Аліна Талай лац. Alina Tałaj | |
Пэрсанальная інфармацыя | |
---|---|
Поўнае імя | Аліна Генадзеўна Талай |
Нарадзілася | 14 траўня 1989 (35 гадоў) Ворша, БССР |
Грамадзянства | Беларусь |
Рост | 164 см |
Вага | 54 кг |
Прафэсійная інфармацыя | |
Спэцыялізацыя | лёгкая атлетыка (бег з бар’ерамі) |
Узнагароды і мэдалі |
Алі́на Гена́дзеўна Тала́й (нарадзілася 14 траўня 1989 году, Ворша, Віцебская вобласьць, БССР) — беларуская лёгкаатлетка, спрынтарка (бег з бар’ерамі). Чэмпіёнка Эўропы 2011 сярод моладзі, чэмпіёнка Эўропы 2012 году, чэмпіёнка Эўропы ў памяшканьні 2013 і 2015 гадоў; срэбраная прызэрка чэмпіянату Эўропы 2016 году; бронзавая прызэрка моладзевага чэмпіянату Эўропы 2009 году, бронзавая прызэрка чэмпіянату сьвету ў памяшканьні 2012 году, бронзавая прызэрка чэмпіянату сьвету 2015 году.
Першы вялікі посьпех Аліна Талай зазнала ў 2008 року на юніёрскім чэмпіянаце сьвету ў польскай Быдгашчы, калі ў фінале бегу на 100 мэтраў з бар’ерамі фінішавала на 4-м месцы, паказаўшы найлепшы вынік з эўрапейскіх удзельніц і адстаўшы ад 3-га месца кубінкі Бэлькіс Мілянэс на адну сэкунду[1].
У 2009 року ў летувіскім Коўне заваявала бронзавы мэдаль эўрапейскага чэмпіянату да 23 гадоў. У тым самым року дэбютавала ў дарослых спаборніцтвах, дайшоўшы да паўфіналу ў бегу на 60 мэтраў з бар’ерамі на Чэмпіянаце Эўропы ў памяшканьні.
У 2010 упершыню перасягнула 13-сэкундны паказьнік і да канца году мела найлепшы вынік 12,87 сэкунды. На чэмпіянаце сьвету ў памяшканьні-2010 у катарскай Досе і на чэмпіянат сьвету — 2010 у гішпанскай Барсэлёне з папярэдніх забегаў дайшла да паўфіналу, аднак у фінал ня трапіла.
У 2011 на чэмпіянаце Эўропы ў памяшканьні ў францускім Парыжы ў фінале бегу на 60 мэтраў з бар’ерамі заняла 5 месца з часам 7,95 с. У тым самым року ў чэскай Остраве стала чэмпіёнкай Эўропы да 23 гадоў. У фінале адзіная пераадолела 13-сэкундны бар’ер, паказаўшы вынік 12,91 с.[2]. Ад рэкорднага выніку швэдкі Сузаны Калюр 2003 року яе аддзялілі тры сотыя сэкунды[3]. У Чэмпіянаце сьвету ўдзелу ня брала, аднак стала пераможцай Сусьветных вайсковых гульняў з вынікам 12,95 с, усталяваўшы новы рэкорд спаборніцтваў.
У 2012 у бегу на 60 мэтраў з бар’ерамі ў турэцкім Стамбуле заваявала свой першы мэдаль сусьветнага чэмпіянату, паказаўшы вынік 7,97 с, на тры сотыя сэкунды саступіўшы срэбнай прызэрцы брытанцы Тыфані Портэр[4]. На эўрапейскім чэмпіянаце ў Хэльсынках саступіла толькі турчанцы Нэвін Яніт і заваявала срэбра.
Удзельніца Алімпійскіх гульняў 2012 году ў катэгорыі 100 м з бар’ерамі[5]. Па выніках 2012 году прызнаная найлепшай лёгкаатлеткай Беларусі[6].
У 2013 стала срэбнай мэдалісткай чэмпіянату Эўропы ў памяшканьні.
Трэніруе Аліну Талай чэмпіён Эўропы ў памяшканьнях 1976 року ў бегу на 60 мэтраў з бар’ерамі і срэбны прызэр 1977 Віктар Мясьнікоў[7].
5 верасьня 2014 году заняла трэцяе месца на этапе Брыльянтавай лігі з вынікам 12,89 сэкунды[8]. На чэмпіянаце сьвету ў Пэкіне 28 жніўня 2015 году заваявала бронзавы мэдаль з нацыянальным рэкордам — 12,66 сэк. На чэмпіянаце Эўропы 2016 году ў Амстэрдаме заняла другое месца. На Алімпійскіх гульнях 2016 году дайшла да паўфіналу, дзе ў забегу заняла 8 месца.
Аліна Талай — сховішча мультымэдыйных матэрыялаў