Rokudenashiko

D Künschtleri Rokudenashiko

D Rokudenashiko (jap.: ろくでなし子; * 14. Merz 1972), eigentli Megumi Igarashi, isch e japanischi Bildhaueri und Manga-Künschtleri, wo durch ihri Beschäftigung mit de wibliche Genitalie au z Europa bekannt worde isch.^[1] Si het es sich zur Ufgab gmachd, wiiblichi Genitalie z Japan z entmystifiziire, wo us ihrere Sicht im Vergliich zu phallische Bilder in ihre Heimet übermässig verborge sind. D Rokudenashiko isch eini vo de fünf Hauptakteurinne im schwyzerisch-dytsche Dokumentarfilm #Female Pleasure us em Johr 2018, wo sich mit de wiibliche Sexualität usenandsetzt.

Hintergrund

D Künschtleri beschriibd uf ihre Website, wi si in ihre Jugend nie d Genitalie vonere andere Frau gseh het und ned gwüsst het, wi e Vulva usgseht. Das het bi ihre d Angscht usglöst, ihri Vulva sig ned normal. Si het dann ganz unbeschwert aagfange, e Form vo ihre Vulva z verwände, um Diorame z schaffe. Si hat dademit vil Ufregig erzügd und dann aagfange, mit ihre Kunscht z erreiche, dass Fraue ohni Scham über ihre Körper rede chönnd.

Kunscht

D Rokudenashiko het vili Vulva-Werch gmachd, au en Kronlüchter, es ferngschtüürets Auto und en iPhone-Hülle. En Grossteil vo ihre Kunscht isch binere Polizeirazzia beschlagnahmd worde, aber durch Föteli isch ihri Arbet dokumentiird. Si het dann überlegd, es Auto oder e Tür z baue, het dann aber es Kajak gmachd, inschpiriird durch d Verbindig vo de wiibliche Sexualität und em Meer. Das Kajak, wo si mit Crowd-Funding finanziird het, isch uf Grundlag vomene 3D-Scan von ihre Vulva entschtande.^[2] Nachdem si d Aaleitig zum Nochmache ins Internet gschtellt het, isch si wegen Vorwurf, si hetti ihres Gschlächt öffentlich zur Schau gschtelld, verhaftet worde.^[3]

Fuessnoote

1. Artist denies obscenity charge: 'My vagina is like my arms and legs'. Archiviert vom Original am 19. Juli 2014; abgruefen am 2. November 2018. 
2. «Here’s that "vagina kayak" Japanese artist Megumi Igarashi made with the help of crowdfunding»
3. «Von unten betrachtet», vo de Susanne Leuenberger in «bref» - Das Magazin der Reformierten Nr. 19/2018 vom 2. November 2018

Weblink

• Offizielli Website vo de Rokudenashiko