Armee da Republik Vietnam

Fahna vo da ARVN

D Armee da Republik Vietnam (dt.: Armee der Republik Vietnam (ARVN) san Soidodn vo Sidvietnam gwen. Wia da Vietnamkriag 1975 goa gwen is, no homses afglesd und vui vo de houa Offiziare san gflichdd gwen. Da Groustei fo de Soidodn owa san in vo de Kommunisdn eihgrichdde Loga kumma, zan um`aziang.

Gschicht

Om 8. Meaz 1949 is Vietnam offiziej a eingstendiga Stoot gwen und se hom ara eigane Armee afschdejn miassn. Ausbuidd sans fo de Franzosn worn, domids donoch geng d Vietminh und no ondare antifranzesische Rebejn kempfa kinna. No hodma de Truppm Nationale Armee vo Vietnam gnennd.

1952 homs scho 60 Batalliona ghod, owa bam Kompf geng d Việt Minh homs fost koa Roin ned gschbuid. Moast hodmas ois Wochbosdn eihteid ghod. A bo Foischiamjaga vo da Armee san ba da Schlocht vo Điện Bieen Phủ dobei gwen und san mid de Franzosn untagonga gwen. In da Bevejkarung hod de Armee aa koa Untastitzung gfundn ghod, wei mas grod ois Schnialkaschbal vo de franzesischn Kolonioitruppm ogseng hod.

Om 21. Juli 1954, noch da Indokinakonfarenz und wead d Franzosn okaud gwen san, is de Armee afglesd gwen.

Om 26. Oktoba 1956 hod da President Ngo Dinh Diem de ARVN wida ins Lem gruafa ghod. Desmoi isara Luftwaffn, de VNAF mid afbaud worn. Da Haptgegna san de Vietcong und d NVA gwen. De woitn an Diem odrahn und a Widavaeinigung vo Vietnam untara kommunisdischn Herrschoft.

D USA unta'm Presidentn John F. Kennedy, hom Armeeberota, Waffn und vui Gejd noch Vietnam gschickd ghod, ois Untastitzung fia'd ARVN.

1963 san olle ARVN-Offiziare rebejisch woan und hom an Ngo Dinh Diem ognagglt ghod. Donoch hod's a grous Kaos gem ghod, wei d Stootsfiahrung amoi wieda zwischn vaschidne ARVN Genarej gwexld woan is. Za dem Zeidpunkt hom d Amerikana scho a boa Luftwaffnschdizpunkte z Vietnam ghod, de da Vietcong aa eafoigreich ogriffa hod. No hom d Amerikana gwissd, de ARVN alloa, is koa ausreichnda Schutz ned. Ob 1965 san easchtmois amerikanische Bodntruppm noch Vietnam kumma gwen und noch und noch hom's den Kompf geng d Vietcong iwanumma ghod. D ARVN is im VietnamKriag fost bedeitungslos worn, owa d USA hod de Armee weida untastitzd ghod und noch amerikanischn Voabuid umbaud.

1969 hod da US-President Nixon d „Vietnamisiarung“ voum Vietnamkriag okindigd ghod und noch und noch de amerikanischn Soidodn ozong. D ARVN hod etz on Hapttei vo de Kämpf iwanemma miassn. Vo 1969 bis 1972 hom's etz jeds Joa za. 20.000 gfoine Soidodn ghod.

1973 und 1974 san scho fost koane Amerikana meah do gwen, da Noadn hod middlawei Huif vo Kina und da Sowjetunion griagd. 1974 hod da Nixon zruckdrehn miassn und de neie Regiarung hod d Huif fia Siadvietnam drasde kiazd. Des hod Siadvietnam s Gnagg brocha, song heit Historika.

Da Vietcong hod se 1975, nochdem Sidvietnam koa Gejd und Huif meah griagd hod, afgmochd um Saigon z eaoban. De Oparazion hod'n Nam: Ho-Chi-Minh-Offansif griagd. De ARVN hod koa Schaas ghod, Kompfflugzeigl und Bomba hom gfehjd, nix hod'n Vietcong meah afhoitn kinna. Da sidvietnamesische Generoi und President Nguyễn Văn Thiệu hod no zan Rickzug blosn und d USA bschuidigd, doss Vietnam im Schdich lossn hom:

“If [the U.S.] grant full aid we will hold the whole country, but if they only give half of it, we will only hold half of the country.”

Om 30. Aprui 1975 is Saigon eaobad gwen, d Kommunisdn hom era Fahna afn Unobhengigkeitspalast ghissd ghod. D Republik Vietnam und d ARVN gibd's nimma. Vui vo de ARVN-Generej woitn se ned eagem und hom se umbrochd ghod.

Im Westn hod ma de ARVN im Kriag kaum za Kennnnis gnumma und se afd Amerikana konzendriad ghod. Owa se san middndrin gwen, hom mid 250.000 gfoine Soidodn de moastn Valuste ghod und hom a wichdige Afgom ois Fiahra, Doimetscha oda Wochoosdn im Kompfgebiet iwanumma ghod.

Im Netz

• The Suicides on April 30, 1975 (englisch)
• North Vietnamese Invasion 1975 (Timeline des Vietnamkriegs; englisch)
• VNAF (englisch)