Жэнэўскія пагадненьні 1988 году

Жэнэўскія пагадненьні 1988 году
Пагадненьні аб ўладжаньні датычнага Аўганістану становішча
Тып дамовы	аб міры
Падрыхтаваная	8 красавіка 1988 (36 гадоў таму)
Падпісаная	14 красавіка 1988 (36 гадоў таму)
·  месца	Жэнэва (Швайцарыя)
Набыла моц	15 лютага 1989 (35 гадоў таму)
·  умовы	вывад Савецкай арміі з Аўганістану
Тэрмін дзеяньня	бестэрміновыя
Падпісанты	Абдул Вакіль Сахабзада Якуб-Хан
Бакі	Аўганістан Пакістан
Статус	дзейны
Мовы	ангельская, пуштунская і ўрду

Жэнэўскія пагадненьні 1988 году — тры двухбаковыя пагадненьні між урадамі Аўганістану і Пакістану, падпісаныя 14 красавіка 1988 году ў Швайцарыі.

Сталі вынікам перамоваў, якія праходзілі ў Жэнэве з чэрвеня 1982 году пры пасярэдніцтве прадстаўніка генэральнага сакратара ААН. Мелі на мэце спыніць Аўганска-савецкую вайну. Улучалі 3 пагадненьні: 1) «Аб узаемасувязі для ўладжаньня датычнага Аўганістану становішча», 2) «Аб прынцыпах узаемінаў, у тым ліку аб неўмяшаньні і неўварваньні», 3) «Пра добраахвотнае вяртаньне аўганскіх ўцекачоў». Пры гэтым, датычна 2-га пагадненьня ўрады ЗША і Савецкага Саюзу ўхвалілі Дэклярацыю аб міжнародных гарантыях. Першае з пагадненьняў, гарантамі якога выступілі ЗША і СССР, прадугледжвала вывад савецкага войска з Аўганістану да 15 лютага 1989 году, прычым 1-ю палову войска мелі вывесьці да 15 жніўня 1988 году. Працяг знаходжаньня ўзброеных фармаваньняў аўганскіх паўстанцаў у Пакістане прывёў да іх перамогі ў грамадзянскай вайне ў Аўганістане пасьля вываду савецкага войска^[1].

За 3 месяцы ад 15 траўня да 15 жніўня 1988 году Савецкая армія вывела з Аўганістану 50 183 вайскоўцы. Да 15 лютага 1989 году вывелі астатнія 50 100 савецкіх вайскоўцаў. Падчас вываду савецкага войска аўганскія паўстанцы забілі 523-х савецкіх жаўнераў^[2].

Крыніцы

1. Уладзімер Калаткоў. Жэнэўскія пагадненьні 1988 // Беларуская энцыкляпэдыя ў 18 тамах / гал.рэд. Генадзь Пашкоў. — Менск: Беларуская энцыкляпэдыя імя Петруся Броўкі, 1998. — Т. 6: Дадаізм — Застава. — С. 479—480. — 576 с. — 10 000 ас. — ISBN 985-11-0106-0
2. Даты, падзеі, людзі // Зьвязда : газэта. — 15 лютага 2014. — № 29 (27639). — С. 8. — ISSN 1990-763x.

Вонкавыя спасылкі

• Фарук Азам. Жэнэўскія пагадненьні аб Аўганістане (анг.) // Праект Амэрыканскай рады замежнай палітыкі «Унутры рэвалюцыі Рэйгана, якая перамагла Халодную вайну», 2015 г. Праверана 2 сакавіка 2022 г.