El tercer home (inglés: The Third Man) ye un filme británicu del añu 1949 dirixíu por Carol Reed, con Joseph Cotten, Orson Welles y Alida Valli nos papeles principales. El guión escribiólu Graham Greene. Rodóse en London Film Studios (Shepperton, Inglaterra) y los esteriores n'Austria. La música d'Anton Karas, interpretada por él mesmu en cítara, foi un éxitu y llegó a los primeros llugares en 1950.
Holly Martins (Joseph Cotten), escritor de noveles del oeste barates, llega a Viena en 1947 cuando la ciudá ta dixebrada en cuatro zones ocupaes polos aliaos de la Segunda Guerra Mundial. Holly llega reclamáu por un amigu de la infancia, Harry Lime (Orson Welles), que-y prometiera trabayu. Pero'l mesmu día de la so llegada coincide col entierru de Harry, que foi atropelláu por un choche. Holly conoz y namórase d'Anna, que yera la moza del so amigu.
Énte un conxuntu de datos contradictorios, Holly escomienza a investigar la muerte de Harry, sospechando qu'igual fuera asesináu. El xefe de la policía militar británica descúbre-y que'l so amigu andaba metíu na trama del mercáu negru.
Masque dende'l principiu propunxéron-y escribir el guión d'una película ambientada na Viena de posguerra, cola presencia de les cuatro potencies ocupantes, Graham Greene prefirió escribir la trama en forma de novela. Aquella ye la manera única, aseguraba, de poder planificar el guión, que sería más tarde ellaboráu pol propiu novelista y pol productor, Alexander Korda. Greene siempres defendió que la versión de la película yera muncho meyor que la del llibru (incluyíu'l final, que ye distintu), lo que nun torgó qu'ésti fuera editáu y acabara convirtiéndose nun clásicu.
L'aporte de Orson Welles al conxuntu de la película paez claru. Welles, que tenía problemes coles sos producciones en Hollywood, decidió dir a Europa, onde dirixó y collaboró en dellos proyeutos, ente ellos ésti llargumetraxe de Carol Reed. La so primera apaición en pantalla (el movimientu d'una lluz que descubre a Harry Lime énte la sorprendida cara de Cotten) ta considerada como la meyor presentación d'un personaxe nun filme. El planu secuencia del final y la escena de la persecución nes alcantarielles de Viena son igualmente memorables.
Una calterística clave d'El tercer home ye l'usu por Robert Krasker d'una cinematografía espresionista, con illuminación duro y ángulos inusuales de la cámara. En combinación cola única temática musical, llugares decadentes y les aclamaes interpretaciones de los actores, l'estilu evoca l'atmósfera d'una Viena de posguerra nel iniciu de la Guerra Fría. La magnífica fotografía en blancu y negru enseña llugares de la capital austriaca como la Noria de del Prater o les cloaques vieneses, marcu de la famosa escena de la persecución final.