Heraclio

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Heraclio
Emperador de l'Imperio Bizantín

Solido d'Heraclio
610 - 641
Predecesor Focas
Succesor Costantín III Heraclio
Naixencia enta 574
Muerte 11 de febrero de 641
Dinastía Heracliana

Heraclio estió entre l'anyo 610 y 641 emperador de l'Imperio Bizantín y baixo o suyo gubierno os griegos bizantins podioron vencer a los invasors persas pero no a los arabes musulmans, que se quedoron de pa cutio con Echipto y Siria.

En l'anyo 610 o remata o mandato d'a dinastía de Chustín dimpués d'o golpe d'estau d'Heraclio. O rei Cosroi II de Persia aproveita o "nacionalismo relichioso" echipciano y sirián (monofisistas) y os desórdens internos pa invadir a muga oriental y en l'anyo 611 prene Antioquía, en l'anyo 614 prene Cherusalem y en l'anyo 618 Aleixandría, aturando os ninvíos de trigo ta Costantinoble.

Por ixe tiempo a presencia eslava se consolidó en Macedonya y Mesia, y i habió saqueyos en Tracia, Tesalia, Grecia, Peloponiso y dica Creta en l'anyo 623. Tesalonica fue asitiada en os anyos 617 y 619.[1] En l'anyo 626 os avaros y persas asitiaban Costantinoble, pero sufrioron una derrota decisiva que deixó a los avaros sin capacidat de tornar a atacar en os Balcans.[1]

Entre l'anyo 623 y 631 os eslaus se liberan d'o chubo d'os avaros y mientres o sieglo VII esvebienen os amos d'os Balcans. L'emperador Heraclio permitió a os croatas y serbios que s'establisen en territorios de l'Imperio Romano d'Orient mugants con os avaros pa que fesen d'etnia-tampón. En l'anyo 626 diferents grupos eslaus dominaban ya toz os Balcans, Macedonya, y parte de Tesalia, Grecia central y Peloponiso, encara que os serbios y croatas reconoixeban teoricament a sobiranía imperial.[1] Os griegos permaneixeban en Tracia, en a costa dica Tesalonica, en as islas y en o sector oriental d'o Peloponiso.[1]

Heraclio responde a l'amenaza sasanida organizando un exercito con muitos monches y dando o caracter a la reconquiesta de "guerra santa" pa recuperar Cherusalem y atros puestos sagraus. Pa financiar a guerra requisa fondos a la Ilesia. A guerra remata victoriosa y en l'anyo 627 prene Ctesifonte, a capital de l'Imperio Persa Sasanida.

A guerra entre as dos potencias las enfebleix tanto que os nomadas arabes d'o desierto, unificaus baixo a teocracia monoteísta d'a nueva relichión musulmana consiguen conquerir as provincias orientals de l'Imperio Romano d'Orient a on a mayoría d'a población no yera griega u no yera helenizada de tot (Echipto, Siria, etc..), y tot l'Imperio Persa Sasanida. Os bizantins reorganizan as mugas de l'imperio con unas nuevas entidaz administrativas de caracter militar, os temas. En os temas bi ha destinaus uns soldaus d'elite a las órdens d'un stratega y reciben como paga lotes de tierra. O tema mes antigo fue o tema Armeniaco, seguiu por o tema Anatolico, Opsikión y Caravision/Cibirrotes. Por o suyo exito en aturar a los musulmans a organización de temas s'estendilla a tot l'Imperio (Islas Echeas, Balcans, Italia). En os Balcans son creyaus os temas de Tracia y Helada p'aturar a los bulgaros y eslaus.

Heraclio en fuents aragonesas y navarras

[editar | modificar o codigo]

En o "Liber Regum" comentan que luitó cuentra os persas sasanidas:

Apres de Foca Cesar regno Eraclius en Roma e passo mar e fo lidiar (tachau “en”) con Cosdroe, qui era rei de Persia. Aquest rei Cosdroe se fazia a sos omnes tener por Deus, e tenia la uera cruç delant si, et auia feito fer cielo d aramne e sol e luna &, estellas, e fazia plouer por encantament. Lidio Eraclius con el & con so fillo, e matolos ad amos & aduxo la uera cruç a Iherusalem. En esta sazón que regnaua Eraclius en Roma era Sant Isidre arcebispe en Seuilia, qui escriuie estas estorias s otras muitas. Et en esta sazón andauan los godos en España.

En "Cronica de los Conquiridors" mencionan un tal "Eraclo" en o capítol "De la eregia del emperador Eraclo et de su muert et de su muert et de las otras cosas notables".

En o "Libro del Trasoro" lo mencionan como Oraculo:

...entro al tiempo de Oraculo qui fue de Roma a ...
...mas no por tanto que a la fin y fue Oraculo emperador e mato el rey de Persia,..


Predecesor:
Focas 		Emperador de l'Imperio Bizantín
610-641 		Succesor:
Costantín III Heraclio


Referencias

[editar | modificar o codigo]
  1. ↑ 1,0 1,1 1,2 1,3 Miguel Ángel Ladero Quesada: Historia Universal, Edad Media. Vicens Vives.

Bibliografía

[editar | modificar o codigo]