Hammurapi

Absoluti Johreszahle us em früeie Alterdum si notorisch ungenau. Johreszahle in däm Artikel si Richtlinie und sötte nid z ärnscht gnoh wärde: Für s dritte und zweite Johrduusig vor dr Ziitwändi gits verschideni Standard-Chronologie, wo aber um Johrzähnt von enander abwiiche.

Dr Hammurapi, au Hammurabi, (je nach dr bruuchte Chronologii 1792–1750 odr 1728-1686 vor dr Ziitwändi) isch dr sächst König vo Babylon uus dr Amoriterdynaschdii gsi und het d Chrone vo siim Vater, em Sin-muballit, gerbt.

Er het d Schdadtmuure vergrösseret, Bewässerigsalage agleit und Tämpel und anderi groossi Gebäud baut. Er het d Verwaltig vom Land besser organisiert und het em mit em so-genannte Codex Hammurapi ä eiheitligi Rächtsornig gä.

Dr Kodex Hammurapi

Hauotardikel: Dr Kodex Hammurapi

D Gsetz si in dr Landesschbrooch Akkadisch uf Stele und Dondafele gschriibe und öffentlig ufgschdellt gsi, so dass jede sie hätt chönne läse. Siini 282 Gsetz si schbezifisch gsi, jedi Gsetzüberdrätig het ä beschdimmti Schdroof noch sich zoge, wo em Verbräche aagmässe gsi isch: „Es Aug für es Aug. Ä Zahn für ä Zahn“, die so genannti lex talionis. Dr Aklagti isch für unschuldig ghalte worde, bis ass si Schuld bewiise gsi isch. Es schinnt, ass dr Achläger und dr Aklagti hai döfe Bewiismaterial vorfüehre. D Schdroof het nit chönne verchliineret wärde, au wenn s milderndi Umschdänd ge het.
S Uufschriibe und Veröffentlige vo de Gsetz het s schwiiriger gmacht, si willkürlig z verändere. D Schdele mit em Kodex zeigt au, wie dr Hammurapi d Gsetz vom Gott Schamasch überchunnt und im Teggscht isch gschriibe, ass d Götter dr Hammurapi gwehlt hai für dass er siim Volk d Gsetz gäb. Er het so die middelöschdlige Gsetzesdradition vo göttlige Gsetz widdergfüehrt, wo s eltischte Bischbil drvo die sumerische Gsetz vom Ur-Nammu und es schbööters Bischbil die Mosaische Zäh Gebot gsi si.

D Eroberig vo Mesopotamie

Siini Vorgänger hai d Nochberschdedt Borsippa, Kisch, and Sippar eroberet, und vo dere Machtbasis uus het dr Hammurapi, wo Elam 1766 in Mesopotamie iigfallen isch und s Riich vo Eschuna eroberet het, mit dr Underschdützig vo Larsa chönne besiige. Wil aber dr Hammurapi nid zfriide gsi sich mit dr Hilf vom König vo Larsa het er en agriffe und bis öbbe 1763 s ganze südlige Mesopotamie eroberet. Währed er im Süde beschäftigt gsi isch, hai siini Nochbere im Norde Unrueh gschdiftet. Dr Hammurapi het druf Eschuna agriffe und d Schdadt eroberet. Denn isch er im Euphrat noch gege Nordweschde zoge und het ganz Mesopotamie bis Mari under si Herrschaft brocht. In Syrie si Aleppo und Qatna unabhängig bliibe.

Archäologischi Fund us dr Ziit vom Hammurapi

Dr Dioritblock mit siine Gsetz isch 1902 z Susa endeckt worde und schdoht jetzt im Louvre.

Literatur

Horst Klengel: König Hammurapi und der Alltag Babylons. Artemis, Düsseldorf/Zürich 1991, ISBN 3-491-69122-2.
Marc Van de Mieroop: King Hammurabi of Babylon. A Biography. Oxford 2005.

Weblingg

Commons: Hammurabi – Sammlig vo Multimediadateie