Sonja Herholdt

Sonja Herholdt
Gebore	1 Desember 1952 (72 jaar oud) ; Nigel, Suid-Afrika
Beroep(e)	Sangeres, aktrise
Jare aktief	1976 – nou
Etikette	BMG-rekords, Marantha-rekords, Son Music
Webwerf	www.sonjaherholdt.co.za

Sonja Herholdt (gebore 1 Desember 1952) is 'n Suid-Afrikaanse aktrise en sangeres wat bekend geword het vir liedjies soos Ek verlang na jou, Harlekyn, Waterblommetjies, Skipskop en Jantjie.

Jeug en uitbeelding

Herholdt is op 1 Desember 1952 in Nigel gebore. Sy was hoofmeisie van die Laerskool Tienie Vorster in Nigel en later hoofmeisie van die Hoërskool John Vorster waar sy ere-kleure vir akademiese- en dramaprestasies ontvang het. Sy het aan die Goudstadse Onderwyskollege studeer waar sy haar onderwysdiploma cum laude behaal het en die Voortrekkerpers-trofee as student van die jaar in haar finale jaar verower het.

Loopbaan

Tydens haar studies het sy 'n dosent, FC Hamman, by 'n nabygeleë kunskollege ontmoet. Hy het vryskut rolprentwerk gedoen en was vir ses weke in die Kalahari om aan die rolprent Sarah te skiet. Met sy terugkoms het Sonja die lied Ek verlang na jou gesing en hy het besluit om dit te verwerk en te gebruik vir die rolprent.

Anton Goosen word haar liedjieskrywer en tussen 1976 en 1980 het sy landwye sukses met treffers soos Jantjie, Waterblommetjies Ta' Mossie se sakkie-sakkie Boeredans, Harlekyn, Trein na Matjiesfontein, Umfaan ens.

In 1989 word Sonja genooi om tydens ‘n Gebedsontbyt van die National Religious Broadcasting Corporation in Washington op te tree. Dié optrede, wat saam met die uitreiking van haar Gospel plaat The Warrior is a Child plaasvind, is op televisie uitgesaai. Sonja tree vir meer as ‘n halfuur as enigste gaskunstenaar op voor onder andere die vise-president van Amerika.

In 1993 word haar jongste, Timothy, op die ouderdom van 2 jaar doof na ‘n siekte. Sy begin ‘n klas vir gehoor- en taalgestremde kleuters ter wille van hom, omdat daar nie soortgelyke skole is vir Afrikaanssprekende kinders in Johannesburg nie. Die klassie word gehuisves by die pre-primêre afdeling van die Laerskool Bryanston en sy het vir vyf jaar daar skool gehou.

In 1995 teken sy ‘n kontrak met BMG-Records en in 1996 met Maranatha Records vir ‘n geestelike album, Môre sal die Son weer Skyn. Skipskop is ‘n kompilasie-album van BMG wat in dié tyd baie goed verkoop as gevolg van die treffertitelsnit. Met al haar verantwoordelikhede en optredes naweke, kom haar lewe tot stilstand wanneer sy in ‘n ernstige motorongeluk is en haar forseer om haar lewe in oënskou te neem.

Nadat haar huwelik met FC ontbind is, het sy weer die verhoog betree. In 2002 stig sy haar eie platemaatskappy, Son Musiek, wat ook die album Sonjare vrygestel het. In 2007 publiseer Sonja haar biografie, Sonja, meisie van Nigel, in samewerking met haar vriend Carel Cronjé.

Tussendeur haar CD-opnames toer sy ook landswyd met haar motiveringspraatjies, waar sy haar lewenservaring kombineer met sang.

Persoonlike lewe

Herholdt skenk geboorte aan vier kinders. Hulle is tussen 1982 en 1991 gebore en hul name is Claudia, Simeon, Jesse en Timothy. Simeon is self 'n noemenswaardige musikant.

Toekennings

Sonja Herholdt ontvang die volgende toekennings:

Jaar	Kategorie	Instansie	Resultaat
1975–1980	Beste Sangeres van die Jaar	Sarie	Wenner
1976	Beste Langspeler van die jaar	Sarie	Wenner
1980	Rapport Oscar, Beste Nuweling Aktrise	Rapport	Wenner
1980	Beste Langspeler van die Jaar	Sarie	Wenner
1991	Erkentlikheidstoekening	Afrikaanse Sakekamer	Wenner
-	Junior Rapportryers-toekenning	Junior Rapportryers	Wenner
-	Rising Star Award	Papillon	Wenner

Diskografie

Albums

Sonja (1976)
Sonja Herholdt (1977)
Waterblommetjies (1978)
On stage/in die kalklig (1978)
Harlekyn (1979)
'n Lied vir kersfees (1979)
Waarom daarom (1981)
Grootste treffers (1980)
Reflections (1982)
Liefdeslig (1984)
Lofsang – Sonja Herholdt en Jan de Wet (1985)
Sonja Herholdt sing die jeugbundel (1987)
Dis net vir jou (1987)
Tuiskoms (1988)
Sonja sing die jeugbundel no. 2 (1988)
The warrior is a child (1989)
Die klokkespel "vrede" (1989)

Gunsteling treffers (1992)
Sê die engele moet na my kyk (1994)
Pêrels (2010)
Ons eie Sonja Herholdt
'n Ster vanaand
Die mense wat ek liefhet
Sonja Herholdt skipskop
'n Ritsel innie rietbos
Dis kersfees
Môre sal die son weer skyn
20 Gunsteling Treffers
Reconstructing Alice
Sonjare
She
Sonja en Tjokker sing kinderliedjies
Pêrels

Filmografie

Sing vir die harlekyn, waar sy die hoofrol teenoor André Swiegers speel.
Liefling, 2010