رمسيس شافى

رمسيس شافى
،  و
معلومات شخصيه
الميلاد	29 اغسطس 1933 [1][2]  نويى-سور-سين
الوفاة	1 ديسمبر 2009 (76 سنة)[3][1][2]  امستردام
سبب الوفاة	سرطان المريء
مواطنه	مملكة نيديرلاند فرنسا
الحياه العمليه
المهنه	مغنى ،  وبيانيست ،  وممثل مسرح ،  وممثل افلام ،  وممثل ،  وممثل تيليڤزيون ،  وملحن ،  وشاعر غنائى
اللغه الام	هولندى
اللغات المحكيه او المكتوبه	هولندى
بداية فترة العمل	1955
المواقع
الموقع	الموقع الرسمى
IMDB	صفحته على IMDB[4]
تعديل مصدري - تعديل

رمسيس شافى كان فخور بأصله المصرى

رمسيس شافى Ramses Shaffy ( نويلى سور سين ، فرنسا ، 29 اغسطس 1933 - امستردام ، نيديرلاند ، 1 ديسمبر 2009 ) ، مغنى هولندى و ممثل و استعراضى كبير من اب مصرى و ام روسيه. بعد ما اشتغل ممثل لفتره لمع كمغنى لأغانى من نوعية الشانسون Chanson فى ستينات القرن العشرين و بقا من اكبر و اشهر المغنيين فى هولندا. من اغانيه المشهوره " سامى " Sammy، و " حا نستمر " We zullen doorgaan، و " سيبنى " Laat me ، و " غنى، قاوم، عيط، صلى، اضحك، اشتغل و استعجب " Zing, vecht, huil, bid, lach, werk en bewonder . كان فخور بأصله المصرى و احتفظ و اشتهر بإسمه رمسيس.

نشئته

اتولد رمسيس شافى فى نويلى سور سين Neuilly-sur-Seine جنب باريس فى فرنسا سنة 1933 من دبلوماسى مصرى و كونتيسه بولنديه من اصل روسى. نشأ فى مدينة كان فى جنوب فرنسا لكن بعد ما عييت امه اخدته خالته هولندا و اتبنته عيله فى مدينة ليدن فى هولندا. لحظة فراقه لأمه كانت اليمه و اثرت عليه و غنى من وحيه اغنية " القطر اللى رايح الشمال " De trein naar het noorden ، اللى من ضمن كلماتها : وقفتى ما بتتحركيش ،و الدمع فى عينيكى على رصيف المحطه ، لما انا كنت لسه صغير ، فى القطر اللى رايح على الشمال. بصينا لبعض ، فى وقت المغربيه ، لما انا كنت لسه صغير ، فى القطر اللى رايح على الشمال. من غير ما أدرى فهمت ، مشوارى دلوقتى ابتدا ، فى القطر اللى رايح على الشمال " و خلصت بكلمات بتقول : " لسه انتى واقفه قدامى ، على رصيف محطه مهجوره ، لإن ربنا ما استجابش لصلاتنا ".

لمعانه

رمسيس شافى فى حفله سنة 2006.

رمسيس ما خلصش التعليم الثانوى و دخل مدرسة المسرح فى امستردام سنة 1955 و عمل شوية اعمال كوميديه مسرحيه، و فى سنة 1960 سافر روما مع زميل ليه يدورو على شغل كممثلين لكن ما لقيوش فرجع هولندا و كتب عن رحلته كتاب " جوابات من روما ". فى سنة 1964 انشأ فرقه مسرحيه اسمها " شافى شانتان " Shaffy Chantant و اشتغل مع مغنيه مشهوره اسمها ليزبيت مش Liesbeth List و بيانيست اسمه لويس فان دايك Louis van Dijk و لمع نجمه كفنان قدير و فى سنة 1968 غنى ديو مع المغنيه ليزبيت مش و ذاعت شهرته و بقى من ألمع المغنيين فى هولندا ، و فى بداية التمنينات اتجه للتمثيل فى المسرح و السينما و نجح نجاح كبير فى دور دون كيشوت فى مسرحيه غنائيه اسمها " الراجال من لامانشا " قدمتها فرقة باليه فلاندر الملكيه.

فى سنة 2002 عمل عنه المخرج بيتر فلورى Pieter Fleury فيلم تسجيلى اسمه " رمسيس : فين أميرى " 'Ramses: Où est mon prince' و كسب الفيلم جايزة العجل الدهبى فى مهرجان اوترخت السينمائى.

اتعرض رمسيس لمشاكل صحيه بسبب ادمانه الخمره و اتصاب بداء كورساكوف syndroom Korsakov و اعتزل الفن فتره لكن قدر بإراده جامده انه يتجاوز الادمان و العيا و ظهر على المسرح تانى سنة 2005 مع زميلة حياته ليزبيت مش و نجحت اغانيه. و فى يوليه 2008 غنى فوق مسرح مدينة سانت نيكلاس المكشوف فى بلجيكا بمناسبة أعياد 11 يوليه و نجح نجاح كبير.

جوايز و تقدير

كرمته هولندا بوسام فارس

رمسيس شافى اخد جوايز تقديريه كتيره و كرمته هولندا فأخد سنة 2002 وسام فارس الأسد النيديرلاندى geridderd in de Orde van de Nederlandse Leeuw ، و جايزة اديسون اوفر Edison Oeuvre اللى نالها فى 31 مايو 2006 كتقدير لجهوده فى تطوير الاغنيه النيديرلانديه. و فى 6 نوفمبر 2007 اتعمل له تمثال اتحط فى مسرح امستردام Amsterdamse Schouwburg. فى ذكرى وفاته اصدرت هولندا ورقة بوسته عليها بورتريت ليه و اتكتب تحته بحروف كبيره اسمه " رمسيس ".

رمسيس الشافى كان شخصيه لطيفه و محبوبه عاش فخور بأصله المصرى و حبته الناس حب كبير. اتوفى فى امستردام فى 1 ديسمبر 2009 بعد فترة عيا طويله.

لينكات خارجيه

• موقع رمسيس شافى الرسمى

1. مُعرِّف قاعدة بيانات الأفلام على الإنترنت (IMDb): https://www.imdb.com/name/nm0787350/ — تاريخ الاطلاع: 17 اكتوبر 2015
2. باسم: Ramses Shaffy — معرف فنان في دتش توب 40: https://www.top40.nl/top40-artiesten/ramses-shaffy — تاريخ الاطلاع: 9 اكتوبر 2017
3. http://www.nos.nl/nosjournaal/artikelen/2009/12/1/011209_shaffy.html
4. مُعرِّف فنَّان في موسوعة "ميوزيك برينز" (MusicBrainz): https://musicbrainz.org/artist/980337ad-3401-4392-b15c-45d806975104 — تاريخ الاطلاع: 30 اغسطس 2021 — الناشر: مؤسسة ميتا برينز