Carrera

A carrera Alifonso I de Zaragoza

Una carrera^[1] ye un espacio urbán, linial y publico, rodiau de casas, vagos u parez, que permite a circulación de personas y, en o suyo caso, vehiclos y que da acceso a diferents parcelas u edificios que se troban a los suyos costaus. En o subsuelo d'a carrera se disposan os rez d'as instalacions d'os servicios urbans a las edificacions como: as cantarillas, a distribución d'augua potable y as de gas natural, electricidat y baixa, meya u alta tensión y telecomunicacions.

Etimolochía

A parola aragonesa «carrera» proviene d'o latín «via carraria» que significa «camín ta os carros».^[2]

Funcions

As principals funcions que s'asocian a la carrera en una población, una villa u una ciudat son:

1.- A carrera ye, en primer termin, una vía u camín ta ir d'un puesto a unatro d'a población. Antiparti de bellas excepcions, a carrera ye un espacio de circulación tanto de personas como de vehiclos.

2.- A carrera ye un espacio publico urbán, a on que se fan as actividaz ciudadanas no privadas como: ir a casa, a lo treballo u a la escuela, fer una gambada, o chuego infantil, a trobada con os amigos u os vecins, etc., e tamién as actividaz ciudadanas publicas (se veigan os puntos 3 y 4).

3.- A carrera ye linial, a dimensión lonchitudinal predomina en ella y en as infraestruturas asociatas: ringleras de casas, d'árbols, de farolas, etc.) asinas como en as actividaz socials que se i fan como son: as procesions, manifestacions, desfiles, etc., e tamién en as ferias, os mercaus y fiestas populars que s'estendillan por as carreras y como istas confluyen en as plazas principals d'as poblacions.

4.- L'arquitectura siempre ye present en a carrera. Os edificios u, en o suyo caso os casals (futuros edificios) rodian a carrera y as suyas activitaz asociadas: os aparadors, o comercio, a información, a publicidat, asinas como a propia arquitectura, as esculturas, o disenyo y una serie de feitos u manifestacions culturals u esteticas que tienen en a carrera o suyo escenario, como son determinaus esportes, musicas, danzas, artes, etc. y o turismo, que se fa y vive en a carrera.

Una carrera puet estar simplament un camín de tierra, pero a ormino se troba pavimentada con un material resistent como lo formigón u a ceramica. Bellas partis d'a carrera pueden incluyir rails u carrils engudronaus ta automobils.

Se veiga tamién

• Cera.
• Cantonada.

Referencias

1. (an) Silbia Garcés Lardiés, Francho Rodés Orquín: Un borguil de parolas. Bocabulario dialeutal escolar, Gubierno d'Aragón, 2006, ISBN 84-689-7358-0, p.19.
2. (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.114.

Vinclos externos

• Se veigan as imáchens de Commons sobre Carrera.