Mespilus germanica

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Mespilus germanica
Mespilus germanica
Denominacions populars
Garimbastera, galimbastera, marimbastera, malimbastero, niespolera europea
Clasificación cientifica
Dominio:	Eukaryota
Reino:	Plantae
División:	Espermatophyta
Subdivisión:	Magnoliophyta
Clase:	Magnoliopsida
Orden:	Rosales
Familia:	Rosaceae
Subfamilia:	Amygdaloideae
Tribu:	Maleae
Chenero:	Mespilus
Especie:	M. germanica
Descripción
Mespilus germanica L.,

A garimbastera (forma mas amplament documentada en aragonés,^[1] anque tamién se documenta variants suyas como galimbastera,^[1] marimbastera,^[1] malimbastera u malimbastero.^[1] Nombre cientifico Mespilus germanica), que tamién se puede dicir niespolera^[1] europea^[2], ye un árbol u arbusto caducifolio d'a familia d'as Rosacias, clasificau en a tribu Maleae, conoixiu sobre tot por o suyo fruito comestible: a garimbasta, una niéspola borde.

Anque en l'actualidat cuasi no se'n culle, as garimbastas fuen una fruita d'agüerro muit consumida en Europa, por o que a garimbastera tamién serviba como árbol fruital domestico. Agora, cuasi todas as garimbastas proceden d'eixemplars bordes que viven en selvas mixtas y en as marguins de campos y camins.

Descripción

A garimbastera ye un árbol natural, anque no pocas vegadas os eixemplars bordes se troban con forma d'arbolet u d'arbusto en competencia con atras especies. A corona ye baixa y aplanada, con ramas retuertas dende una altaria baixa.

A fuellas son oblongas y largas, d'uns 15 cm de largo por 5 d'amplo, con a ladera aserrada u lisa. Verde intensas, son tiercas y con a nervadura muit marcada, y de regular caducas, anque en clima Mediterranio y emplazamientos asolanaus y bien recuestos contra os oraches, puede trobar-se eixemplars que se comporten como perennifolios.

A flor ye pentamera, típica en as rosacias, con una corola de petalos blancos bien vistables y numerosos estambres arredol d'un chineceu multicarpelar infero. O tiempo de florada ye de mayo y chunio.

Fruito

O fruito, que se conoix de forma propia como garimbasta,^[1][3] ye un pomo en sentiu botanico. Madura en agüerro. Mas chicorrón que as niéspolas d'o nispolero de Chapón, tiene un aspecto a-saber-lo mas basto y menos agradable a la vista, o que puede haber feito causa de que no tienga guaire valgua comercial.^[3]

Pa minchar-la, a garimbasta cal cullir-la en noviembre cuan a l'árbol ya no le queda cuasi fuellas, y contino alzar-la en un puesto seco pa que remate de madurar. A garimbasta que se plega de cullir ye agria y tiene a pulpa blanca: a millor ye muit madura, que cuasi pareix pasada, con a pela marrón y a pulpa tova y parda (como en atras fruitas cuan se pasan). Nomás alavez se troba dulce y con un toque acido en gustar-la.

Imáchens

• 
  Garimbastas.
• 
  Flor.
• 
  Fuellas.
• 
  Crosta.

Referencias

1. (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
2. A cultura y o consumo d'a garimbasta son autoctonos y por tanto anteriors a la introducción en Europa d'a niespolera de Chapón en a Edat Moderna, a fruita d'a cual ye a principal que conoixemos hoi como niéspola. Por ixo, a primer niéspola que se conoixeba en Europa, y a la cual feba referencia ixe nombre en primeras ye a garimbasta. Y a garimbastera, la primer niespolera propiament dita en un sentiu historico.
3. (es) ¿Es tiempo de (...) "garimbastas"?, consultau lo 24 de chunio de 2018.

Se veiga tamién

• Niespolera.
• Niéspola.
• Eriobotrya japonica.

Vinclos externos

• Se veigan as imáchens de Commons sobre Mespilus germanica.
• Wikispecies tiene un articlo sobre Mespilus germanica.