Rainer Kussmaul

Dr Rainer Kussmaul (* 3. Juni 1946 z Manne;[1] † 27. Merz 2017 z Fryburg) isch e dytsche Gyyger un Dirigänt gsii.

Lääbe

[ändere | Quälltäxt bearbeite]

Dr Rainer Kussmaul, ain vu drei Brieder, het dr erscht Gyygenunterricht bi sym Vater Willy Kussmaul iberchuu, wu as Solobratscher im Orcheschter vum Nationaltheater Manne gschafft het. No Studie z Manne un bim Ricardo Odnoposoff an dr Staatlige Hochschuel fir Musik un Darstellendi Chunscht Stuegert isch dr Rainer Kussmaul bal Bryysdreeger vu internationale Wettbewärb gsii, as Solischt un vu 1968 bis 1997 au mit sym Stuegerter Klaviertrio. Är het wältwyt Kunzärt gee as Solischt un Chammermusiker.

Dr Kussmaul isch en international gfrogte Lehrer gsii. Ab 1977 het er as Brofässer an dr Musikhochschuel Fryburg unterrichtet, wu er syni Schueler uf di Klangmegligkaite vu dr Barockvioline fir s Barock-Repertoire hiigwise het. Är isch Laiter vu dr Carl-Flesch-Akademie Baden-Baden gsii un het in dr Verainigte Staate glehrt, z Kanada, z Auschtralie, z Schwede, in dr Schwyz un z Japan. Vu 1993 bis 1997 isch er erschte Kunzärtmaischter vu dr Berliner Philharmoniker gsii. Anne 1995 het er mit Philharmoniker-Kollege d Berliner Barocksolischte grindet, wu bis 2010 unter syre Laitig ufdrätte. Studänte vum Kussmaul hän s Fryburger Barockorcheschter grindet, wu in dr Zwischezyt en Ensemble vu internationalem Rang isch. Dr Rainer Kussmaul het wichtigi Schallblattebryys iberchuu, unter anderem meefach dr Echo-Klassik-Bryys un anne 2005 dr Grammy. Ä het uf ere Gyyge vu 1724 gspiilt, wu em Antonio Stradivari zuegschribe wird.

Sy eltere Brueder Jürgen Kussmaul isch Brofässer fir Viola an dr Düsseldorfer Musikhochschuel gsii un sy jingere Brueder Wolfgang Kussmaul (* 1953) isch Kunzärtmaischter bim Stuetgerter Kammerorcheschter.

Ehrigen un Uuszaichnige

[ändere | Quälltäxt bearbeite]
  • Moses-Mendelssohn-Bryys, Berlin
  • ARD-Wettbewärb, München
  • Enescu-Wettbewärb, Bukarest
  • Bach-Wettbewärb, Leipzig
  • 2005: Grammy Award
  • 2010: Bundesverdienschtchryz am Band vum Verdienschtorde vu dr Bundesrepublik Dytschland
  • 2012: Reinhold-Schneider-Bryys vu dr Stadt Fryburg
  • Meefachi Echo-Klassik-Bryys
[ändere | Quälltäxt bearbeite]

Fueßnote

[ändere | Quälltäxt bearbeite]
  1. ↑ Verschideni Quälle nänne au Schriesheim as Geburtsort, lueg di Badisch Zytig vum 28. Merz 2017 un The Strad vum 28. Merz 2017.
Dä Artikel basiert uff ere fräie Übersetzig vu dere Version vum Artikel „Rainer_Kussmaul“ vu de dütsche Wikipedia. E Liste vu de Autore un Versione isch do z finde.