ABB Ltd[1][2] | |
---|---|
Unternähmensform | Aktiegsellschaft |
ISIN | CH0012221716 |
Gründig | 1988 (ASEA: 1883, BBC: 1891) |
Sitz | Züri, Schwiiz |
Leitig |
Joseph Hogan[1][3] |
Mitarbeiter | 117'000 (2009) |
Umsatz | 31,795 Mrd. USD (2009)[4] |
Branche | Energii- und Automationstechnik |
Uffdritt im Netz | www.abb.com |
D ABB Ltd[1] isch e Konzärn in dr Elektrotechnikbranche, wo si Hauptsitz z Züri het.
Er isch 1988 us dr Fusion vo dr schwedische Allmänna Svenska Elektriska Aktiebolaget (ASEA) und dr schwiizerische Brown, Boveri & Cie (BBC) entstande. Dr Konzärn isch wältwiit dätig und beschäftigt hüte im Ganze öbbe 117'000 Mitarbeiter in 100 Länder. D Aktie vo dr ABB Ltd si an dr Schwiizer Börse SIX Swiss Exchange kotiert.[5]
D Asea Brown Boveri schaffet als Konzärn für Energii- und Automatisationstechnik in underschiidlige Gschäftsfälder.[6]
Das Gschäftsfäld umfasst Energiitechnikprodukt und d Kundedienst drzue. Das si Schlüsselkomponänte für d Überdrägig und Verdeilig vom Stroom. Drzue ghöre zum Bischbil Transformatore, Schaltaalage, Leistigsschalter, Kabel und anders Zuebehör.
Dr Beriich Energiitechniksystem büütet Versorgigsundernähme schlüsselfertigi System und Dienstleistige für d Stromüberdrägig, d Stromverdeilig und für Chraftwärk aa.
D Hauptfälder vo däm Gschäftsberiich si Understatione und Automatisierigsszstem für sötigi.
Wiiteri Schlüsselprodukt si flexibli Wächselstrom-Überdrägigssystem (FACTS), Hochspannigs-Gliichstrom-Überdrägig (HVDC) und Netzwärkmanagement-System.
In der Stromerzügig offeriert die Division d Instrumentierig, Stüürig und Elektrifizierig vo Chraftwärk.
Dä Gschäftsberiich liferet Aadriib, Elektromotore und Generatore, Niiderspannigsprodukt, Instrumentierig und Prozässanalyse, und Leistigselektronik. D Aawändigsgebiet vo dene Problemlösige gönge vo dr Verfahrens-, Fertigungs- und Versorgigsindustrii bis zu Gschäfts- und Wohnbaute.
Dä Gschäftsberiich offeriert integrierti Lösige für d Automatisierig und Optimierig vo industrielle Produktions- und Gschäftsprozäss und branchespezifischi Aabassige drzue. S Leistigsaagebot richtet sich bsunders an d Branche Öl und Gas, Energie, Chemii und Pharma, Zällstoff und Babbiir, Metallverarbeitig, Mineral, Marine und Turbolader.
ABB isch Aabieter vo Induschtryroboter, Robotersoftware, modulari Fertigungszälle und offeriert Dienstleistige für die underschiidlige Aawändigsberiich vo dr Automation. Gliiferet wärde Industriiroboter in allne Grössene, Lackier- und Spezialroboter für d Branche Giesserei, Metalverarbeitig, Kunstoffverarbeitig, Autoindustrii, Verpackig und Palletiere. ABB het wältwiit meh as 160'000 Roboter installiert.[7] 2006 isch s Global Robotics Headquarters uf China (Shanghai) züglet,[8] wo sit 2007 ABB-Industriiroboter broduziert wärde.[9]