Regensdorf

Regensdorf
	Wappe vo Regensdorf
Basisdate
Staat:	Schwiiz
Kanton:	Züri (ZH)
Bezirk:	Tielschtoorf
BFS-Nr.:	0096
Poschtleitzahl:	8105 Dielsdorf ; 8105 Watt ; 8106 Adlikon
UN/LOCODE:	CH RGF
Koordinate:	678135 / 254717Koordinate: 47° 26′ 19″ N, 8° 28′ 28″ O; CH1903: 678135 / 254717
Höchi:	443 m ü. M.
Flächi:	14,62 km²
Iiwohner:	18'739 (31. Dezämber 2022)
Website:	www.regensdorf.ch
	Rägischtoorf Rägischtoorf
Charte
	Charte vo Regensdorf

Rägischtoorf (i verhoochtüütschtem Neozüritüütsch au Rägesdorf) isch ä politischi Gmäind im Bezirk Dielschdorf vom Kanton Züri in dä Schwiiz. Sit dä spöötä 50er-Jaar hät sich das früänärä Buuredorf wo am Ostrand vom Furttal liit zunärä Stadt i dä Agglomeration Züri entwicklet.

Geographii

Nur wenigi Kilometer äwegg vom Zäntrum vo dä Stadt Züri und vom Flughafä Chlootä erstreckt sich diä Gmeind quer über s Zürcher Furttal. Das Tal bildät ä diräkti Verbindig zwüschä dä beide starchä Wirtschaftsregionä im Ruum Züri-Nord und Züri-West. Wägä sinrära attraktivä Laag hät sich Rägischtoorf i dä letschtä 50 Jaar vomenä Buurädorf zunärä moderne Zäntrumsgmäind entwickelt.

Ortsteil

D Gmäind Rägischtoorf bestaat us drüü Ortsteil: Rägischtoorf, Adlikä und Watt. Unter denä bestaat än Art Arbetsteilig:

Rägischtoorf isch dä Sitz vo dä Verwaltig und em Dienstleistingszäntrum mit Läde, Restaurants, Hotels und ämä Kongrässzäntrum.

Adlikä bestaat us änäre altä dörflich-ländlichä Umgäbig. Wiiter gits ä grossi Wohnüberbouig mit äm Namä «Sunnhaldä». Si isch vo dä Immobiliäfirma Göhner poue wordä und gheisst drum au Göhnerswil. Es git au än Industriezonä. Alläs isch mit ämänä Bahn- und Strassänetz aapundä. Adlikä isch bis Ändi 2009 ä Zivilgmeind gsi (luäg wiiter unä).

Watt isch im Chern immer no äs Buurädorf. Dett isch d Tradition dihäi. Watt isch au bis Ändi 2009 ä Zivilgmeind gsi (luäg wiiter unä).

Gschicht

D Ursprüng vo dä modernä Siedligä sind im 6. Jahrhundert, in dä Ziit vo dä Landnahm vo dä Alemanne. Di ältesti erhalteni Urkund, wo Rägischtoorf als Reganesdorf erwähnt, isch vom Jahr 870.

D Freiherre vo Rägischtoorf händ im Hochmittelalter ä wesentlichi Rollä gspillt. Si händ auf ämänä chliinä Moränehügel bim hütigä Wiiler Altburg im 11. Jahrhundert ä Burg bout. D Überrestä vo dere Burg, d Ruine Altburg, sind no hütt zbesichtigä.

Sit em 12. Jahrhundert bestönd in Rägischtoorf grad zwei Chilänä, wo nööch binänand ligged. Eini dävo chönnt ursprünglich än Eigenkirche vo dä Regensberger gsii sii, die ander isch ä Filialchilä vo Höngg bi Züri. Diä zwei Gotteshüser sind au dä Aalass gsi, dass sich in Rägischtoorf zwei Dorfteilen pildät händ, s Vorderdorf und s Hinterdorf.

Rägischtoorf liit am Südrand vo dä Furttal-Ebäni, wo hüt wiitgehend überbout isch. Diä Ebeni isch äs versumpfts Riedland gsii und drum für landwirtschaftlichi Zwäck fasch nöd nutzbar, bis mer dänn 1870 dä Furtbach abgsänkt hätt.

Uf dä Nordsiitä vo dem ehemaaligä Riäd ligäd, nach Südä exponiert, Watt und Adlikä. D Trochäleggig vom Furttal hät d Erschlüüsig durch Landwirtschaft und Industrii ermöglichät. Uf dä Buo vo dä Iisäbaan hätt mer bald die erschtä Fabrikä pout. Au di kantonali Straafanstalt Pöschwiis isch in Rägischtoorf bout wordä. Das hät im Rest vom Kanton äm Satz «uf Rägischtoorf gaa» än psundärä Biigschmack gää.

D Gschicht vo dä Region wird vo dä HVF (Heimatkundlichi Vereinigung Furttal) erforscht. Diä Vereinigung setzt sich für d Bewahrig vo wertvollä Objekt und Landschaftä ii.

Früenerigi Zivilgmeindä

Innerhalb vo dä politischä Gmeind Rägischtoorf sind di beide Ort Watt und Adlikä bis Ändi 2009 je än eigeni Zivilgemeind gsii.

Zivilgemeinde Adlikä. Si hät d Fluärwäg underhaltä und hät än eigeni Wasserversorgig für dä alti Täil vo Adlikä betribä. D Vorsteherschaft hät drüü Mitglider (Presidänt, Guätsverwalter und Biisitzer) umfasst. Jöörlich händ 3 bis 4 Gmeindsversammligä stattgfunde – im Gägesatz zu dä Stadt, wo s settigi Versammligä nüme gitt.

Zivilgmeind Watt. Dadäzuä händ dä Ortsteil Watt und dä Wiiler Altburg ghört. D Flächi hät total 588 ha beträit. Wie z Adlikä isch au da d Wasserversorgig än zentralä Uufgabäbereich vo dä Zivilgmeind gsi.

Bevölkerigsentwicklig

Quälle: Bundesamt für Statistik 2005^[2]

Jaar	1850	1860	1870	1880	1888	1900	1910	1920
Iiwooner	1201	1131	1063	1028	1024	1275	1498	1581
Jaar	1930	1941	1950	1960	1970	1980	1990	2000
Iiwooner	1797	1806	2093	4997	8566	12300	13673	15098

De Uusländeraatäil liit bi 32,7 % (Stand 2011).^[3]

Wirtschaft

I dä Stadt Rägischtoorf gits über 8000 Arbätsplätz. Di verchehrstechnischä Vorteil i dä Nöchi vor dä Autobahn-Nordumfahrig vo dä Stadt Züri und vom Flughafä hät vill Unternämä (z. B. SAP und Möväpick) dazu praacht, iri Administration und teils auch iri Produktion i dere Furttalstadt aazsidlä.

Religion

27,2 % vo de Iiwooner sind evangelisch-reformiert, 31,3 % sind römisch-katholisch (Stand 2011).^[3]

Politik

Bi de Kantonsraatswaale 2011 hät s das Ergebnis ggee:^[3] BDP 2,7 %, CVP 6,5 %, EDU 1,1 %, EVP 1,9 %, FDP 8,6 %. GLP 8,8 %, GP 6,3 %, SP 16,6 %, SVP 47,0 %, Suschtigi 0,5 %.