Abidjan

Bezirk Abidjan
District Logo
(District logo)
Lag vom bezirk
Regjon Lagunes
Guvernör Pierre Djédji Amondji
(FPI) (seit 2002)
Flächi 2,119 km²
Undertilig 10 gmine vo Abidjan (früer Stadt Abidjan)
3 underprefektuure usserhaub
Bevöucherig
inofizjel gschätzt
2003 ofizjel gschätzt
1998 vouchszölig
zwüsche 4 u 5 miljone
3,660,682
3,125,890
Bevöucherigsdichti 1,728/km² (2003)
Web site www.abidjan-da.ci
Dialäkt: Seislertütsch
Klymadyagram vo Abidjan

Abidjan isch a Bezirk i de Laguune-Regjon vo de Côte d'Ivoire. Abidjan isch bis 1983 d'Huptstadt vo Côte d'Ivoire gsy, usserdäm di gröschti Stadt vom Lan. Im Jar 2002 sy di 10 Stadtkreise zu säubständige Gmine uufgwärtet u ds Oberbürgermischteramt abgschaft cho. Syt den bestit Abidjan us 10 Städt u 3 Underprefektuure. Abidjan ligt am Gouf vo Guinea. Di früeri Stadt isch schnäu vo 65.000 Ywoner im Jar 1950 zunera Metropolregjon mit 3.692.570 Ywoner gwachse (stan 1. Januar 2005).

Gschücht

[ändere | Quälltäxt bearbeite]

Ds Wachstum vo de 1886 ggründeti stadt Abidjan het na de Eröfnig vo de Landigsbrügg im jar 1931 agfange. 1934 isch Abidjan zu de Huptstadt vo de wäutschi Kolony Côte d'Ivoire wore. Na de Eröfnig vom Vridi-Kanau isch de Hafe zumena bedüütende Fryhafe cho. Obwou 1983 Yamoussoukro vom damalige Statspresident Felix Houphouet-Boigny zu de nüüi Huptstadt bestümt cho isch, hi sich no ging zaurychi Regierigssbüüros u Botschafte, u o wie d'Nazjonaubibliotek u ds Nazjonaumuseum z'Abidjan befune. Am 9. Ugschte 2001 isch beschlosse cho, d'Stadt per 2002 i iri 10 Kreise uufztile u di zu unabhängige Gminwäse uufzwärte. Syt den isch Abidjan ofizjel a Bezirk mitema Guvernör u vereinigt di 10 Städt mit 3 wytere.

Polytischi Gliderig

[ändere | Quälltäxt bearbeite]

Abidjan isch i 13 Gmine oder Städt uuftüut, wo jedi uber a igeta Stadtrat u Bürgermischter verfüegt. As handlet sich um di fougende 10 Städt, wo bis 2001 d'Stadt Abidjan büudet hi:

  • Abobo: vor alum dür Zuewanderer vom Lan bevöucherti schnäu wachsendi Stadt mitera ungnüegendi Infrastruktuur u ender ärmliche Verhäutnis.
  • Adjamé: chly i de Flächi, aber grosss i de würtschaftlechi Bedüütig dür di briti komerzjele Tätigkite, wo hie abgwicklet chäme. Das füert leider zu grosse gsundhitliche Beyträchtigunge vo de Bevöucherig i de Elendsviertu vo Adjamé.
  • Attécoubé: Ufum Teritorium vo däri Gmin befünt sich de Nazjonaupark vom Banco-waud.
  • Cocody: Di Stadt isch bekant für iri fyne Wonquartier wie zum byspüu Deux-Plateaux oder Riviera. Hie wone näbe Diplomaten u Regierigsmitglider vor alum Berüemthite u Rychi. Usserdäm befünt sich o di statlechi Universität mitum glyche Name, u o as par privati Hochschuele hie. Näbum statliche Fernsee RTI befünt sich o d'Residenz vom Statspresident z'Cocody.
  • Koumassi: mitera grossi Industryzona
  • Marcory: vor alum armselegi Wongebiet.
  • Plateau: Di Gmin büudet ds würtschaftlicha u wyt o ds polytischa Zentrum, o we syt 1983 Yamoussoukro di ofizjeli adminischtratyvi Huptstadt vo Côte d'Ivoire isch. De Presidentepalascht u d'Nazjonauversamlig befüne sich bis auf de hüütiga Tag z'Plateau. D'Wouchechratzer, wo für Afrika ender unüblech sy, gäbe Abidjan as ser moderns Uusgsee.
  • Port-Bouët: I däri Gmin befüne sich d'Rafinerye SIR, de internazjonala Flughafe «Félix Houphouët-Boigny», aber o ds Quartier Adjouffou.
  • Treichville: ds igentlicha Härz vo Abidjan. Näbum Fryhafe befünt sich hie o de Banhof vo de «Abidjan-Niger-Ban» nam Norde vom Lan u Burkina Faso bis Ouagadougou. Näbum Hafe u de derum agsidleti Induschtry isch Treichville Handuszentrum für d'Bewoner vo de Metropole. As imenses Agebot vo Läde u Handlige bietet a enormi Vüufaut a Produkt. Denäbe befüne sich hie o vüu Reschtorants, Kafis u – i de Nacht – as vüusytigs Nachtläbe mit au syne reize u gfare. Au das cha aber nid drüber hinwägtüüsche, dass Treichville hüüt nume no a Abglanz vo sich säuber u a armi afrikaneschi Stadt isch.
  • Yopougon: Di bevöucherigsrychschti Stadt vo de Aglomerazjon vo Abidjan tüut sich i Won- u Industryviertu.

