Álvaro de Saavedra Cerón (España, ¿? - Océanu Pacíficu, 1529) foi ún de los primeros esploradores europeos nel Océanu Pacíficu.
Desconozse’l llugar y fecha de la so nacencia[1], anque se sabe que foi a finales del sieglu XV o a principios del XVI. Yera español de nacencia y primu d'Hernán Cortés, al qu'acompangó a la Nueva España, güei Méxicu, en 1526.
En 1527 Hernán Cortés equipó una espedición que tenía como oxetivu atopar nueves tierres nel mar del Sur (Océanu Pacíficu) y encargó-y al so primu Álvaro de Saavedra y Cerón que se ficiera cargu de la mesma. Otru oxetivu d'esti viaxe yera atopar la nave Trinidad unviada per Magallanes a les Filipines, que se consideraba perdida nesa área.
El 32 d'ochobre de 1527 zarparon de Zihuatanejo (estáu mexicanu de Guerrero) les tres naves (Florida, Espíritu Santo y Santiago) rumbu al Pacíficu. Atravesaron el mar del Sur y percorrieron la costa norte de Nueva Guinea, a la qu'apellidaron Islla d'Oru, y el 3 d'ochobre de 1528 aportó a les islles Moluques namás una de les naves. La espedición de Saavedra, descubrió l'archipiélagu de Ḥawai’l 28 de payares de 1527. Un vieyu rellatu oral ḥawaianu fala d'unos blancos qu'aportaron a les islles munches xeneraciones enantes que l'inglés James Cook en 1778[2]. Posiblemente fueren miembros d'esta tripulación. Demientres estos dos sieglos y mediu los galeones españoles cruciaron el Pacíficu a lo llargo d'una ruta que pasa al sur de Ḥawai nel so camín a Manila. La ruta exacta caltúvose en secretu pa protexer el monopoliu comercial español.
El 27 de marzu de 1528 arribó a Tidore la nao Florida al mandu d'Álvaro de Saavedra, onde atopó la espedición de García Jofre de Loaísa. La Florida partío hacia Nueva España el 14 de xunu de 1528, cargada con sesenta quintales de clavu d'olor, pero tuvo que tornar a Tidore, onde aportaron el 19 de payares de 1528. Nel so intentu de tornar a la Nueva España, foi esviáu pelos vientos alisios, que lu aventaron a otra vuelta a les Moluques.
Tiempu depués, Álvaro de Saavedra intentó nuevamente’l regresu, pero navegando más al sur. Tornó a les costes de Nueva Guinea, una de les poques islles conocíes del Pacíficu nesa dómina, y depués de recibir agua y alimentos de los nativos empobinó nuevamente al noreste, onde descubrió los grupos de les Islles Márxal y les Islles del Almirantalgu.
Desembarcó na pequeña islla d'Enewetak, dende onde prosiguió’l so viaxe hacia l'este y foi nuevamente sorprendíu pol aire que lu llevó por tercer vez a les Moluques. El 3 de mayu de 1529, al intentar tornar a Nueva España otra vegada, sorprendiólu una tempestá y nuevamente tuvo que regresar, aportando a Gilolo’l 8 d'avientu de 1529 y morriendo nel trayeutu.