig bron]

Volgens die meeste sagas het koning Aelle van Northumbria Ragnar vermoor deur hom in 'n slangput te gooi. Ragnar se seuns het wraak gesweer en Engeland aangeval. Volgens die Verhaal van Ragnar se seuns het hulle Aelle gevange geneem en uit wraak vir Ragnar se dood die "bloedarend" op sy rug uitgekerf. Ragnar se seuns het daarna Engeland, Wallis, Frankryk en Italië geplunder. Toe hulle terugkeer na Skandinawië het hulle die koninkryk tusen hulle verdeel.

Afstammelinge

[wysig | wysig bron]

Sigurd Slang-in-die-oog het met koning Aelle se dogter Blaeja getrou en hulle het 'n seun, Hartaknoet, gehad wat sy pa opgevolg het as koning van onder meer Seeland en Skone. Volgens die 11de-eeuse kroniekskrywer Adam van Bremen was Hardegon (moontlik Hartaknoet) die seun van 'n sekere Sven.

Hartaknoet het 'n seun, Gorm, gehad wat hom as koning opgevolg het. Gorm se seun Harald Bloutand het sy pa opgevolg. Harald het 'n seun met die naam Sven Vurkbaard gehad. Dié se seun was Knoet die Grote. Sven het in sy leeftyd ook oor Engeland regeer en die Deense Ryk gestig. Toe Sven sterf, het sy oudste seun, Harald Svendsen koning van Denemarke geword, terwyl Engeland se voormalige koning Ethelred die troon daar bestyg het. Ná Harald se dood het sy broer, Knoet die Grote, koning van Denemarke geword. Ná Knoet het sy seun Hartaknoet koning van Engeland en Denemarke geword. Toe hy sterf, het Eduard die Belyer in 1042 koning van Engeland geword.[5]

Sven Vurkbaar het 'n dogter Estrid gehad van wie alle heersende konings en koninginne van Denemarke ná 1047 afstam.

TV-reeks

[wysig | wysig bron]

Sigurd Slang-in-die-oog speel 'n groot rol in die televisiereeks Vikings. Sy rol word deur David Lindström vertolk.[6]

Verwysings

[wysig | wysig bron]
  1. ↑ "Þáttr Af Ragnars Sonum" [Tale of Ragnar's sons]. Fornaldarsögur Norðurlanda (in Yslands). Maart 1998.
  2. ↑ Rory McTurk, "Kings and kingship in Viking Northumbria", [1]
  3. ↑ Verhaal van Ragnar se seuns, hoofstuk 2[2]
  4. ↑ Krákumál by "Skaldic Poetry of the Scandinavian Middle Ages".
  5. ↑ Lunga, Peter. "Hardeknud – av England og Danmark" [Harthacnut – of England and Denmark]. Store norske leksikon (in Noors). Besoek op 15 Desember 2016.
  6. ↑ "Sigurd Snake in the Eye - Vikings Cast | HISTORY". HISTORY (in Engels).

Bronne

[wysig | wysig bron]

Nog leesstof

[wysig | wysig bron]

Skakels

[wysig | wysig bron]


  • Hierdie artikel is in sy geheel of gedeeltelik uit die vertaal.