Usserdäm ghöre di 3 Underprefektuure Anyama, Songon u di früeri Huptstadt Bingerville (bis 1933) zum Bezirk Abidjan.

Vercher

[ändere | Quälltäxt bearbeite]
Laguuna
Ds wape vo de früeri Stadt Abidjan
Plateau u d'Ébrié-laguuna
Plateau u d'Ébrié-laguuna fo de nacht vo de pyramyda uus

D'Städte Abobo, Adjamé, Attécoubé, Cocody, Plateau u Yopougon lige ufum Feschtlan nördlich vo de Ébrié-laguuna. Dehär chumt o d'Bezichnig «Abidjan Nord». Treichville, Koumassi, Marcory u Port-Bouët sy a Tüu vo Abidjan süüd. Di beide Tile vo de Metropole chäme zwüsche Treichville u Plateau dür 2 Brügge, de Pont Houphouët-Boigny (yseban u Strass) u de Pont Charles de Gaulle (nume Strass) verbune. I de Stosszyte bricht de Vercher uf de Strasse uber di beide Brügge täglech meemaus zsäme. Us däm Grund het d'Regierig den für a driti Brügg zwüsche Marcory u Cocody Stuudie i uuftrag ggä. Im Agsicht vo de polyteschi Entwicklig z'Côte d'Ivoire syt 1999 rue sythär di entsprächende Planigsarbite. De Grosstüu vo de Bevöucherig bruucht glyych d'Färe uber d'Laguuna.

Würtschaft u Büudig

[ändere | Quälltäxt bearbeite]

Abidjan verfüegt uber a Universität u mereri techneschi Hochschuele.

Bedüütendi Industryzwig sy d'Outomobylfertigung, u d'Houz-, Chemy- u Textylinduschtry. Uber de Häfe vo Abidjan chäme Kafi, Kako, Houz u Ananas verschüft. I de wäutsch prägti Metropole sy o hüüt no vüu Franzose a wichtige Stöle vo de Würtschaft z'füne, bsundersch aber o ser vüu Libanese us Bsitzer vo chlyne Fabrike u vor alum im Handu.

D'Stadt isch Sitz vo de Bourse Régionale des Valeurs Mobilières, de Regjonaubörsa vo de Union Monétaire Ouest Africaine (UMOA).

Persönlechkite

[ändere | Quälltäxt bearbeite]

Stadtpartnerschafte

[ändere | Quälltäxt bearbeite]

Abidjan het fougendi Stadtpartnerschafte:

  • Flagge von FranceFrance Marseille, Frankrich (1958)
  • Flagge von BrazilBrazil São Paulo, Brasilie (1981)
  • Flagge der Volksrepublik ChinaChina Tianjin, China
  • Flagge der Vereinigten Staaten von AmerikaUSA San Francisco, USA
[ändere | Quälltäxt bearbeite]
 Commons: Abidjan – Sammlig vo Multimediadateie