Taman Nasional Alas Purwo
| Taman Nasional Alas Purwo | |
|---|---|
IUCN Kategori II (Taman Nasional) | |
 | |
  TN Alas Purwo Genah ring Jawa | |
| Genah | Jawa Kangin, Indonésia |
| Nampek kota | Banyuwangi |
| Koordinat | 8°41′S 114°28′E / 8.683°S 114.467°E |
| Jimbar | 434.20 km2 (167.65 sq mi) |
| Kaadegang | 1992 |
| Karauhin | 14,720 (warsa 2006[1]) |
| Sané Ngalola | Kamanterian Palemahan Urip miwah Kawanaan |
| Situs web | tnalaspurwo |
Taman Nasional Alas Purwo (TN Alas Purwo) inggih taman nasional sané magenah ring Kecamatan Tegaldlimo dan Kecamatan Purwoharjo, Kabupatén Banyuwangi, Jawa Timur, Indonésia. Manut saking géograpisnyané magenah ring ujung kelod kangin Pulo Jawa wewengkon pasih kelod sawatara 8°26’45”–8°47’00” LS miwah 114°20’16”–114°36’00” BT.[2]
TN Alas Purwo madué jimbar 43.420 ha sané kapah dados petang pahan, inggih punika:
- Genah Inti (Sanctuary zone) jimbarnyané 17.200 ha
- Genah Rimba (Wilderness zone) jimbarnyané 24.767 ha
- Genah Pemanfaatan (Intensive use zone) jimbarnyané 250 ha
- Genah Penyangga (Buffer zone) jimbarnyané 1.203 ha
Rata – rata curah ujannyané inggih punika 1000 – 1500 mm per warsa tur suhunnyané sawatara 22°-31 °C, miwah kelembaban udarannyané sawatara 40-85 %. Wewengkon TN Alas Purwo ring sisi kauh madué curah ujan langkungan saking wewengkon sisi kangin. Ring keadaan sané biasa, musim ring TN Alas Purwo ring bulan April ngantos Oktober inggih punika musim kemarau tur ring bulan Oktober ngantos April inggih punika musim ujan. Wewengkon TN Alas Purwo madué topograpi datar, magelombang akedik ngantos kauh tur madué puncak sané pinih ageng ring Gunung Lingga Manis (322 mdpl).
Keadaan tanahnyaé akéh sané marupa tanah liat tur mabias, lianan saking punika wénten taler marupa tanah lempung. Tukad ring wewengkon TN Alas Purwo ketahnyané dangkal tur endép. Tukad sané ngalir yéhnyané nyambran warsa wénten ring pahan kauh TN inggih punika Sungai Segoro Anak miwah Sunglon Ombo. Sumber yéh sané wénten ring wewengkon Gunung Kuncur, Gunung Kunci, Goa Basori, miwah Sendang Srengenge.
Ketahnyané soroh alas ring wewengkon TN Alas Purwo marupa alas ujan dataran rendah. Alas tiing marupa pupulan sané akéh kirang langkung 40% saking makasami alas sané wénten irika. Ngantos ring galah puniki wénten sawatara 548 soroh entik-entikan sané kapah dados padang, hérba, semak, liana, miwah punya. Manut saking soroh ekosistemnyané, alas ring TN Alas Purwo kapah dados alas tiing, alas pasih, alas bakau utawi mangrove, alas tanaman, alas alam, miwah padang penggembalaan (Feeding Ground).
Soroh-soroh buron ring wewengkon TN Alas Purwo prasida kapah dados 4 pahan, inggih punika Mamalia, Aves, Pisces miwah Reptilia. Mamalia sané wénten sawatara 31 soroh, minakadi Banteng (Bos javanicus), Menjangan Timor (Cervus timorensis), Ajag (Cuon alpinus), Celeng Alas (Sus scrofa), Kijang (Muntiacus muntjak), Macan tutul (Panthera pardus), Lutung (Trachypithecus auratus), Kera Abu-abu (Macaca fascicularis), miwah Alu (Varanus salvator).
Kedis sané sampun kacatet akéhnyané 236 soroh sané kapah dados kedis darat miwah kedis yéh. Lianan saking punika, wénten taler kedis pendatang sané sampun kacatet inggih punika wénten 39 soroh. Soroh kedis sané dangan kacingak minakadi Ayam Hutan (Gallus gallus), Kangkareng (Antracoceros coronatus), Rangkok (Buceros undulatus), Merak Jawa (Pavo muticus) dan Cekakak jawa (Halcyon cyanoventris). Ring genah punika taler wénten 20 soroh reptil.
Krama sané meneng ring wewengkon TN Alas Purwo, ketahnyané ngrereh pangupadiri dados petani, buruh, miwah nelayan. Krama sané dados nelayan akéhnyané meneng ring wewengkon Muncar, sané dados silih tunggil pelabuhan bé sané pinih ageng ring Jawa, miwah ring wewengkon Grajagan. Krama irika akéhan sané maagama Islam, nangin akéh taler sané maagama Hindu, utamannyané ring Désa Kedungsari miwah Kalipait. Krama ring wewengkon TN Alas Purwo rumasuk ring krama Jawa Tradisional.
Matapa, masemadi, sayan (magotong royong mangun umah), bayenan, miwah nglaksanayang upakara selamatan sané makaitan sareng ketenangan batin kantun kalaksanayang irika. Ring rahina-rahina khusus sakadi 1 suro, bulan purnama, bulan mati, krama irika rauh ka wewengkon Alas Purwo tur masemadi irika. Genah punika taler dados genah sané kasub krana tenget. Kacritayang ring galah sané sampun lintang, wénten akéh krama sané tersesat, karampok, tur kapademang olih perampok sané meneng ring Alas Purwo. Ring irika taler wénten makhluk halus, ngantos mangkin, genah punika kantun kasub dados genah pinih tenget ring Pulo Jawa.
- ↑ "Forestry statistics of Indonesia 2007" (PDF). Kaarsipin saking versi asli (PDF) tanggal 22 July 2011. Kaaksés 20 Méi 2010.
- ↑ "Alas Purwo - Camp di Alas Purwo Banyuwangi, Banyak Orang Tirakad!". CarrierStory.com (ring Inggris). 2018-12-13. Kaarsipin saking versi asli tanggal 2021-05-13. Kaaksés 2021-05-13.
