Rabosa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Rabosa roya (Vulpes vulpes).

Una rabosa[1][2] (u raboso[1][nota 1] si ye masclo) ye un zoonimo popular que en aragonés gosa designar a las especies de canido chicorronas, d'orellas grans y coda larga y densa que en zoolochía son por lo regular agrupaus en a tribu Vulpini, adentro d'a familia Canidae.

As rabosas son animals oportunistas, de regular carnivoros, pero que tamién pueden minchar productos vechetals ocasionalment, como bayas y atros fruitos. Consumen tamién carcanas, uevos, insectos y muitos vertebraus chicorrons, como ratons, engardaixinas, paixaros y a suyas cobadas. Curiosament y a la contra d'atros canidos, as rabosas no se deixan domesticar.

Zoonimia

[editar | modificar o codigo]
Rabosa en a nieu

En os documentos aragoneses medievals i gosa apareixer derivatos d'o termin «Vulpecula», de tradición més latinizadera, que fa pensar que enantes estes animals hesen puesto conoixer-se como Golpella[3] en o territorio d'Aragón. Esta hipotesi se refirma con cualques toponimos en a provincia de Zaragoza y La Rioja, que responden a formas como «vulpellars», «gulpellars», ecetra.

A parola aragonesa actual, «rabosa», demana de «rabo», y ye un termin que se tornó popular a partir d'a Baixa Edat Meya, en estando relacionato con a coda tan conspicua que tienen estes animals. En o sieglo XV trobamos rabosas/raboses en os peaches de L'Ainsa, Uesca, Monzón y Zaragoza.

Chunto con a forma «rabosa», en buena parte d'o territorio trobamos «raposa». Esta segunda variant se documenta en a val de Tena,[4] en a val d'Echo,[4] en Lecinyena en os Monegros[4] y en Biarche en o nord-ueste d'o Semontano de Balbastro[4] y Lecinyena, estando en cualques d'ixes lugars más sentible la forma masculina «raposo». En o Viello Sobrarbe se da como voz extincta, tamién bi n'ha una variant como reposo (en Boleya). En muitos lugars en as sierras de Teruel a parola «raposa» y «raposo», a tamas d'a distancia con os altros focos d'o norte a on que se i diz, s'emplegan a ormino ta referir-se a estes animals. A desparte d'ixes puestos, a forma «rabosa» ye la cheneral en a resta d'Aragón.

Bi ha dos hipotesis sobre a existencia d'as variants con -p- y con -b-:

  • As formas raposa y raposo serían castellanismos. raposa, raposo son parolas conoixitas dende a Baixa Edat Meya en castellano, en un tiempo en o que en aragonés s'escribiba rabosa, raboso. Coromines considera que estas parolas antigas con -p- en castellano representan una alteración a causa d'o influxo de rapiega, (como dicen a esta especie en asturiano), y atras parolas d'a familia rapiña, por os instintos depredadors y oportunistas d'a rabosa.
  • As formas raposa y raposo serían variants conservadera con as consonants oclusivas xordas intervocalicas y farían referencia a la forma de napo d'a coda (RAPUM ye una variant de NAPUM en latín). Estas formas serían unas formas anteriors a rabosa y raboso.[3] Seguntes Juan A. Frago a presencia d'as voces raposa y raposo en a provincia de Teruel se deben a que se castellanizoron pronto, enantes de producir-se a sonorización en a mes gran part d'o territorio navarro-aragonés.[3]

Queda ubierta a interpretación sobre si son castellanismos adhibitos a la parla local u si representan un caso de conservación d'a xorda intervocalica -P- como en capuzar u capín, pero a forma rabosa ye a que tien tradición escrita y aria més gran.

Notas

[editar | modificar o codigo]
  1. ↑ Con as variants conservaderas d'a xorda intervocalica raposa y raposo

Referencias

[editar | modificar o codigo]
  1. ↑ 1,0 1,1 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
  2. ↑ (an) Silbia Garcés Lardiés,Francho Rodés Orquín:Un borguil de parolas.Bocabulario dialeutal escolar, Gubierno d'Aragón, 2006, ISBN 84-689-7358-0, p.44
  3. ↑ 3,0 3,1 3,2 Juan A.Frago "Toponimia navarroaragonesa del. Ebro (VI): Fauna". AFA XXXIX [1]
  4. ↑ 4,0 4,1 4,2 4,3 (an) VIDALLER TRICAS, Rafael; O Libro d'as Matas y os Animals; Dizionario aragonés d'espezies animals y bechetals; Ed. Bal de Onsera. Zaragoza, 2004. ISBN 978-84-89862-35-7

Se veiga tamién

[editar | modificar o codigo]

Enlaces externos

[editar | modificar o codigo]