Lliga Balcánica
La Lliga Balcánica foi una alianza formada polos reinos de Serbia, Montenegru, Grecia y Bulgaria en 1912 col envís de destruyir los últimos restos del Imperiu otomanu nel continente européu.
Antecedentes
[editar | editar la fonte]La lliga nació de forma un tanto improvisada, como reaición frente a la fácil derrota de los otomanos na guerra ítalo-turca de 1911-1912, un fechu que-yos va costar Libia y el Dodecanesu. Los estaos balcánicos vieron una oportunidá inmeyorable p'atacar al enemigu turcu, amoriáu y desapaecíu nel caos internu tres la derrota, y consiguir por fin los territorios que los sos sectores más nacionalistes allampaben. La implicación d'axentes rusos na trama foi decisiva yá que pretendíen aumentar la influyencia del so propiu país na zona, pa disgustu del so principal competidor, l'Imperiu austrohúngaru, y la so más firme aliada, Francia; dambes potencies atopáronse sorprendentemente xuníes nun llamamientu a la tranquilidá dirixíu a los países balcánicos, pero éstos nun lu escucharon.
L'alianza
[editar | editar la fonte]La primer piedra de l'alianza consistió nel alcuerdu de defensa billateral soscritu por Bulgaria y Serbia'l 13 de marzu de 1912, cuando la guerra ente turcos ya italianos taba inda en puxanza, y que dos meses dempués convirtióse nuna alianza militar plena. Grecia, que fracasara en 1897 al tentar a los turcos en solitariu y tamién naguaba una parte d'esa victoria nun quixo quedar atrás, polo que propunxo otra alianza defensiva a Bulgaria que se materializó tres la firma del Tratáu de Sofía soscritu'l 29 de mayu de 1912. Poco dempués Bulgaria llegó a un alcuerdu similar con Montenegru, completando la rede d'aliances en contra de Turquía.
Nos últimos díes de setiembre (menos d'un mes primero de terminar el conflictu colos italianos) tanto los integrantes de la Lliga como los comandantes del Imperiu otomanu n'Europa movilizaron les sos tropes. Montenegru declaró la guerra'l 8 d'ochobre y el restu fízolo 9 díes dempués n'unviando un ultimátum a Constantinopla.
La guerra foi un ésitu casi total pa los exércitos de la Lliga, que collecharon una victoria tres otra y conquistaron tolos dominios turcos n'Europa sacantes Albania (que se remontó por cuenta propia contra los otomanos, proclamando la so independencia) y la franxa de terrenu alredor de Galípoli y Constantinopla. Sicasí, esta fácil victoria resultó ser un carambelu envelenáu, yá que surdieron disputes internes ente quien fueron aliaos. Menos d'un añu dempués rompieron los trataos y Grecia y Serbia, ayudaos por Rumanía y, irónicamente, l'Imperiu otomanu, atacaron a quien consiguiera conquistar más territorios na campaña anterior: Bulgaria. Serbia y Grecia repartiéronse entós el control de Macedonia, Rumanía ganó Dobruja Meridional y Turquía consiguió recuperar parte de Tracia (incluyida la importante plaza d'Edirne) con relativa facilidá. Tolos países implicaos volvieron combatir ente sí polos mesmos territorios tres l'españíu de la Primer Guerra Mundial en 1914.