Star Trek III: The Search for Spock
| Star Trek III: The Search for Spock | |
|---|---|
| Títol | Star Trek III: The Search for Spock |
 Póster d'a cinta. | |
| Ficha tecnica | |
| Dirección | Leonard Nimoy |
| Producción | Harve Bennett |
| Guión | Harve Bennett |
| Musica | James Horner |
| Fotografía | Charles Correll |
| Montache | Robert F. Shugrue |
| Actors | William Shatner DeForest Kelley James Doohan George Takei Walter Koenig Nichelle Nichols Merritt Butrick Christopher Lloyd |
| Color | Panavision |
| Datos y cifras | |
| País(es) | Estaus Unius |
| Anyo | 1984 |
| Debantadera | 1 de chunio de 1984  Estaus Unius[1]
|
| Chenero(s) | Cine de ciencia-ficción |
| Durada | 105 min. |
| Idioma(s) | Anglés Klingon Ruso Francés |
| Companyías | |
| Productora(s) | Paramount Pictures Cinema Group Ventures |
| Distribución | Paramount Pictures |
| Presupuesto | 16 millons de dólars |
| Succesión de cintas | |
| Precedida por | Star Trek II: The Wrath of Khan (1982, Nicholas Meyer) |
| Succedida por | Star Trek IV: The Voyage Home (1986, Leonard Nimoy) |
| Informacions en bases de datos especializadas: | |
           
| |
Star Trek III: The Search for Spock (títol orichinal en anglés, en aragonés Star Trek III: a busca de Spock, enguerada en Aragón con o suyo títol traduciu enta lo castellano como Star Trek III: en busca de Spock) ye una cinta de cine estausunidense de cine de ciencia-ficción de l'anyo 1984, dirichida por Leonard Nimoy y producida por Harve Bennett ta las productoras Paramount Pictures y Cinema Group Ventures, con un guión cinematografico de Harve Bennett, protagonizada por William Shatner, DeForest Kelley, James Doohan, George Takei, Walter Koenig, Nichelle Nichols, Merritt Butrick y Christopher Lloyd,[2] entre d'atros actors.
Elenco
[editar | modificar o codigo]- William Shatner como James T. Kirk.
- Leonard Nimoy como Spock.
- DeForest Kelley como Leonard McCoy.
- James Doohan como Montgomery Scott.
- George Takei como Hikaru Sulu.
- Walter Koenig como Pavel Chekov.
- Nichelle Nichols como Uhura.
- Mark Lenard como Sarek.
- Robin Curtis como Saavik.
- Christopher Lloyd como Kruge.
- Cathie Shirriff como Valkris.
Argumento
[editar | modificar o codigo]A nau espacial Enterprise d'a Federación torna enta la Tierra dimpués d'una batalla con o sobrehumán Khan Noonien Singh, qui intentó destruyir l'Enterprise esclatando un dispositivo experimental de terraformación conoixiu como "Chenesi". As victimas d'a baralla incluyen a l'amigo vulcaniano de l'almirant James T. Kirk, Spock, que o suyo atabul estió lanzau a l'espacio y finalment aterrizó en a planeta creyada por o dispositivo "Chenesi". En arribar a lo puerto espacial d'a Tierra, o doctor Leonard McCoy prencipia a actuar de traza extranya y ye deteniu. O comandant d'a Flota Estelar, l'almirant Morrow, visita l'Enterprise y informa a la tripulación que a nau será esparada; a tripulación recibe instruccions de no charrar sobre "Chenesi" a causa d'as consecuencias politicas sobre o dispositivo.
David Marcus (Merritt Butrick), fillo de Kirk y cientifico clau en o desembolique de "Chenesi", y o tenient Saavik (Robin Curtis) son investigando la planeta Chenesi a bordo d'a nau cientifica Grissom. En descubrir una forma de vida inasperada en a superficie, Marcus y Saavik se transportan a la planeta. Troban que o dispositivo "Chenesi" ha resucitau a Spock en forma de nino, encara que a suya ment no ye present. Marcus admite que fació servir protomateria inestable en o desembolique d'o dispositivo "Chenesi", lo que provocó que Spock aviellise rapidament y significa que a planeta será destruida en bellas horas. Entremistanto, Kruge (Christopher Lloyd), o comandant d'una nau klingon, intercepta información sobre "Chenesi". Reconoixendo lo potencial d'o dispositivo como arma, leva a suya nau amagada a la planeta Chenesi, destruye a nau Grissom y busca supervivients en a planeta.
O pai de Spock, Sarek (Mark Lenard), s'enfrontina a Kirk sobre a muerte d'o suyo fillo. A parella s'entera de que antis de morir, Spock transfirió a suya katra, u esprito vivient, a McCoy. O katra y o cuerpo de Spock son necesarios pa que descanse en o suyo mundo natal, Vulcan, y sin aduya, McCoy morirá por levar-lo. Desobedeixendo as órdens, Kirk y os suyos oficials quitan a McCoy d'a detención, desactivan l'USS Excelsior y furtan l'Enterprise d'o puerto espacial pa tornar enta la planeta Chenesi y recuperar o cuerpo de Spock.
En Chenesi, os klingon capturan a Marcus, Saavik y Spock, y antis que Kruge pueda interrogar-los, a suya nau indica que l'Enterprise ha plegau.
En orbita, l'Enterprise sin tripulación inicialment gana a partida en a batalla, pero os klingons tornan o fuego y desactivan a nau. En l'enfrontinamiento que sigue, Kruge ordena que un d'os ostaches en a superficie sía executau. Marcus muere desfendendo a Saavik y Spock. Kirk y companyía finchen rendir-se y activan a secuencia d'autodestrucción de l'Enterprise, matando a lo grupo d'abordache klingon mientres que a tripulación de l'Enterprise se transporta a la superficie d'a planeta. Prometendo lo secreto de "Chenesi", Kirk atraye a Kruge a la planeta y fa que Kruge leve a la tripulación de Kirk a la nau klingon. A medida que a planeta Chenesi se desintegra, Kirk y Kruge se barallan a punyadas; Kirk sale victorioso dimpués de patiar a Kruge dende una cingla enta un fluxo de lava. Kirk y os suyos oficials prenen o control d'a nau klingon y s'endrezan enta Vulcan.
Astí, o katra de Spock s'achunta con o suyo cuerpo en un procedimiento perigloso clamau fal-tor-pan. Manimenos, a ceremonia tien exito y Spock resucita encara que os suyos recosiros son esflecaus. Debant d'a indicación de Kirk, Spock recuerda que se referiría a Kirk como "Jim" y tamién reconoixe a la tripulación. Os suyos amigos s'achuntan con goyo a lo suyo arredol.
